Ing Agila Ning Apalit, Pugad Nang Misnang Tibe

Pugue para qng Aguila ning Apalit, a y Poeta Laureado Int. Atty. Almario C. de Jesus
    mala-soneto
neng Irvin Harvey Rivera
    Siuala Ning Maliwalu/Anac Ning Baculud

Luid ia ing Aguila caring Poesia na
Pamangulis na qng mataram nang pluma
Ding sunis o dalit at ding balang letra
Macabie lang diua pangabalangcas da.

Silung! dala mu cung iterac ning angin
Gamitan mo retang bagius mu't magmain
Sulapo mu cu qng lele da ring batuin
Qng babo ning bigua't bulan anti mu rin.

Amuiutan mucu't dinan capaldanan
Caring poesia mung mamie capasnauan
Detang quecang dalit ume cong balican
Bang ing ligalig cu mapulid mung misan.

Luid ca oh Poeta Laureadu ning Sucad
Balen ning Apalit ia ing caiang Pugad.

Mig-reyna Ya'y Elnora v. 2

neng Amor a caputol na

Fiestang baryu Santa Cruz, balen na pu ning Masantol,
Mag labi yang walung banua, ing pangane cung caputol,
Anac pa mu ing bili cu, e pa meyaring "high school",
Estorya na ning pamilya, matula ming pagmaragul.

Dapot ating mepalyari, yti e mi acalinguan
At ustung mi-tagpu tagpu, madalas ming pisasabian
Ing Aile pu alang patad, alus manga-pali ke ngan
Lalu na pu y Elnora, e na buring pisasabyan.

Bengi na ning Coronasyun, sinake la ketang bangca
Uling ing bucud mung dalan, ytang mababu a Sapa
At agya mang tatacut ya, sinake ne y Elnora
Oneng e biasang manimbang, mitiab ya pu itang bangca.

Ing gulisac nang Elnora, mengasdan la ngan deng tau
Mecu keni supan taya, melumud ya'ing Reyna tamu
Ing consorte'ng y Eduardo, a maca piblas pang ternu
Linundag ya ketang sapa, segipan ne pung masulu .

Keng malalaguang salita, aliuang bangca re seke,
Maki-catig misnang tibe, at dacal nang mamantabe
E ne menaliling malan, coronasyun belaus de
Agyang merimla ing bengi, ytang timan e miwale.

Macanyan ing istorya na, pamag-Reyna nang Elnora
Deng anac na asnung tula istung acung mag-istorya
Disnan nang migit Otsenta, ketang tawling mig-"birthday" ya
Kecaming lulugud caya, angga ngeni, ya pang REYNA.

Elnora

See version 1.

Misnang Datun

Detang tugac at culiglig, ylang keca magtumayla,
At mamagus ytang danum, ketang mamatucbang sapa;
Ing bunduc na ning Alaya, babatyu yang misnang saya,
Cabang yca ketang duyan, gagale cang macakera,
Cayagum mo retang Pipit ketang cantores rang siwala ,
At ing angin a manene, king catawan mu mumuma,
Pepepen na itang pali, e ca lisangan bitasa;
Alang asuc a mabuluc, O Smog a macasira,
E ca manakit saken, misusuglulu't masigla
Misnang datun ing paligid, alang mangulung bitasa,
At alang manutus keca, mamipi ca ketang batya,
Anti ya mong paraiso, ing madicut a taldawa.

Amor de Jesus, Pirate :)

Mina

Amor de Jesus with Mina Tahayeri

Madalas pin ustung Misan, obat e apanginlagan
Asasabi mung catutuan, agyang buri mung Pigilan.

E cu sana pu mimimua, keng cacung pamagsalita
Ligaya na nining Bie cu, ing adinan da cung Tula.

Babye cu ing panlalawe, keng Matas yung Pangatau
Larauan na nitang Leguan, king Timan asna na Yumu.

Nung keng Beluan e mitawli, Mapiang asabi mung dili
Pamanyaup parang tau, mumuna ya e mitawli.

Anya naman bandang Portland, keng Aguman Capampangan
Meging Pamuntuc ya'y Mina, king sipag na at cagiwan.

E yu sana tutucnangan, ing lingap yu king Balayan
Pati na Salita tamu, ing Amanu tang Beitan.

Mina Tahayeri, Aguman Capampangan, NW USA

Artesia, CA USA

Pamicalugud King Amanu: Abe Abe Capampangan

Pamicalugud King Amanu (v. 2)

Itang yumu at lasa na,
binasa cung cawatasan,
Macabie yang capasnawan,
kening mainang caisipan,
At agya mang mengupas na,
ing lugud ta at panandam ...
E pa murin menaliwa,
pamagdulap tang cabiasnan.

