Nung Kecang Pibule-bule

A Capampangan version of an English poem
by Rodel Gosum

Nung keca yang pibulayan, mas mapali ya ing aldo, ngeni nang casalungsungan,
Detang Cutu keng kecang bwak, anti la waring tamumu, ing buntuc mu panginisan
Degulan da retang panas, mas madagul careng dutung, yti kecang pibulayan
At ytang kecang Sesesen, palac nang asna cabangis, carelang pitatacutan.

Keca nang pibule bule, nung deng bitis mung daralpac, casing dagul nu ning banca,
At deta nang kecang butul, e la masyadung matibe, payat la at malambut pa,
At pibule bule mu na, ing lasa da retang prutas, mapait anti mung sabun,
At ing uran a papatac, ketang banwa manibatan, dumalan ngan king acmulan.

Keca nang pibule bule, ing sala da detang tala, bulag anting talibatab,
At ing bulan king catasan, ala ya king cabilugan, sampad ya at misnang lapad,
Keca nang pibule bule, deta nang adwa mung mata, sindagul ning kecang asbuc,
At ding ayup king cakewan, caung namu ing daraptan, e nu dalit o magpasyuc.

E mu na pibule bule, dili mung magsasarili, manucnangan, keting yatu
At ing puso mu king salu, ketang dimla at mas ya pa, anting batung meging yelu
Pibule bule mu sana, nung ining benging daralan, e ne maging galing aldu,
Detang dutung a tanaman, keng paligid macatanam, malangi lang ting desyertu.

E mu na wari pagtachan , ining sablang malilyari, manintun pamagpalino,
Obat ing hegana gana, maging mayap at ustu ngan, alang bawas at exacto,
Ala cung balung palinu, metung yang capakibatan, at yti ya ing catutwan
Ing Mayupayang Miglalang, Dios yang ustu at cayapan, Ya mu ing tune Catutwan.

Artesia CA USA

Patauad, Ing Sucat King Micasala

I

Utus na ning Ginu, peca maulaga,
Migit caninu man, ing Dios luguran Ya,
Lugud king sarili, pati na aliwa,
Ya na ing tutuking, kecang abitasa,
Dapat na ning Tau, ing mamatawad ya,
Caibat nang depatan, ing Dios Ya nang bala.

II

King bagsic ding Balas, a pamagmatulid
Anti lang Armalite, king pusu sasagid
Menga tulala cu, at alang a isip
Bisa na cung matras, mula'ing Pulandit
Uling ing PARUSA, cagaling nang Misip
Anya Mengadi cu, ba nang Magmatulid.

III

Ing Utang mi keca, sana patawad Mu
Anting Patawad mi, kecami menutang
At abitasa ke, ing Dios a Minyaclung
Malapit niyang Mate king crus macayungyung
Adwan na king IBPA ing capatawaran
Caring tau'ng maroc, a menampalasan.

IV

Dios Mematawad Ya careng micasala
Tau'ng lelangan Na, ena tucian yta?
Nung Patawaran me Micasala keca
Anti cang Memintu ketang caburian na
Uling ding Lelangan , Mal lang tutu caya
PATAWAD, PATAWAD, Yatu cailangan na.

V

Lex Talion, Eye for Eye, gisanan Palipi,
Salvage, Rub Out, tomba, Parusa mu wari
Careng micasala batas yang matuki ?
Keng Pamamatawad magbayu la bili
At manaliwa pa maroc a ugali
Lugud parang tau, sarili mu, ali.

VI

King Mumunang Tipan, ing Dios tictac bagsic
Uling Upaya Na, buri nang ipakit
Ytang mipairal, Batas a maigpit
Careta nang Judyu a mapag-inakit,
Kening Bayung Tipan, ing Anac ning Tau
Mapamatawad ya, lugud kecatamu.

VII

Tutu pepalbug ne ing yatu canita
Anti mong parusa caring micasala
Keta nang gewa na, nanung sinabi Na
E cu no sintangan ding mabie Lelangan
Anting depatan cu e na miulitan,
Itang Pinanari sacsi’t catibayan.

