Larauan

Macananu cong capcapan, tunggal tungal a pilinan,
Deng amanung macabage, keng santing na ning Larawan,
Ing timan a acakit cu, ababacas ing panandam,
Adwang pusung micalugud, king ligaya macaduyan.

Alben miya mu ing litratu, agad agad mung abalu,
Ing sunis dalit ning pusu, macayama lang mag-dwetu,
Itang tula ampon lugud, caring labi abasa mu,
At detang matang mapungne, anti la mung mangalalu.

Anti lang Eva at Adan, mipalsinta ketang Eden,
Pati bawal a tanaman, pisulung misna canyaman,
At matula dang arapan, maski na'y tang bibitayan,
Nung mi-abe la ping adwa, angga na king capupusan.

Ing larawan na ning bie yu, ingatan ya't pacamalan,
Maging bacas kecong lacwan, e na matda capilan man.

Amor and Daisy

Sinalibatbat

Mi salibatbat ya'ing Ginu, anting metung a sisisi,
Pemarug at pemalasbas, catawan na menga gisi,
Ing parusang pengawa ra, caren yang macasalanan,
Mapanaco, maca mate, a sidsad na king carocan.

Dapot sabla pibata na, uling buri nang tuparan,
Miligtas la detang taung, a tutu nang pacamalan,
Ya na pin itang menatbus, para cacu at keca man,
Nanu ngeni ing yablas mu, o taung macasalanan.

Ing lugud a pepakit na, casakitan a delanan,
Dinan ta mung cabaldugan, ing lasa na at parasan,
Kilalanan ta't tanggapan ing lagyu na at caharian,
Uling yamu ing tune dalan, ketang Ibpa tang sasamban.

Silwac na itang daya na, ba tang miligtas king sala,
Peca mayan a gawan mu, ing mabie ca king uli Na.

Sto. Cristo del Perdon

Artesia CA USA

Marso Na Ning Banua

cang Zeny Santos Fallarna, ning baryu Cansinala, Apalit, Capampangan

Ing bulan ning Marso, tictac ya lisangan,
Careng capatad tang, lupang capampangan,
Dapot istung Marso, carin da gagawan,
Capangan inuyat, a sobrang linamnam.

At andat sali cu, Ot agaganaca,
Detang nang pengari, malwat nang mewala,
E cu apigilan, ing tumulu cu luwa,
Uling ing Inuyat, caburi nang IMA.

Palengke Apalit, dacal sasaliwan,
Ating tamarindu, manyaman sipsipan,
Gumiling cang abias, ita sang lacatan,
Samutan meng gata at saka panotsa.

Ngeni meranup cu a "miss" daca Ima,
Marso ya ing bulan, nucarin ca INDA?

O Art, A Poeta

Canitang itang idad cu, casibulang anti keca,
Bural bural cu pa salu, at masyas ing talacad ta,
Detang poesyang bubugnus ta, king sinta alang capara,
E la dosenang diosa apalasing king ligaya.

At neng dudungdungan cu la, deng poema mu Poeta,
Macayama lang pilasan, deng amanu mu keng sinta,
At saca cu timan timan, babalicdan ing delanan
Anti mu acu i ArtDax, poeta ning Capalsintan.

Talaga yatang macanyan, ing mabibye keting yatu,
Ing ngeni meging bucas ya, ing bucas meging napun ya,
At ing sabla anting agus, nucarin ing pulayi na,
Manenaya ya ing dagat, caulan at alducan na.

Anya ica o poeta, keng edad mung casibulan
Samasan mo sanang itanam, deng amanung capalsintan.

Pakibat a poema king Dutung Ning Abak nang Art Tolentino.

King Kebaitan Mu, Danilo P. Danganan, D.M.D.