Pilit da lang papagaral
detang aliwang Salita,
Mumuna ne ing tagalog,
Inglish, arabu't, castilla,
Deting Sabing pinili da
yla canung maulaga,
E na balang calinguan ya,
Ing amanung beitan da.

Ytang Amanu tang sisuan
yan ing tune pacamalan,
ABE ABE KAPAMPANGAN
ya ing dapat tang tuntunan,
Lalam ning pamicalugud
ytalacad ya ing Aguman,
Misammetung tamung panig
LUWID YA ING KAPAMPANGAN.

Amor, P.L. with RBA, Ari ning Parnasung Capampangan

Artesia CA
See other versions of poem: v. 1 | v. 3 | v. 4

Piesta Ning Baryu Sucad, Parangal Cang Sta. Lucia

Malaus co pu, nganang, Amor de Jesus

Malaus at Lungub co pu, salamat king panyatang yu
Piesta na ning Baryu Sucad, ya ing pagmasusian tamu
King Pasalamat at Tula, pamanantabe ning Ginu
At cang nuan a Santa Lucia, Patrona da ding Devotu
Balang banua pagmasusian, no ke man dane ning Yatu
Ing panata mi king Santa, capilan man e magbayu.

Deng ca-baryu mi pu Sucad, e anti mung Capangayan
Tapat lang lugud king Ginu, tune casalpantayanan
Dacal la reng memagaral, mesalese paintungulan
Ating doctor, abogado, madre, enhiero at maestru
At ding "OFW's", mendaywan keti king Yatu
Lalu keti America, at labwad da ding Arabu.

Dapot agyang licwan miya, ing baryu ming pacamalan
Dit man e mecu king isip, ing ugaling acagisnan
Anti ing pamag-masusi, Disyembre trese'ng daratang
Baryu Piesta na ning Sucad, parangal cang Lucia'ng Nuan
Y Luciang sinacwil bandi, dalagang miningat puri
"Nuan ca pung alang anti, caring lupa mung babai".

Ding Hermano'ng menatagan, canacu ing pasabi da
Malugud dang Pamananggap, pisulwan ta ing anda ra
Yti gewa rang panata, gagawan dang misnang tula
Magpiesta la't pasalamat king Dios at Santa Lucia
Salamat pu! Salamat pu! at milabas ing pabanua
Anya ngeni pupusan ke, ing cacung pamagsalita
Ketang mapuri nang Gosu, ning Patronang Mal a Santa:


    Bapu malugud a Santa
    Patulunan ming Debota
    Malagung Santa Lucia
    Ipanalangin mu ke sana.

Zon Pablo, with Sta. Lucia

Sta. Lucia, Sucad, Apalit, Pampanga

Artesia, Ca. U.S.A.

Ing Lasa Na Ning Sinta

Capampangan Version of Sabor A Mí.

Malwat ta mu ring pisulu, ing sinta mu at sinta cu
Ding pusu ta at caladwa, micanlapit lang talaga
Anya naman atacman cu, ing yumu na ning lasa mu
At balu cu ing lasa cu, alasa mu ing yumu na.

Nung sacaling ylingad mu cu, meging cayabe keng bie mu
Lumapit cu mu rin keca, pangawlan at paswala cu
Dacal a dake nining bie, mibye at meging dake na
At e mu na alingad pa, ytang alasa mu na cu.

E cu naman buring sabyan, ing yca bandi ra na ca
Uli rugung ala cu mu, ninu mu yacu keca
Nune babye cu ing mayap, O ytang peca mayap pa
Ytang lasa na ning sinta at yumu ning panalala.

Dacal pang datang a bucas, libung banwa ing lumabas
E cu balu nung ing Sinta, dasnan na ing alang angga
At calupa na pin ngeni, kening asbuc cu dadala
Ing lasa cu at lasa mu, cabang ating cung inawa.
Sabor a mi!

E cu naman...

Amor and Daisy

➡ see original in Spanish.

Litratu Ning Milabas

1941

Babalican ing milabas, e na rugu mibalic pa
At saca ca pasalamat, ketang Mayap a binie Na,
Ytang timan a capurit, ya ing mamantabe keca,
Cabang deng kecang litratu, maluluma no itsura.

At ing sangcan mipaskil la, e cu bisang macalingwan,
Uling malwat na ping tutu, milaut cu at mindaywan,
Detang casising-anac cu, e ra na cu atandanan
Anya naman kening Face Book, malugud cu lang balican.