VIII

Careng maganaca't matulid a lacad
E ne dapat ibie ing pamamatawad
Detang micasala, ugaling marawac
Ilang panupaya at luguran sucat
Anti mo'ing Tulisan keta king Calbaryo
Patawad binye Na, dela Paraiso.

IX

Bayu na aranas, casakitang sidsad
Yta nang San Pedro, Caya na inawad
Nung micasala ya, ing cacung capatad
Pitung Ucdu dapat, ing bye cung patawad?
Ali pekibat Na, king Caya mipalad
Pitung Ucdu a tia, Pitung Pulung ladlad.

X

Ing Meliling Anac turu at aral ya
Keng Pamamatawad Ibpa king Anac Na
Anac a miglayas, migwaldas king Mana
Malugud a Ibpa malwat manenaya
Agyang nang depatan magbalic ya sana
Ing ‘gang casalanan ing Patawad caya.

XI

Nung bisa cang saya tumibe catawan
Ing pamamatawad ya nang kecang gawan
Milisya king sakit, pusu't pilubluban
Mibaba ing presyon, carug alabanan
E anti mo retang, ala nang isipan
Nung e ytang casbu, at maki-ablasan.

XII

Manyaman ping tutu, ing mipanupayan
Lasa na at yumu ning pulut pucyutan
Dapot keng linamnam at peca-manyaman
Ing kecang casalang ya ing patawaran
Nuan pin ing mapamie’t, mamatawad naman
kesa keng tatanggap at mipatawaran.

XIII

Yca ing sinabi, at kecang Amanu,
Parusang mipatung, caring nunu tamu,
E pa miwawale, yatu ne ing yatu;
Macanyan cabagsic, ing paintungulan mu,
Nung pane parusa, buri mu king tau,
Ala na ing lugud, purus nang Impyernu.

XIV

Manang casalanan, mipatawaran na
At ing meging bayad, Crus king Golgotha;
Agyang y Muhammad inyad na cang Allah,
Detang casalang na mipatawaran la,
Ketang depatan dang pamamugbug caya,
Ding tau king Ta’if, miligtas la sana.

XV

Y Papa Benedict, dinalo Lebanon,
Panaung “Civil War", yang capalipalian,
Nung buri yu ngana, ing catajimican
Capatawaran mu, ing dalan yung tucyan
At canita tucnang sablang cagutgutan
Labwad ning Lebanon, tajimic neng miuman.

XVI

Anti mung panyara, mamatawad tamu
Kecang caisipan, tucyan ne ing Ginu
At carin ta ackit ketang pamamintu
Yti macacayap ketang sarili mu,
At tanggapan taya masanting a premyu
Bunga ning Patawad, lumaya cang ustu

Litratu Ning Milabas

1941

Babalican ing milabas, e na rugu mibalic pa
At saca ca pasalamat, ketang Mayap a binie Na,
Ytang timan a capurit, ya ing mamantabe keca,
Cabang deng kecang litratu, maluluma no itsura.

At ing sangcan mipaskil la, e cu bisang macalingwan,
Uling malwat na ping tutu, milaut cu at mindaywan,
Detang casising-anac cu, e ra na cu atandanan
Anya naman kening Face Book, malugud cu lang balican.

Nung sacaling buri ning Dios, e na cu macapagbalic,
Kening lugal America, keni na cu manahimic,
Pilitan cung ipatad pa, ing alalang mipnung sabic
Carng angin a marimla, at uran a atic atic.

Caretang cacung capatad, cacuyug at capanalig
Meging dake na ning bie cu, ketang lugud a sasagid.

Masayang Aldu'ng Kebaitan, Tang

Capampangan Version nang Amor C. de Jesus
poema nang Macy Ann Picardal in English

E mu sinabing macu ca
dit rugu eca memun man,

Miwale king panlalawe
bayu iti amalayan,

Dios yamu ing makibalu
ketang tune meging sangcan,

Angga ngeni ing pusu cu
Malumbe ing  panandaman;

Caring pisni mamalebe,
Ing sasalicut cung Lua,

At nanung cabaldugan na
Ing canacu miwale ca,

Nino cayang macatantu
acu mu ing makibalu?

