Pamicalugud King Amanu (v. 3)

Ari ning Parnasung Capampangan

Itang yumu at lasa na,
binasa cung cawatasan,
Macabie yang capasnawan,
kening mainang caisipan,
At agya mang mangupas na,
ing lugud ta at panamdam
Uling menga palaut na,
pamagobra at cabiasnan;

Detang aliwang Salita,
a pilit dang papagaral,
Anti na mu ing Tagalog,
Inglish, Arabu, Castillan,
Deting Sabing pinili da,
Paglibe re king amanung ...
Binie na nitang Miglalang,
caring dai' ng Capampangan.

Ing sabing Capampangan,
e me dapat picarine,
Maski pa ninung carap mu
yan ing salita mung tune,
Nuca mang labuad mipadpad,
e me cacalinguan abe,
Yan ing dapat tang luguran,
ketang lugud a dalise.

Yang licuan da reng pengari,
caring anac a mal dili.

See other versions of poem: v. 1 | v. 2 | v. 4

Deng Talapagobra Keng Gabun: Nucarin La Deng Sasarul?

E la rugu sasalicut, lalung e ra acalinguan,
Agyang ala nang paranum, sasarul la at gagambul,
Ytang pali at ing dimla, angga da nang paimburisan,
Bang ing amanu tang menan, e ya mate at masaul,

Mapalyaring diritac la, Ortelanu ketang parang,
Deng sadyang talapagobra, linaut la at mindaywan,
Pibata rang macalaut, bala mu sang manakitan,
Ba lang numawa pagcabye, ding pamilyang pacamalan.

Dapot sumangid na niti, pamag-obra king taldawa,
Paninapan dang balican, potang bucas o macadwa,
Yti e ra cacalingwan, uling pamana ring icwa,
Menibatan cang Ibpa ra, a maluat nang memayapa.

Anti murin ing Amanu, salitang pematad pusad,
Ya ing tune mung amanu, agyang noca pa mipadpad.

Comment:
Masanting ya pangalatag ing pamag limpi karing ortelano at ding gagambul (talasulat at poeta) king Amanung Siswan.  Ing diwa ning era pami aliwa mayaquit king lojical a versada.  Lalo yang makayama ing cudta ketang parteng ding ortelanong memag abroad panagimpan dang balikan ing marangle antimu naman ing paganaka a e dapat kalingwan ing Amanung tune kekatamu. It' s like a legal brief presented poetically!  Kasanting na ning cudta yung analogy Atty. PL Almario C. de Jesus. Mapaling puge kekayu!
LUID po!

by Libby Garces

Amanung Mal Dili

Ketang magaral cu'ng maging abogadu,
Amanu mung Inglish, yamu ing buri cu,
E man rugu linub, keng caisipan cu,
Ing datang ing aldu, poeta laureadu,

Obat caras keti, labuad America,
Carin cu meninap ing maging poeta,
Pegaralan cu la poesya ra reng matua,
Biblia'ng Capampangan, dindungan, memasa.

Ining bage bage a cacu miliari,
Nung pagpilitan mu, ing sabla malyari,
Nung pitutuliran sanung mal mung dili,
Amanung beitan, Oy'tang e sarili?.

Cacung atalustus, kening cacung ketuan,
Amanung mal dili, ing AMANUNG SISUAN.

Makisake Cata Abe

Makisake cata, keta nang Garosa
Buri dang sasaken, deng Matuang Poeta
Yta nang Taldawa, yang pupuntalan da
Carin la Daralit, Gagale't Mamoesya.

At ytang gugulyut, a Matuang Damulag
E ya biasang magal, lacad misnang tatag
Alang carag-carag, ing tacbang malagad
Masanting tutucyan, keng Rima at Sucad.

Macanyan lalabas, ing bie ketang Baryu
Poetang Maluca, malugud Amanu
E man meging subyang, nung e man modernu
Ketang gagawan dang ala na keng Usu.

Makisake na ca, kecang Pagaralan
Mamicudtang Poesya, king Amanung Sisuan.

Pamicalugud King Amanu: Abe Abe Capampangan

Pamicalugud King Amanu (v. 2)

Itang yumu at lasa na,
binasa cung cawatasan,
Macabie yang capasnawan,
kening mainang caisipan,
At agya mang mengupas na,
ing lugud ta at panandam ...
E pa murin menaliwa,
pamagdulap tang cabiasnan.

Pilit da lang papagaral
detang aliwang Salita,
Mumuna ne ing tagalog,
Inglish, arabu't, castilla,
Deting Sabing pinili da
yla canung maulaga,
E na balang calinguan ya,
Ing amanung beitan da.