Nung sacaling buri ning Dios, e na cu macapagbalic,
Kening lugal America, keni na cu manahimic,
Pilitan cung ipatad pa, ing alalang mipnung sabic
Carng angin a marimla, at uran a atic atic.

Caretang cacung capatad, cacuyug at capanalig
Meging dake na ning bie cu, ketang lugud a sasagid.

Istoria De Un Amor (Pamanlala)

Nung atatandanan mu pa, mag-babaintau cata,
Deng dalaga ketang baryu, maglame la pang lalala,

Lalam bale ating papag, masaya lang abe abe,
Cabang itang baintau, ligid ligid lele lele.

Macanyan tang mamag lolo, paralan ta na keng lawe.
Sangcan ta mung papaturu, pabulung bulung manene,

Anya naman ditac ditac, mebiasa cung diga diga
Calabas ning paru-minggu, tinangu ne ing dalaga,

E mu itang pamanlala ing abulu cu canita.
Itang pihican cung pusu, migising ya at milsinta,

Ing Istorya de un Amor, nitang cacung cayanacan
Angga ngeni timan timan, potang cacung babalicdan.

Inyang misan minuli cu, migpasyal cu king baryu mi,
Ala nang lalalang cupya, at maglame istung bengi,

Deng bayung tubung dalaga, alus memandaywan na la,
Pamanlalang keragulan, licwan da na at ala na.

Larauan

Macananu cong capcapan, tunggal tungal a pilinan,
Deng amanung macabage, keng santing na ning Larawan,
Ing timan a acakit cu, ababacas ing panandam,
Adwang pusung micalugud, king ligaya macaduyan.

Alben miya mu ing litratu, agad agad mung abalu,
Ing sunis dalit ning pusu, macayama lang mag-dwetu,
Itang tula ampon lugud, caring labi abasa mu,
At detang matang mapungne, anti la mung mangalalu.

Anti lang Eva at Adan, mipalsinta ketang Eden,
Pati bawal a tanaman, pisulung misna canyaman,
At matula dang arapan, maski na'y tang bibitayan,
Nung mi-abe la ping adwa, angga na king capupusan.

Ing larawan na ning bie yu, ingatan ya't pacamalan,
Maging bacas kecong lacwan, e na matda capilan man.

Amor and Daisy

Pamagsane

Misane na cang misane, careng sunis a dalise,
Detang salitang meumis, bubugnus mung misnang kinis,
Bisa cu sang maki-agnan, obat e cu macatagal
King bilis ning panyulung mu, at ali ca mapapagal.

Mitais ya ping mitais, ing Lira mung misnang tulis,
Anya mayan mung a yatsit, ding amanung sasagitsit,
Deng Bersadang pasulapu, mabilis la pa keng cwitis,
Potang misalbag la babu, macawili lang acakit.

At deng Temang pipilinan, calalam da cabaldugan
Nung wari sa ketang dagat, calalam mu pisungaban,
At ita namang catasan, lalampas la pa king bulan,
Canita me pa abalu, nung nanu ing buring sabian.

Detang Rima at Amanu, ketang Sucad tutuklu la,
E na lumwat O Poeta, Lauredu cang makilala.

Sonneto, Aug. 25, 2012

Inspiradu

E Cu balu at nung bakit,
inspiradu cung masyadu...

Agyang era ca ikit,
at ala ca king siping cu,

Nanu cayang gayuma mu,
careng poetang abe mu,

Alben da ca mu litratru,
apapalwal da ing bersu.

At lalu na pa siguru,
nung ati ca arapan cu,

At akit da cang titiman
cambeng mapunge mata mu,

Anti na cu mung Poeta,
babo na ning entabladu,

At ica mu itang Reyna,
a purian cu careng bersu,

Nanu la cayang amanu,
pangapcapan king isip cu,


Bacung masampat asabi,
macabage king leguan mu.

At midinan capaldanan,
ining malsintang pusu cu,

Damdaman mu itang pali,
sisilab keng caladwa cu,

Alang binit lalagablab,
kilub na ning cacung salu,

Midinan mung capasnawan,
nung ibie me'ng kecang pusu.

ACJ: Crowning of Poet Laureate, Sept. 2009, Portland OR

Pabanua Na

Malwat na cung batyu batyu, ketang awang ning Parnasu,
Panenayan keng panyatang, nitang gagalang cung Maestru,
Kilub ning pabanwang wewe, linaut ya at mindaywan,
Ing silid na king Parnasu, babanten ke't lilinisan.