Nung atipun cu mu ing lua
at macagawa cung eran,

Ing yumu ning panalala
yang taluntunan cung dalan,

Mamirapal cung lumacad
ketang banwa raca dasan,

E na cu micacunu pa
Bale tamu yang balican;

Sana naman carin banwa
atin la sang telepono,

Pasibayung damdaman ke
ing bosis mung maki tono,


Uling ita nang pamun mu
Alang anggang capupusan,

Pamun ing meging parasan
Ya pin na'y tang capupusan,

Dapot kilub ning pusu cu
Maulagang panalala,

At carin ca manucnangan
E na macu capilan man;

Masayang aldu kebaitan
O Tata cung pacamalan,

Ing lugud cu keca Tatang
Capilan man pagdulapan,

Nung ala ca man siping mi
mantabe ca sang parati,

Ing cabilian mu balu mi
Carinan ning Matas Dili

Pacamalan a Miglalang
Tanggapan me y Tata Mi.


HAPPY BIRTHDAY, TANG!

Masampat A Diwa (Don Fernando)

Puge nang Amor C. de Jesus

Don Fernandong Archetectu, gulis mung misnang deretsu,
Agyang careta nang Bersu, ing diwa mu susulagpu,
Malaut man itang bili, nu ya man danggat ning yatu,
Potang king Amanung Siswan, susulat yang inspiradu.

Anya abe king Aguman, paciapusan ya'y Fernando,
A Capampangan a tune, pagmaragul tamung tau,
E ya biasang mangalingwan, ketang cayang penibatan,
Detang taung mal pin caya, sisimpan king caisipan.

Ing mangga e mamulaclac, nung e me salaban mayap
Nung ali ing mapaliari, mamutat yang misnang salpac,
Ing Amanung Capampangan, calupa re deng tanaman,
Gambulan me at diligan, bayang mamungang manyaman.

Uling nung macalingwan ne, amanu tamung beitan,
Nanu pa'ing cabaldugan na, kecang panga Capampangan?
E wari sasamban taya, Dios linalang keca tamu. . .
Anya dapat luguran ya, itang binie nang Amanu.

Luid ca Don Fernando Garcia, king lingap mu king Salita,
Anya naman matula cu, tinggap mu cung cakilala,
E ca sasawang susulat, madalas cang mamicudta,
Idake talang Cayanacan, ketang masampat mung diwa.

Puge Cang Ca Marc M. Mangalindan (R.I.P.)

Potang Matua na ca

Ing tawling Soneto, kecami licwan mu
Tune mung panamdam, lugud king Amanu

Memun at meco ca, carin ipagsulit mu
Ing Amanung Siswan, ya sang gamitan mu

Carin dasan mula detang Capanalig
Panenayan daca ba rang maging cabig

King pamagtumayla dalit co king Sunis
Pakit yu ing lugud, king Dios sacdal linis.

Y caming melacwan, e ra ca calingwan
Ketang masabal mung tapat a parasan

Ing luwid ya sana, Amanu tang Siswan.
Amanung binye ra caring Capampangan.

Mituc sana keca tune Caratunan
Uling malugud ca king Ginung Miglalang.

Pamigunamgunam

Madalas ing maliliari, capanwalan mababawas
Potang daratangan na ca, casakitan at ning malas
Agad na cang micacunu, at maralas mu pang iyagcas,
Obat caya mipacanyan, mipase cang atna caplas.

Ing magcacasakit ca mu, metung caring mecalingwan,
Sana paca sanacan mung, e na ca pepaimburisan,
Ketang babie nang cayapan, dacal la reng mekinabang,
Metung ca careng liguran, dapat mung pasalamatan.