Dane San Vicente, balen ning Apalit
Anac a Danilo, carin de pin beit,
Nay ne'y Apung Epang, Bonnie ya ing tatang,
Ing apilidu ra, Payumo, Danganan,
Lugud ing penese, yang acaragulan,
Oyan naman ngeni, lintu yang magalang.

Pamangadi king Dios, e na cacalingwan.

Dentista yang tune, profession ning bie na,
Ayari nang cursu, meging balita ya,
Numan king Pampanga, serbisyu gewa na,
Ganap yang gugusal, e lalun ing pera,
Anya meging swerti, misis na doctora,
Ngeni at apat la, ding meging anac da,
Apo na adwa la, di Dustin at Jordan,
Niya caluguran, aldo mung beitan...

Iyabut mi ing Happy Birthday!

Luid ca, Dan Danganan,
Oyni ing pangadi
Virgen mantabe ya,
E ca mangalingwan, pasaup ta Caya.


Metung ca caretang, dapat kilalanan,
A masyas a pader, ning balen tang tibuan,
Maca aliwa ca, careng caluguran
Maski nanung horas, mayan cang lapitan,
Ala cang caymutan, alang cabastusan
Pagmaragul daca, Dr. Dan Danganan.

Pakibat nang Dan:
 
Bayu ing sabla ipayabut ku ing pami salamat king kekang gunita quing aldo ning kakung kebaitan.  Kabang babasan ke ing "Poesya" mung belangkas maka pariquil kanaku, linub king kakung kaisipan ing mengalabasan kung bie nung makananu dakung peparagul ding pengari at pemula't ing lugud king Diyos, Pamilya't, kakaluguran at quing sociodad, makanyan munaman ing importancia ning education.  Iting eganaganang bague a iti yang megsilbing sandata para talakaran ing nanu man pagsubok king bie.  Metung kung karangalan para iyabe, kareng kekang kakaluguran at pagmaragul.

Pulosa

Aba dinatang ya i pari cong Tony
Abe ne i misis, a talagang seksi,
E ta na magtaca, at pagmaragul na
Bigoti nang Tony, ilang puhunan na.


Basultung tiru nang Inda cu:

O caca o caca, mibata ca sana
e na man masakit ing alang asawa
nung macatupa cang maruc a conducta
maglate ca gulut manuling ca lupa.

Ing pamacyasawa adwa ing payul na
tula at saya nung sana tumud ya
dapot nung ali ya, magcacasakit ca
Caba na ning bye na.


Basultung Canacu:

O caca o caca, e cu na abata
ing magdili dili at alang asawa
Lalu na neng bengi macabaluctut ca
canita cailangan ing ating asawa.

Uran Neng Abac

Ing ditac a patac
Ning uran neng abac,
Caretang tanaman, macabye ligaya
At detang Sampaga, meging sagiwa la
Ding bucu ning Rosa, memamucadcad na.

Tanaman a dutung
Mamutat la sana,
Ngeni laltu la ngan bulaclac nang bunga,
Itang Pinanari, ginulis king banwa
Anting paganaca, ketang pengacu na...

Ing Yatung liguran,
E na ne palbug pa;
Anya mibangun ca, saganan ing uran
Basan meng catawan, midayu'ng lisangan
At pacyalungan mo ring anac king dalan.

Manyaman ing patac
Ning Uran neng abac,
King galtung a gabung menga bitac bitac,
At ding Ortelano, tula da't sagacgac,
Cabang magpastul la, babo reng damulag.

Dutung Ning Abac

neng Arturo "artDax" Tolentino, P.L.

Dutung ne ning abak, matatag, matibe
keng pun nang pitamnan dicut kukulate
painturu ya babo e cabud kikimbe
tataba yang lalu nung paka sesen me

Tikdi ya talakad neng midiligan ya
Keng mapaling ambun menibat king banwa
Akit meng sagiwa itang katawan na
Layun lang magladlad bulung na king sanga

Nung anak y'ang dutung, mapinu ya balat
Misagkiran ya mu agta na kumulat
E ya kararagling dungdung at malanat
e sumuku agyang keng angin abagat.