At ngeni pin, migbalic ne, anti ya mung balikbayan,
Magdala yang pasalubung, king Parnasu na yayampang,
Agad agad sinabit de, ketang dingding ba yang lawan,
At dacal lang mecuswelu, at buri deng paciapusan.

Anting alagad ning sining, aliwa cang dumiscarte,
Balang manibatan keca, anting obra maestra'ng lawe,
Ding ginulis mu king telon, anting lelangan ning Guinu,
Mayayakit itang calam, keca binie nang talentu.

Deng poemang mibalangcas, ababasa ing lugud mu,
Ketang Amanu tang Siswan, a abe mung anting tau,
Neng simen mu reng amanu, at ibugnus keti'ng yatu,
Cawatasan lang menibat, lalang Poeta Lauredu.

Mag Biba la reng abe mu, ketang binie rang dangalan,
Mekilala ca ping MOKA king labwad ning Capampangan,
At deta nang ginulis mung, litratu ding mamuntcan,
King capitulyu Pampanga, pacasabit lang hang-ngaan.

Anya ngeni king Parnasu, dagdagan la ding ipaskil mu,
Neng mitais ne ping ustu, ing pambihirang pluma mu,
Uling dening cayanacan, bisang mabiasa king bersu,
Emu sana paimburisan, ytang mayap ituru mu.

Paeng Maniago

ACDJ, Rolando Malit and Paeng

La Dolce Vita (Biskote)

La Dolce Vita ngara pin, manyaman ya ing Biskoti,
Lalu na nung asnang pali itang inuman mung Cafe,
At saca ca timan timan uling alalasa meng tune,
Detang semada at mamun, keta na lang lele lele.

Salamat Cacaluguran, mesaya ya ing pascu cu,
Careng regalung tinggap cu, buri keng dili'ng kecayu,
Ing Biskote aliwa ya, lalu nung bucal king lub yu,
At detang taung didinan, pasalamat la kecayu.

The Sweet Life ya pin keng Inglish, Ing Bie asna ping canyaman,
Lalu keti California nung dacal ca caluguran,
Detang keca maki abe, tapat alang ca-plastican
At keca Gay at Mang July, tinggap yu keng caluguran.

Pasalamat cu kecayu, masayang Pascu Ning Dispu,
Pangadi cung mantabe ya, pagcalaman na cu ning Dios
Maging tahimic ing bie yu, busal ding aduang anac yu.
At nung cailangan ing saup, mutus cu pu at ati cu.

Amor at Daisy

Ing United Pampanga Leaders Council v. 3

Ing United Pampanga Leaders Council, U P L C 'ing mibansagan
Mitatag ya California, Aguman de deng Pampangan,
Labi'ng ualu ing Enero, 1998 ning banwa,
Yang aldo nang kebaitan, U P L C misapwac ya.

Adua lang pulu ding balen, adwang ciudad king Pampanga,
Canya canyang association, keti na king California,
At deta nang labing pitu, ila retang menimuna,
Deng Pamuntuc at Lider da, masaya lang megumpisa.

Chito Mandap ning Minalin, yang mepiling mamuntucan,
Subuc ne king panugali, pamaki-abe't tenacan,
Eya mapagmatas matas, mababa ya pilubluban,
At tune neng caluguran ing labwad tang Capampangan.

Busal ning pamisagsagan, mica maulagang sangcan,
Destiny ning UPLC, miniral ya at yang ticyan.
Lalam ning pamisangmetung, at panamdam maca balen,
Telacad de ing Bandera, lugud king labwad a tibwan.

Ing mumunang parasan na, mipaniaup, midamayan,
Mamantabe at sumuyu, careng Balen'ng mangailangan.
Pante pante itang lawe, ala itang mangabiran,
At ing sabla dumalan ngan, Caburian ding keracalan.

Pilan nang banwang milabas, keta Pampanga gewa na,
Ing Computer Learning Centers meging minunang Project na,
Dacal la retang computers caring Balen mipamie la,
Capitolyo at ding Balen, mikiabe keng programa.

Mig Medical Missions la pa, ketang tune pamaglingap,
Detang Doctor at Dentista, memanulu la ping ganap.
Memie dacal a panulu, pamangan at grasyang sapat,
Deng midinan asnong tula, mangapalwa'ng pasalamat.

Y Birhen De Los Remedios, Mal a Patron ning probinsya,
Balang bulan ning Septiembre, pagmasusian ing aldo na,
Akit me deng UPLC, gugusal, lilibutad la,
Keng Nobena't Salpantaya, Pamagsaya at Programa.