Detang dicut at sampaga tutubu ketang marangle,
Ambon, uran, pali't gabun,binye na balang e mate,
Mas la pa wari deng dicut o sampagang lingunan na,
Kesa kecatamung taung, misnang lugud lelangan na,

Deting tau anac na la, ylang dalan na king banwa;
Anya manatili cang tapat, agyang nanu mang problema,
A daralan kening bye mu, maging matatag ca sana,
Tumula ca't salpantaya, uling ing ing Dios malapit Ya.

Memun Ne I Caca

Alegria de Jesus Catacutan, R.I.P.
Neng Amor C. de Jesus

Memun ne y Caca, pepa dakit da ne,
King bayung tucnangan, carin ne pin ume,
Bale misnang santing, caya macabage,
Anting Calam ning Dios, malugud nang binie.

Meging bie king Yatu, a cayang delanan,
Dacal casakitan at capibabatan,
Dapot ala caya, sabla tinggap na ngan,
Alang parsalanan at alang sisisyan.

Caring pengari na, meging panlalawe,
Pepakit nang lugud, tapat at dalise,
Angga ring Capatad, liguran nung tune,
At deng pangunacan, liningap, sinese.

At istung Maleldu, e ke acalingwan,
Bosis nang malagu, tutung pangawilian,
Mamasa yang Pasyun, mipmung cabanalan,
Gege nang matarling, masanting damdaman.

Kecaming pisan na, misna ya ganaca,
Ala yang caimutan, e ya biasang mimwa,
Istung ackit naca, salubung na'ing tula,
Agyang yang pera na, babye na pang cusa.

Anya cacang Angging, e ca macalingwan,
Carening pusu mi, ti ca macasimpan,
At king paglacbe mu, aliwang balayan,
Manatili keca tutuc mung canwanan.

Macanyan lalabas keti babu yatu,
Perlas luwa'ng tinulu, mebaldug king salu,
Calupa ning bulung, melanat, menabu,
Muli ya king gabun, king banwa painturu.
Mamun na cu naman, o Caca cung Angging.

Alegria de Jesus Catacutan, RIP

Almario "Amor" C. de Jesus, Artesia, CA USA; puge at lugud na ning metung a pisan king pangawale nang Cacang Angging.
See English version.

La Dolce Vita (Biskote)

La Dolce Vita ngara pin, manyaman ya ing Biskoti,
Lalu na nung asnang pali itang inuman mung Cafe,
At saca ca timan timan uling alalasa meng tune,
Detang semada at mamun, keta na lang lele lele.

Salamat Cacaluguran, mesaya ya ing pascu cu,
Careng regalung tinggap cu, buri keng dili'ng kecayu,
Ing Biskote aliwa ya, lalu nung bucal king lub yu,
At detang taung didinan, pasalamat la kecayu.

The Sweet Life ya pin keng Inglish, Ing Bie asna ping canyaman,
Lalu keti California nung dacal ca caluguran,
Detang keca maki abe, tapat alang ca-plastican
At keca Gay at Mang July, tinggap yu keng caluguran.

Pasalamat cu kecayu, masayang Pascu Ning Dispu,
Pangadi cung mantabe ya, pagcalaman na cu ning Dios
Maging tahimic ing bie yu, busal ding aduang anac yu.
At nung cailangan ing saup, mutus cu pu at ati cu.

Amor at Daisy

Nelson Tanedo, King Pamaglacbe Mu

Poeta kang mituringan
metung a Salamangkeru,
Yta nang medalyang gintu
sinabit de king batal mu,
Anting Pamangilala da
kabiasnan mung mangamanu,
Makule mung kawatasan
ylang lakwan mung Recuerdu.

Masaya kaming manalbe
king Cascade Park balang Pista,
King Aguman Kapampangan
number one ka keng programa,
Uling Palage mung "magic"
balang metung matula la,
Ing bilis da ring gamat mu
mangaduling na ke mata.

Ninu pa ngening mag-magic?
Mebauas la ding Poeta. . . .
Uling y NELSON TANEDO
maglakbe at macu naya,
Muli ne ketang karinan
mangadi yang maki-abe,
King Miglalang a Dios tamu
Aduang gamat tanggapan ne.