Karas na ning bengi dagul ya mung ditak
Ena kalupa ning kabuklat ning abak
Kaslag na ning aldo masikan yang palak
Keng delubyu’t bagyu e kabud mibagsak

Dutung na ning abak pag tumaila ra ka
banaba ka waring malabung, masanga
memayutputan kang manyaman a bunga
Pipagsalilungan da ring mipalsinta.

Pekibatan neng Amor de Jesus king poema ng O Art, A Poeta.

Amanung Casangguni, "It"

Obat e ca magcasakit
Anti ca mung pupulandit,
Susulat cang alang binit
A amanung sasalitsit.

Agyang malagad cang ackit
Ot dacal a apupuslit,
Salita mung mang-galigit
Kening isip cu cacapit.

Anti cung Hapon a singkit
A babasang pikit-pikit,
Potang basan cung malapit
Manggatal ya ining buldit.

Damdaman cu neng mamaplit
Bisa neng lumwal ing buysit,
E me apigil i bagsic
Anya ngeni na cu mag-quit.

Puge King Malagung Dalagang Baryu: Dolly Gigante Ferrer, P.L.

Macayama yang puge mu, Don Fernando'ng Architectu,
Ketang dalagang malagu, pibuburian da king baryu,
Anting baintaung taring, papasiag ning kecang pusu,
Matimtiman ya mang birhen, tangwanan na ing diga mu.

Dapot ngeni aliwa na, parehu nang talasawa,
Angga ta na mung mamuri, ketang idolu tang maestra,
Keca yang kikilalanan, cagiwan nang mamicudta,
Poetessang Capampangan, lauredu ya pang poeta.

Itang aske na at asal, dalagang baryu canita,
Ya pa murin itang sadyang ampangan da keng sinta,
King pangimut at itsura, magtaca ca e ya metwa,
Malagu ya pang lalawan, tula da ding kecang mata.

Metung ya ping talaturu, gagalang da ketang dapat,
Caring anac a magaral, modelu yang misnang sampat,
At nung sana malyari mu, ibalic ta itang milabas,
Baintau ca king baryu, a sisintang alang cupas.

Pota ngening matudtud ca, y Dolly ing paninapan,
Pasyalan yu itang linang, magpainawa lele cwayan,
At carin mu ngan manene ibulung ing capalsintan,
Anya mu pin mimingat ca, Magbante ya pala'y Tatang.

P.L. Dolly Gigante Ferrer

Farewell Of Caca

Alegria de Jesus Catacutan, R.I.P.
English version
by Amor C. de Jesus

Caca made her farewell, they already fetched her,
To that solid new home as her destination,
A house so beautiful, it fits her very well,
As a gift from heaven, for her to stay and pray.

As her life in this world, she has that experience,
Life is full of hardship and also much patience,
But she did not mind it and accepted it all,
And she had no regrets, and nobody to blame.

To father and mother, with so much love and care,
She shows fidelity, true love so pure to her,
And so with her siblings, she is the kind keeper,
To her nephews/nieces, she took good care of them.

And during lenten seasons, I remember so well,
With her beautiful voice, which I really enjoyed,
Reads and chant the Passion, with so much devotions,
And singing the high notes, so much pleasure to all.

And, we her own cousins, she treats us so kindly,
She shows no such envy, hatred, ire or anger,
Every time she sees you, she meets you with a smile,
Even on her last money, she gives it so gladly.

And so Cacang Angging, we will not forget you,
Deep here in our hearts, there is a place for you,
As you go to travel, to that far distant place,
The peace that you deserve, forever be with you.

All of us pass this world, there is no other way,
Like a pearl of teardrop, that flows on your breast,
Similar to a leaf, dries, detaches and falls,
Then it goes to the ground, before making its way...
TO HEAVEN.

