Theresa Zuñiga Camiling-Gutierrez, Pabanua Na

Ketang banuang milabasan, yti eta akalinguan,
Deng Pamilya nang THERESA, ing milyari kalungkutan,
Karing Anak at Asawa, sakit a alang kapara,
Ding Pengari at Kapatad, mengabungsul king tangis da.

King kasibulan a edad, meanggu ya bie'y THERESA,
Dinatang ing ka-orasan, meku ya pin at memun na,
Likuan ne ing Yatung yti, miglakbe at minuli ya,
Ketang lugal ning Miglalang, karinan a atyu banua.

Kilub ning pabanuang wewe, karela yang pigpaldasan,
Malungkut nang kamatayan, lubus e ra akalingguan,
Parating gunamgunaman, ing lingap at pakamal na,
Karing Pamilyang Mal keya, ding Camiling at Zuniga.

Ytang depat nang THERESA, karelang paninintunan,
Pamanyaup kamaganak, yti ena pin gilutan,
Ela mig-aduang salita, agad ya ping makatapal,
E manayang kayablasan, king linggap na at masabal.

Kareng kekatang Kabalen, at kalajing Capampangan,
Ing kagiwan nang THERESA, yti eta atawaran,
Tatangalan de't pupurian, king matas nang pegaralan,
Meging "Field Office Director" ya, HUD 'ing pipagobran.

Mete at ala ne'y RES ..., saguiua pang panandaman,
Detang Adle at Lugud na, yang e mate kapilan man,
Ytang Mayap a tenam na, lante gintung pupulan,
Ylang meging Pamana na, karing keyang pakamalan.

At ngeni nang kalag paldas, dinatang at pagmasusyan,
Mangadi ta't manalangin, purian taya ing Miglalang,
Ing kipkupan ne'y THERESA, anting anak nang panayan,
At binye na ytang tula, alang anggang kapaynawan.

At nung keka yang dungdungan, Ing Banal a Kasulatan,
Detang Amanu ning Guinu, dapat talang pagaralan ,
Dakal la retang kasebyan, misnang lalam nung tarukan,
Yng Aral a tuturu da, dalan la king karinan Na.

Uling ytang sablang bage, keti babu na ning Yatu,
Atin nang takdang panaun, panyatang a siguradu,
Ing pangabait ning tau, ytang oras mepili ne,
At kaibat ning pangisnawa, kamatayan mitakda ne.

Inya eta pagmulalan, mepalyari kang THERESA,
Ing Tolda na keting yatu, mesira at mitumba ya,
Dapot ing Bale luban na, maging tuknangan na banua,
Ing ginawa ing Ginung Dios, karetang Mal a Gamat Na.

Ating panaung kumiak ka, sasaguese ing kekang lua,
Panaun ning kalungkutan, nitang lumbe at paliasa,
Dapot sumangid ning Dusa, panaun neman ning Tula,
Mantabe ing Pamanerak, ing Sagakgak at Tumayla.

Anya Cong Andro, Atsing Tess, yti yang panalangin ku,
Pagkalaman na ku ning Dios, ketang lumbeng delanan yu,
Pigkalub yeng misnang lugud, ytang pangane Anak yu...
MIPAMINTU YTANG LUB NA..., Purian Ya at Samba Tamu.

Yanasa, Amen Jesus

King kalag paldas nang Theresa, panganeng anak di Cong Andro Camiling at Atsing Tess Zuñiga, karela makaparikil ya ing maluka kung kawatasan

Nelson Tanedo, King Pamaglacbe Mu

Poeta kang mituringan
metung a Salamangkeru,
Yta nang medalyang gintu
sinabit de king batal mu,
Anting Pamangilala da
kabiasnan mung mangamanu,
Makule mung kawatasan
ylang lakwan mung Recuerdu.

Masaya kaming manalbe
king Cascade Park balang Pista,
King Aguman Kapampangan
number one ka keng programa,
Uling Palage mung "magic"
balang metung matula la,
Ing bilis da ring gamat mu
mangaduling na ke mata.

Ninu pa ngening mag-magic?
Mebauas la ding Poeta. . . .
Uling y NELSON TANEDO
maglakbe at macu naya,
Muli ne ketang karinan
mangadi yang maki-abe,
King Miglalang a Dios tamu
Aduang gamat tanggapan ne.

Ing balang metung balu na
Istung mesira ne'ng Tulda,
Katawan tamung Pang-yatu
marunut at malakwan ya,
Oneng ytang kaladwa mu
karin banua neman munta,
Ketang tuknangan na ning Dios
Alang anggang karinan Na.

Ing ANASI melungkut ya
matalik nang kaluguran,
A kayabeng magmasabal
sesese king Capampangan,
Detang belangkas nang Poesya
samasan talang sinupan,
Paskil tala king "Internet"
at Parnasung Capampangan.

At ngening maglakbe na ya
at memun ne king Balayan,
Lakuan nu retang mal keya
Pamilya at kaluguran,
Dapot ing dapat mu't adle
marangal e akalinguan,
Ylang pamanang makamal
a mas pa king libung yaman.

Panayan mu ing penandit
nung subli la bie deng mete,
Deng Poeta king ANASI
Pasibayung akayabe,
Karin ta dalit, gumale
king Amanung alang lumbe,
Ding Angeles karin banua
masaya lang maki-abe.

Mamun naka kakang NELSON
Maglakbe kang matiwase,
Pangadi ming matanggap ka
king karinan mung makule,
Dakal ka gewang kayapan
linugud kang masalese,
King Dios at para mung tau
at king Amanu tang tune.