Ing balang metung balu na
Istung mesira ne'ng Tulda,
Katawan tamung Pang-yatu
marunut at malakwan ya,
Oneng ytang kaladwa mu
karin banua neman munta,
Ketang tuknangan na ning Dios
Alang anggang karinan Na.

Ing ANASI melungkut ya
matalik nang kaluguran,
A kayabeng magmasabal
sesese king Capampangan,
Detang belangkas nang Poesya
samasan talang sinupan,
Paskil tala king "Internet"
at Parnasung Capampangan.

At ngening maglakbe na ya
at memun ne king Balayan,
Lakuan nu retang mal keya
Pamilya at kaluguran,
Dapot ing dapat mu't adle
marangal e akalinguan,
Ylang pamanang makamal
a mas pa king libung yaman.

Panayan mu ing penandit
nung subli la bie deng mete,
Deng Poeta king ANASI
Pasibayung akayabe,
Karin ta dalit, gumale
king Amanung alang lumbe,
Ding Angeles karin banua
masaya lang maki-abe.

Mamun naka kakang NELSON
Maglakbe kang matiwase,
Pangadi ming matanggap ka
king karinan mung makule,
Dakal ka gewang kayapan
linugud kang masalese,
King Dios at para mung tau
at king Amanu tang tune.

Lugud Qng Mal A Indu (v. 2)

I

Lugud mu qng mal a Indu, nung isulat me keng pluma
Detang tintang guintu’t pilac, ena abye ing gayuma
Uling ing sintang binye na, menibatan qng pusu na,
Pinunla na at sinese, meging ligaya na kaya.

II

Ninu wari Y Indu mu? Anting metung yang cometa,
Mabilis ya pangabaldug, kinislap ibat qng banwa,
Qng dalumdum nining bye mu, pepakit na ytang sala,
Biklat nu detang mata mu, lugud at dalise sinta.

III

Syam a bulan delanan na, anggang sakit pibata na,
Alus ytang camatayan, e mamacu qng siping na,
Ena na picabyang yta, ligaya na' ing mibait ca,
Uling daya na ka’t laman ning laman na at daya na.

IV

Magcanta yang Pepasusu, ena balu ing gawan na,
Terac na ca’t panaplusan, mumuma yang alang sawa.
At inyang magaral naca, ytang mayap tuturu na,
Lugud qng Dyos, parang tawu, mal a tibwan a balen na.

V

Anya nung maangu ne bye, pacamalan a Indu mu,
Anti neng mepitna keka, ing sala na niting yatu,
At ytang silbag nang lugud, nitang mal a Guinu tamu,
Cabud nala mu mipanpan , calmang lumbe pibatan mu,

VI

Ala na ngening mamapis, cacaul, mumuma keca,
At ala nang mituturu, sasaup keca mamingwa,
Ninu ing agad lapitan, king busal na nitang lugma,
Dili mu namung tatangis, pibatan mung meging calma.

VII

Talaga yatang macanyan, ing mabibye lalam banwa,
Masaya cayabe'ng tula, ating lungcut pati na luwa,
Anya yti tanggapan mu, aslam, pait alducan la,
Neng yti ing caburian na, nitang Dios tang Mayupaya.

VIII

Uling deng sablang melalang, tutuki la ketang agus,
Nung nucarin ytang sabla, ketang dagat ngan tataglus,
Keta nang pangabait mu, siguradung caulyan mu,
Ytang datang mu pang bucas, gabon ya ing pagkeran mu.

IX

Anya yka o penganac, emu dapat cacalingwan,
Cabang caba na ning bye mu, itanam mu king caisipan,
Ing lugud ning kecang Indu, yti alang cayangganan,
Tapat e  pamagcunwari, lante guintu ing panandam.

Lily, Rosa, Dunie and Let

See version 1; version 3.

Nanu Ing Tutu?

Nanu mu caya ing Tutu...
dapat tamung panintunan?
Anti ca waring  Diogenes...
a susulu neng caugtwan?
Nanung maulaga keng bye...
a dapat mung pagdulapan?
Deta nang batong brilyantes...
guintu't perang cayamanan?