Alegria de Jesus Catacutan, RIP

Artesia, CA USA
See Capampangan version.

Memun Ne I Caca

Alegria de Jesus Catacutan, R.I.P.
Neng Amor C. de Jesus

Memun ne y Caca, pepa dakit da ne,
King bayung tucnangan, carin ne pin ume,
Bale misnang santing, caya macabage,
Anting Calam ning Dios, malugud nang binie.

Meging bie king Yatu, a cayang delanan,
Dacal casakitan at capibabatan,
Dapot ala caya, sabla tinggap na ngan,
Alang parsalanan at alang sisisyan.

Caring pengari na, meging panlalawe,
Pepakit nang lugud, tapat at dalise,
Angga ring Capatad, liguran nung tune,
At deng pangunacan, liningap, sinese.

At istung Maleldu, e ke acalingwan,
Bosis nang malagu, tutung pangawilian,
Mamasa yang Pasyun, mipmung cabanalan,
Gege nang matarling, masanting damdaman.

Kecaming pisan na, misna ya ganaca,
Ala yang caimutan, e ya biasang mimwa,
Istung ackit naca, salubung na'ing tula,
Agyang yang pera na, babye na pang cusa.

Anya cacang Angging, e ca macalingwan,
Carening pusu mi, ti ca macasimpan,
At king paglacbe mu, aliwang balayan,
Manatili keca tutuc mung canwanan.

Macanyan lalabas keti babu yatu,
Perlas luwa'ng tinulu, mebaldug king salu,
Calupa ning bulung, melanat, menabu,
Muli ya king gabun, king banwa painturu.
Mamun na cu naman, o Caca cung Angging.

Alegria de Jesus Catacutan, RIP

Almario "Amor" C. de Jesus, Artesia, CA USA; puge at lugud na ning metung a pisan king pangawale nang Cacang Angging.
See English version.

Pamagsane

Misane na cang misane, careng sunis a dalise,
Detang salitang meumis, bubugnus mung misnang kinis,
Bisa cu sang maki-agnan, obat e cu macatagal
King bilis ning panyulung mu, at ali ca mapapagal.

Mitais ya ping mitais, ing Lira mung misnang tulis,
Anya mayan mung a yatsit, ding amanung sasagitsit,
Deng Bersadang pasulapu, mabilis la pa keng cwitis,
Potang misalbag la babu, macawili lang acakit.

At deng Temang pipilinan, calalam da cabaldugan
Nung wari sa ketang dagat, calalam mu pisungaban,
At ita namang catasan, lalampas la pa king bulan,
Canita me pa abalu, nung nanu ing buring sabian.

Detang Rima at Amanu, ketang Sucad tutuklu la,
E na lumwat O Poeta, Lauredu cang makilala.

Sonneto, Aug. 25, 2012

Pamanayang Panalangin

E mesayang unabis man, ing canacung pamanaya,
Cayantabe panalangin, pepalwal me ing poema;
Mipasnu cu pilubluban, pati na cacung caladwa,
King banal mung panalangin, at santing na nitang tema.

Anti cang susulat Biblia, careng salmo at casebyan,
Pepakit ning kecang diwa, tune casalpantayanan,
Detang amanung pisiag mu, e la keca menibatan,
Uling penalig mu Caya, nung dimut mu ytang belwan.

Nung idalit da reng Anghel, deng rima ampon ing bersu,
Keng Metung a Panalangin, pematulan de ing Ginu,
Uling ken ya mayayakit, casalpantayanan tau,
Midayu ing cagutgutan, at tajimic ya ing Yatu.

Marana tha'ng panalangin, o panyatang Ginung Ari,
Talacad neng Caharian na, at carin ta dapat Tuki,
Milaut ta ketang tucsu, bang e ta muli king Api,
Mipamintu ytang lub Na, ketang sablang cayang Buri.

Yanasa!

See version 2.