At nung ating Dalo naman, O magpasyal California,
Caring matas manungculan Malacanang at Pampanga,
Anti mu ing Gobernador, Obispo't Presidenti pa,
UPLC yang pupuge, biasa yang tanggap bisita.

Careng Fil-Ams Associations, madalas ing asabian da,
Prestigious Organization ing UPLC carela,
Uling e magbida bida, ala itang "compitensya",
Pamakiabeng marangal caring sabla yang gagana.

Monomento nang Gat RIZAL, king Carson talacad de ya,
Miyaliwang manungculan, ing "ground breaking" tinagun la,
Pati Mayor, Consulado, JPRMM, Fil-Ams pa,
Abe na ning UPLC, king Filipino idaun ya.

Aldo ning annibersaryo, alus labing atlung banwa,
Detang meging Presidenti, Pasalamat, Panalala,
Chito Mandap, Tito Barin, EdTrovada, Philip Gueco,
At adwang gamat yang supan, Pres Ed Ronquillo.

Cacuyug king UPLC, Capanalig a Pampangan,
Abe abe, misanmetung, ing buclud pacatibayan,

U – uling ing Dios yang mumuna...
P – pati Balen tutuki na ...
L – lugud king para tang tau, lalu caretang cabalen...
C – catuliran, catalawran, yta ing dapat tang tucian...

Luid ya ing UPLC; Luid reng Capampangan;
Luid ya ing Pilipinas, Pampanga't Amanung Sisuan!

See version 1 (graphic, 2009); version 2 (text, 2009).

Ing United Pampanga Leaders Council v.2

Neng Almario "Amor" C. de Jesus, P.L.
UPLC Charter Parliamentarian/Director

United Pampanga Leaders Council, UPLC ing aus da,
Ing marangal a aguman, mitatag ya California,
Labing walu ning Enero, 1998 ing banwa,
Yang aldo nang kebaitan, UPLC misapwak ya.

Adwang pulu't adwang balen, keng mabilug a Pampanga,
Ting sariling "association" estadu ning California,
At deta nang labing pitu, yla retang megumpisa,
Deng Pamuntok at Lider da, masaya lang menimuna.

O'bat caya mentun dalan, mica maulagang sangkan,
Destino ning UPLC miniral ya at yang tikyan,
Lalam ning pamisanmetung, anting tune Kapampangan,
Telacad de ing bandera... lugud qng labwad a tibwan.

Mumunang pake na yla, ing mipapanyaup la ngan,
Mantabe la at sumuyo, ninu man'g mangailangan,
Caring abe abeng balen macasadya dang damayan,
Pasalamat, alang libe, e da man rugu panayan.

Ing Computer Learning Centers, projectu na qng Pampanga,
A maigit lang atlung dalan a "computers" mengapamye la,
Capitolyo at ding balen, mekisanmetung programa,
Libring pamagaral/training, ketang pamangabyayan da.

"Medical Mission" gewa na, ketang tune pamaglingap,
Detang doctor at dentista, memanulu la ping ganap,
Memye dakal a panulu, pamangan a grasyang sapat,
Balang metung manga-palwa, qng tula at pasalamat.

Nung qng kasalpantayanan naman, UPLC modelu ya,
Nobena cang Birjen De Los Remedios, ya pa ytang menimuna,
Balang balen a cayabe, tinuki at mig-debocion la,
Siyam a Sabadong nobena at lamac cang Birjen Maria.

Deng manibatan Pilipinas, at Pampanga'ng mamuntukan,
Sasalubungan na la ngan, masaya nung suportaan,
Obispo at Governador, Presidenti estimaan,
Masipag yang makirungut, at ali ya mangabiran.

Ing UPLC aliya mag bidabida o maki-pagkompitensya,
Pamakiyabe'ng marangal parang tawu yang gagana,
Deng Fil-Am a associations, UPLC modelu ya,
"Prestigious Organization" ing UPLC karela.
Mi abe abe mipapanyaup... matibe buklud ning lugud...


U   P   L   C

U - ling ing Dios yang mumuna...
P - ati Balen cayabe na...
L - ugud parang tawu caring cabalen lalu na...
C - atalawran at Katuliran, careng egana gana...


Luid ya ing UPLC; Luid ya ing Pampanga;
Luid la reng Kapampangan at Luid ya ing Amanung Siswan!

See version 1 (graphic, 2009); version 3 (text, 2011).