Oy' tang  matas a Tungculan...
upaya, ticdi't cabyasnan?
Gelingan keng pamamasa...
king banal a casulatan?
Mapalyari kening bye mu,
ala na cang panintunan,
Uling atyu na ngan keca,
keng  yatung pamangailangan.

Dapat ganacan mu sana,
itang kecang caligtasan,
At yang pacasamasan mu,
paintunan me ing catutwan,
At nung dudungdung cang biblya
Amanu yang pagaralan,
Uling metung ya ing dalan,
ba meng ackit ing Miglalang.

Ing sabla keti king Yatu,
melalang uli ning Berbu,
Ing  Berbu o ing Amanu
ya mu namang meging Tawu,
Bata yang lubus abalu
king Aske na ampon Anyu,
Pamagaral king Amanu
Ipakit na ngan kecatamu.

At ica O Capampangan,
nanu mu ing Salita mu,
A dapat mung pacamalan
uling binye ne ning Guinu,
Yti at alang aliwa,
nune siswan mung Amanu,
Yang pematad da ping pusad
at mitatac king pusu mu.

Anya sana itang  Tutu...
ing dapat a panintunan,
Ytang banal a utus na...
caministilan yang tucyan,
At ing tune Lugud king Dios,
at parang tawu mu naman,
Yla ding tune Catutwan...
maging kecang Caligtasan.

Lugud

Macananu ya ing yatu, nung ing Lugud ala na ya?
Nanu caya ing ugali, ding tawung palpicasala?
King mabilug a sicluban, alang patna ing patayan,
At caring mabye pang tawu, maging dios de ing carucan.

Ing Lugud nanu ya keca, nanu ing cabaldugan na,
Nung yti bilin  ning Guinu, caretang apostoles na,
Dapat detang kinabus na, ketang utos mamintu la,
"Ing micacalugud cayu, anti'ng lugud cu kecayu.

Nung atin mang tune Lugud, alang cupas king panamdam,
Lugud a dapat mung gawan, maygit para caninu man,
Ybie mu ngan ytang Lugud, caladwa mu at catawan
King Dios a mapangalalu, ya cabud ing dapat samban.

Nung tutung ing sarilu mu, dapat mung kecang luguran
Uling yti yang "templu" na, espiritung cabanalan,
E me sana mumusingan, keca yang pacaingatan,
Ganacan mung ytang "banal", atyu keca manucnangan.

At caring para mung tawu, cayabe  no  ring casalang
Gamitan mu itang Lugud, ketang muwa da yang panlaban,
Nung atin lamang agawa, mesakit ca pilubluban
Caulan mula at tanggapan, cambe ning capatawaran.

Uling ing Lugud utos ya, ning Guinu tang Mayupaya
Ycang tawung lelangan na, caministilan tupad ya,
Lugud  a atyu  Isipan, eya cabud mu panamdam
Pilitan meng maging Dapat, at yti agyu mung gawan.

Detang Malugud a Pusu, tanaman la O masetas
Misnang Lugud Caisipan, yla ring Uyat a Masyas,
Ding Malugud a Amanu, Sampaga lang pangawilyan
Ytang Mayap namang Dapat, ylang Bunga, sacdal yaman.

        ULING ING DIOS YA ING LUGUD...
        ING TAWU LUGUD YA NAMAN...
        KING LUGUD  TAWU BEIT YA...
        AT KING LUGUD  MABIBIE YA...
        AT KETANG CAMATAYAN NA,
        ING LUGUD TUKI YA CA YA.

De Jesus siblings

Ing diwa keng panga-balangcas na ning poema, menibatan ya keng pamamasa cu king biblia (see translation in English).

Lugud Qng Mal A Indu (v. 1)

Nung kekang isulat, lugud mu king Indu
Letrang pilac, guintu, ela pa macagyu,
Uling Sinta caya, menibat king pusu
caring candungan na, meragul, tinubu.

Ninu mo'y Indu mu? metung yang cometa,
mebaldug, kinislap, bayang munie sala,
king dalumdum ning bie, biclat nu ding mata
akit dang dalise at tune a sinta.