Sapatos Nang Tata

Nung akit na la mung Tata, detang sapatos mu ngeni,
E la mu adwang dosena, macapila keng estanti,
At nung abalu na caya, nung magcanu'ng presyu da,
Ing pupul na keng pabanwa, e macagyung panyali na.

Ketang kecang cayanacan, ginale ca keng escwela,
Detang sapatos nang Tata, ila rugung peparam na,
Anya agyang Poeta ca, pasalamat ca cang Tata,
Mibabata na cang tiru, maging macudta ca sana.

Masaya ya ing Tatang mu, ketang maluca nang bili,
Meracal na ca sapatos, tengalan da ca pang Ari,
Ing sapatos a pepasulud, e me sana cacalingwan,
Iti bacas ne ning Tata, king anac nang pacamalan.

Anya salamat o Tata, dacal cu abalu keca,
Cawatasan a tiru mu, tinubu at memunga la.

I Rizal

Y Jose Protacio Rizal Mercado Alonzo Y Realada, Aldo Ning Junio 19
(original title)

Calamba,Laguna, metung a Penganac,
Banuang 1861 canita Misapwac,
Cang Teodora Alonzo, ing metung a Anac,
A pepakit lugud, king gabun ning Abac.


Ketang cayanacan, Megaral, Mipalad,
Canita na lintu, tagle Abilidad,
Pilosopia't, sulat, pamanulung ganap,
Nobelang Protesta, canita pengapcap.


Ding Noli at Fili, yla ring Panlaban,
Ketang carocan da, ding Mapanalipan,
At caring Cabalen, carela Linadlad,
Ing biling Busabus, sarili dang Labwad .


Deta nang Nobela, ylang meging Mitsa,
Ketang Bagumbayan, Martir miragsa ya,
Keng panga ragsa na, Tinalacad neman,
Andres Bonifacio, at ding Katipunan.


Detang pobreng Indio telan do ring Palang,
Penga-bac, pengisi, cedulang Tatalnan,
At e la tinucnang, Migalsa't Linaban,
Cabang e migbabu, itang Catimawan.


Inya ngeni'y Rizal, lalun deng Bayani,
Ing panga-Martir na, dangal na ning Lahi,
Pagmaragul taya, itamung Comanggi,
Aldo nang Beitan, Aldo na ning Daji.

Panenayan Da Ca

Keng pamandayu na, ning sintang casuyu,
Anti neng migpaldas, ing kikiac cung pusu,
Ding balang pinandit, ning bili cung bigu,
Panan cu ing aldu, magbalic ca rugu.

Ngening ala na ca, dili cung malumbe,
Ing lingus ding mata, anting tagulele,
Neng benging tahimic, tudtud paintunan ke,
Caratang ning abac, e na mitiwase.

Lacwan dasan mu cu, king sale  candungan,
Buri cung isipan, dit man e mu licwan,
Nu ca man mipadpad, nanu mang cabilian,
Ika, at Ika mu, dili cung palsintan.

Anya mibalic ca king Indu mung Tibwan,
Manaya ya keca, ngeni't capilan man.

Y Mely G. Catacutan

Y Mely Gatbonton Catacutan,
Sapni nang Maria Sinucwan,
Mibait at meragul ya,
Tibis ning Bunduc Alaya.

At king aus na ning sinta,
King Apalit mipadpad ya,
Meging calma ne'y Rodolfo
A apu nang Panday Pira.

Oneng e la mipaindatun,
Ing buri da maglacbe la,
Mig alsa balutan la,
Miparas la America.

Misan a benging marimla,
Ketang tudtud mipacde ya,
Ginising ne ing Lira na,
At linalang yang poema.

Metung a Paninap, mumunang Poesia,
Dilang Maingat, yang cadwang gewa na,
Dacal pang tutuki, lalcas king isip na,
E ta mangainipan, panenayan tala.

Pamagaral King Literatura

Agyang nanu yang aguman, alben mu deng manimuna,
Nanu mu ing parasan da, ot cailangan tucyan mu la,
Ity caya macacayap para kacu, para keca,
O mag bural bural la salu, balang makilalang biasa.

Alben yu ing maliliari king labwad ning Capampangan,
Ditac ditac ing Amanu, milelele, mecalingwan,
Istorya, literaturang at culturang pagaralan,
Abilang mu keng taliri detang bisang manigaral.

Ing Parnasung Capampangan, capamilatan ning Ari,
Papasiag na ing pake na, agiagan nu ring cacampi,
Pamagaral literatura, at culturang Capampangan,
Abe abe tamung lungub, dagdagan tamu ing belwan.

Luid ca Renato Alzadon kening masanting mung pake,
Itang tenacan mung tagle, ituru mu cami at idake,
Samasan me ing "Lesson Plan" caring kecang estudyante,
Bang ing baleng pagaralan, luban miyang mitiwase.

Renato Bonus Alzadon, Ari Parnasung Capampangan

Dagdag, 2016-04-16:

Pami-abeabe

Ing Parnasung Capampangan, anting metung a Pamilya,
Ytang Amanu tang Siswan, ingatan yang maulaga,
Nung atin mang cagutgutan, alingasngas a mesabi,
Eta lubus mamarsala, pilitan tang manatindi,
Ing milabas a matsura, calinguan tamu't gulutan,
Ing ngeni at ing bucas, yang kecatamung samasan;
Abe abe tang manintun ketang mebating a singsing,
Bang isimpan at mibalic, itang cule na at ningning.

Dilang Maingat

Neng Mely G. Catacutan

Amanu at pusu ning metung a tawu
Pacaingatan la't kecang pacamalan
Pamagsalita mu keca lang pilinan
Pota e sasaryan, maroc asabi mu


Itang sebyanan mu, mematawad ya man,
buyuk e milaco, bacas capilan man.
Mayap pang enaca sasabitla muman
Ing asbuc itikum, saca makiramdam.


Ita nang casebiyan, dapat tang tingiran
at ikit man caya, o etaya dimdam,
Eta mamigaua, makitid tang diwa
Ban eta miyabe king sali-salita.


Alang carapatan, eta sa manghusga
Calupa tang tawu, eta mipanyira
Nung nanung depat mu, yang marapat keca
Ita sanang sabla, mepapanupaya.

“This morning after our grocery shopping at WalMart, kitang nang Ompong nung ecu bisang dumalan "Ross". Pekibat cu: "Nung emu cailangan emu sasaliuan ban ena miragdag ing kekang gastusan". Ba ngana, pati pakibat mu macarima na naman, talaga yatang pangatawanan mu ing tuturu ng Amor keka! Mipakaili naka mimu. Tutu naman.”

Metung A Paninap

Neng Mely G. Catacutan

Ibat ketang malati cu, atin cung paninap keng bie,
Magsumicap at magaral, bang ing bucas pin salese,
Cayari cung Secondaryu, pinili cu ing macu cu,
Bang magdulap cu ping swerte, kilwal na nining balen cu.

Megaral cu TOLEDANO, banting maging Secretaryu,
Sindu cu ing pamagaral, cabang aldo magobra cu,
Bang midagdagan cu belwan, at sumulung ing bili cu,
Pamanuru'ng pegaralan, ya ing cursung inari cu.

Dapot ecu mecaturu, ena cu man manghinayang,
Keng pamilya at anac cu, ing balu cu e mesayang,
Anting maestrang talaturu, keng mayap a cayasalan.
Deng anac cu meragul la, malugud la at gagalang.