King pangabait mu, itang delanan na
alus camatayan, yang meging dalu na
ena na picabyang sakit pibata na
baca mu sang luntu keti king masala.

Pepasusu naca, at peparagul pa
caring uma't aplus a alang capara.
at king pamagaral, ing sabla tiru na
itang lugud king Dios, tawu at balen pa.

Anya nung maangu ing bie nang Indu mu
anti neng mepitna, sala na ning yatu
ing silbag nang lugud nitang mal a Guinu
cabud niya mipanpan , lumbe pibatan mu.

Ala nang mamapis, cacaul mumuma
ala nang tuturu at keka mamingwa
ala cang lapitan busal na ning lugma
dili cang tatangis, king bigu mung calma.

Macanyan mabibie keti babu yatu
nung atin mang tula, sumangid ya ing luwa
Yti tanggapan ya, , pait alducan mu
Nung ya ing caburian nitang Mayupaya.

Deng sablang melalang, tuki la king agus
ing sabla mumuli, king dagat ya taglus
king pangabait mu, nanung caulian mu
King datang a bucas, maangu ing bie mu.

Anya o Penganac, emu sa calingwan
Anggang mabibye ca, tanam qng isipan
Ing Lugud ning Indu era apantayan
E pamagcunwari, angga qng cutcutan.

Apung Osang

See version 2; version 3.

Matwa Na Ing Bili

Dacal napin itang napun, kening bie mu a dinalan,
Detang  anggang sablang bage, maralas mu lang balicdan
At magmunimuni ca pa, at lubus catahimican
Nung atin capa cayang, maging BUCAS a asaan?

Ing NGENI nanu ya caya, nanung maging panandaman
Uling magbayu ing isip, pati na itang  catawan.
Dacal itang maging sangcan,  e mu binang amalayan
E mu balu ing malyari, anting metung a  tanaman.

Detang tanaman a dutung, keng kelwatan ning mabibie,
Ding yamut, pun at sanga da, magbayu ngan itang  aske
Ding bulung malalanat la, malagas keta nang tangke
At mibwal niya  cabud ing pun, ketang gabun ni'ya mipase.

Ing catawan na ning tawu, anting tanaman ya naman,
Magbayu ing sablang bage, miminang e apiadyan,
At anti reta nang tud mu,  a sadyang tune masican,
Obat ngeni cacalu ca, ing baston ya nang tatalnan.

At deta nang adwang mata, ding salamin ning catawan
Melabug at mapula la, cataratang parsalanan,
At meging calbu na ca pa, at lintu mapangalingwan,
Rugu meging Maclac capa, angga racang picacaylian.

Neng misan ing Asawa mu, madalas malmura na ya,
Uling eme papansingan, at mebating ing Romansa,
Itang sadyang gagawan mu, at machong magbidabida,
Cabud niya mu meganaca, Lupa namu ing Mimimwa.

Neng capitangan ning bengi, madalas cang mibabangun,
Mamalagwa cang lalacad, papulayi ketang cumun,
Carin ca pacantacanta, uling mangainipan na,
Angga niyang Urung at Sulong, eya lulwal ing punyeta.

Dapot agyang macanyan man, bista't ing bili matwa na,
Dapat tamung pasalamat king Guinung Dios Mayupaya,
Ing Mayap a Depatan mu, yamu ing kecang Pamana
Anti ing Lugud king Guinu, Tawu, at Mal a Salita.

Dacal lang lulugud king Dios, keti mabilug sicluban,
At parang tawung manwala king banal a cautusan,
Dapot king Amanung Siswan, itang sabing Capampangan
Ngeni rugu ot macanyan, dacal nu reng mengalingwan.

Agyang MATWA NA ING BILI, mabaya na ing catawan,
Itang lugud king Amanu, e menaliwa ditac man.
Nung tutung ala ng BUCAS, uling paralum neng Bulan...
Luid  na ning AMANUNG SISWAN, ya ing BUCAS a panayan.

Norwalk, CA