At king Clarkfield megobra cu, tinanggap dacal a galal,
Ya itang meging dalan, anting "special Immigrant"
King Nueva York yang santungan, king bye capagsubucan,
Uli na ning paninap cu, alang tacut pamicacunwan,

Kilub labing limang banua, megobra cung misnang sipag,
At ngeni retiradu na, painawa na't e magobra
Busal da retang apu cu, deng malugud a anac cu
At salamat po Dios cu, binye me cacu'y Rodolfo.

Nanu pa mu ing buri cu, nung sacaling muli na cu,
Ing Paninap keting Yatu, asabi cung maswerti cu,
Anya naman pangadi cu, pasalamat keca Guinu
Potang muli na cu keca, tanggapan me ing anac mu.

Macananu Ing Maging Poeta Lauredu

Tiran me ping ustu, O, mal a Ministru,
Kecang pepabalu, daptan a Procesu,
Ytang pamamiling Poeta Lauredu,
Bang luntu manayun, at e mica gulu.

Keta nang Colegyu, dapat yang dumalan,
Poetang mepili, carin de pisabyan,
At uling atin nang, procesung tutucyan,
E neman matsura, ot eta mu gawan.

At nung mepili ne, Poeta Lauredu,
Dapat yang igalang buri ning Colegyu,
At ing ginung ari, Ari ning Parnasu,
Putungan ne ngeni, mepiling Lauredu.

Mepiling poeta, kecatang pugayan,
Deng anggang Aguman misanmetung la ngan
At idayu tamu itang salangsangan,
Abe abe sana king Amanung Siwan.

Ari ning Parnasu at abe Ministru,
ANASI, AGTACA, CKS, KP, pa
Agumang Aliwa, pati na Colegyu,
Dinatang ing Horas, tucyan ing Procesu.

Poeta Laureadu

Nung E Ca Pogi

Casakit na pala, itang eca pogi
keng cang lelelele, saca maglalawe.

Bisa cang lumapit, saca makiabe
capalan meng lupa, ena ca didine.

Uling casanting na, ning pisasabyan yu
mayama cu rugung, darandam kecayu,

Anya lumapit cu, at makitalbugan
bang detang e Pogi, marandam la naman.

Ing casantingan na, dili cung aliwa
'gad dang apansingan, ing pamialiwa

Tutung Pogi la ngan, detang cacung disnan
Uling ecu Pogi, era na pinsingan.

Oneng era balu, magdala cung make-up
Agad cung apinta, kening cacung lupa,

Anya reng menakit cacu kelaguan la
Balamu ikit de i Sharon Cuneta. (Hay...)

Agyang e ca "Pogi", e ca manandaman,
Guintu ya ing Pusu, malugud ca naman.

Inspiradu

E Cu balu at nung bakit,
inspiradu cung masyadu...

Agyang era ca ikit,
at ala ca king siping cu,

Nanu cayang gayuma mu,
careng poetang abe mu,

Alben da ca mu litratru,
apapalwal da ing bersu.

At lalu na pa siguru,
nung ati ca arapan cu,

At akit da cang titiman
cambeng mapunge mata mu,

Anti na cu mung Poeta,
babo na ning entabladu,

At ica mu itang Reyna,
a purian cu careng bersu,

Nanu la cayang amanu,
pangapcapan king isip cu,


Bacung masampat asabi,
macabage king leguan mu.

At midinan capaldanan,
ining malsintang pusu cu,

Damdaman mu itang pali,
sisilab keng caladwa cu,

Alang binit lalagablab,
kilub na ning cacung salu,

Midinan mung capasnawan,
nung ibie me'ng kecang pusu.

ACJ: Crowning of Poet Laureate, Sept. 2009, Portland OR

Midinan Cung Diua

Metaba ya ining puso,
uling midinan cung diwa,

Anyang apansingan mu cu,
ketang poemang megawa,

Itang puge'ng tegulaling,
caluguran a macudta,

Papuring ibat king pusu,
Pasalamat ketang Puna.

Dacal la reng abalu cu,
pamanyulat cawatasan,

Uling atin cung tutucyan,
a poetang matenacan,

At gewa mu cung sundalus,
Inabe king Academya,

Keng tiagga ning pamagaral,
Maging metung nang Poeta.

Dapot matwa na ing bili,
Malagad na ing lapugpug,

Anting manuc keng bularit,
sicad sicad, atras sulung,

Manaya ta na mung tiempu,
Nung capilan maca sacyud,

At agad ta na ping matras,
ketang suluc magpalpatuc.

Pabanua Na

Malwat na cung batyu batyu, ketang awang ning Parnasu,
Panenayan keng panyatang, nitang gagalang cung Maestru,
Kilub ning pabanwang wewe, linaut ya at mindaywan,
Ing silid na king Parnasu, babanten ke't lilinisan.

At ngeni pin, migbalic ne, anti ya mung balikbayan,
Magdala yang pasalubung, king Parnasu na yayampang,
Agad agad sinabit de, ketang dingding ba yang lawan,
At dacal lang mecuswelu, at buri deng paciapusan.

Anting alagad ning sining, aliwa cang dumiscarte,
Balang manibatan keca, anting obra maestra'ng lawe,
Ding ginulis mu king telon, anting lelangan ning Guinu,
Mayayakit itang calam, keca binie nang talentu.

Deng poemang mibalangcas, ababasa ing lugud mu,
Ketang Amanu tang Siswan, a abe mung anting tau,
Neng simen mu reng amanu, at ibugnus keti'ng yatu,
Cawatasan lang menibat, lalang Poeta Lauredu.

Mag Biba la reng abe mu, ketang binie rang dangalan,
Mekilala ca ping MOKA king labwad ning Capampangan,
At deta nang ginulis mung, litratu ding mamuntcan,
King capitulyu Pampanga, pacasabit lang hang-ngaan.

Anya ngeni king Parnasu, dagdagan la ding ipaskil mu,
Neng mitais ne ping ustu, ing pambihirang pluma mu,
Uling dening cayanacan, bisang mabiasa king bersu,
Emu sana paimburisan, ytang mayap ituru mu.

Paeng Maniago

ACDJ, Rolando Malit and Paeng

Mibabalic

Metagkil ya ing panandam
Kinarug ya ining salu,

king santing ning picudta mu,
Macapasno caisipan,

At mibabalik ing aldu
Delanan cung pamalsinta,

Ketang napun nacadwa na,
bayu cu pa mu malsinta.

E cu rugu amalayan
Itang tulang panamdaman,

Cabang yuyuyu mo sunis
detang bersu't cawatasan,

Misan pa mibalic cacu,
itang napung cayanacan,

Inyang ing anak kung puso,
Migising king capalsintan.

King kecaba ning panaun,
mipadpad ku Amerika,

At lubus e abalitan.
itang minunang pilsintan.

Ngeni rugu e cu balu
nanu ing meging kabilian.

"SOMEWHERE MY LOVE, paninap cu
Ing akit daca pang misan,

At agyang paglalawe mu,
aplusan daka.... catawan."

Amoco, Nohrie Losada, ACDJ

Namnaman Cu Ring Amanu

Namnaman cu ring Amanu,
keng sangcap da at recadu,

Apilasa mung talaga,
itang linamnan at yumu,

At lulub emu king atian,
ketang pusu, caisipan,

Nune pati king Caladwa,
at mabilug a catawan.

Macuyad ya ing soga cu,
angga yang metung pilapil,

Ena calupa ning keca,
limang pilapil culang pa,

At itang balun o tosang,
ning picicwanan mung danum,

Asne lalam at malino,
e malyaring cagisanan,

Macayama lang dungdungan,
detang kecang cawatasan,

Macabie lang capasnawan,
at mayap la detang Aral,

Anya kening panandam cu,
megaling cung mengamanu,

Ketang amanu tang sisuan,
a dapat tamung luguran.