Ytang Amanu tang sisuan
yan ing tune pacamalan,
ABE ABE KAPAMPANGAN
ya ing dapat tang tuntunan,
Lalam ning pamicalugud
ytalacad ya ing Aguman,
Misammetung tamung panig
LUWID YA ING KAPAMPANGAN.

Amor, P.L. with RBA, Ari ning Parnasung Capampangan

Artesia CA
See other versions of poem: v. 1 | v. 3 | v. 4

Salubungan Da Ca

Busten mung queng dalit, salubung cu queca.
Bina cung mewili, caring quecang rima
Nung deng maquiabe anti la sa queca
Caul a matalic, yta culang ya pa.

Ing bondoc Arayat, atin yang catasan
agyang nuca banda quecang abatyawan
Mengari yang bante caring Capampangan
Balang e malili quetang lalakaran.

Ena ca sa micacunu malwat da na cang panayan
Uling ing amanung Sisuan samasan yaping lingapan
Ytang mebating a Singsing, pisupan yang panintunan
Bayang mibalic a cule gng sunis na at santingan.

MALAUS ca O Macudta, mapse na cang cawatasan
Sana miqui agum naka queng nanu mang pisasabyan
Deng caaptas queng ANASI  atin la ngening tultulan
Sanu cayang Ortograpya ing dapat tamung gamitan?

Ing upaya atiu queca, neng manigaral amanu
Tucyan mu itang minuna,  o maliwa cang modelu
Ala ytang sapilitan, a cailangan cang magbayu
Datang murin ing panahun, itang mayap yang magbabu.

Maria Teresa Magtuloy Evangelista

Puge Cang Ca Marc M. Mangalindan (R.I.P.)

Potang Matua na ca

Ing tawling Soneto, kecami licwan mu
Tune mung panamdam, lugud king Amanu

Memun at meco ca, carin ipagsulit mu
Ing Amanung Siswan, ya sang gamitan mu

Carin dasan mula detang Capanalig
Panenayan daca ba rang maging cabig

King pamagtumayla dalit co king Sunis
Pakit yu ing lugud, king Dios sacdal linis.

Y caming melacwan, e ra ca calingwan
Ketang masabal mung tapat a parasan

Ing luwid ya sana, Amanu tang Siswan.
Amanung binye ra caring Capampangan.

Mituc sana keca tune Caratunan
Uling malugud ca king Ginung Miglalang.

Panamdam Capampangan

Mimiral mu kecatamu ing PANAMDAM Capampangan,
PANAMDAM a pepamana detang matwa tang LIGURAN
LIGURAN ya ing Amanu, anting tune CAYAMANAN
CAYAMANAN a mal dili, lacwan caring CAYANACAN.

CAYANACAN migising ca, damdaman mu ing GULISAC
GULISAC na nining matwa, king busal na nitang PISAC
PISAC ing meging cabilian, ning Amanung CAPAMPANGAN
CAPAMPANGAN ing sala mu, calwat mi nang PAGDULAPAN.

PAGDULAPAN mi ing aldu, mibalic ca king CALUCAN
CALUCAN yng cabilian mu, king dane na ning ASLAGAN
ASLAGAN mo caisipan ding poetang MATENACAN
MATENACAN dang iladlad, itang tune CAWATASAN.

CAWATASAN a panamdam, tatatap king CAPALSINTAN
CAPALSINTAN king Amanu e mapawi CAPILAN MAN
CAPILAN MAN ing panamdam, lugud king AMANUNG SISWAN
Ing AMANU  TAMUNG SISWAN, ing salitang CAPAMPANGAN

CAPAMPANGAN ya ing  lahi a binye  na ning MIGLALANG. !

Bunduc Alaya

Bunduc Alaya

Artesia Ca, USA

Macananu Ing Maging Poeta Lauredu

Tiran me ping ustu, O, mal a Ministru,
Kecang pepabalu, daptan a Procesu,
Ytang pamamiling Poeta Lauredu,
Bang luntu manayun, at e mica gulu.

Keta nang Colegyu, dapat yang dumalan,
Poetang mepili, carin de pisabyan,
At uling atin nang, procesung tutucyan,
E neman matsura, ot eta mu gawan.

At nung mepili ne, Poeta Lauredu,
Dapat yang igalang buri ning Colegyu,
At ing ginung ari, Ari ning Parnasu,
Putungan ne ngeni, mepiling Lauredu.

Mepiling poeta, kecatang pugayan,
Deng anggang Aguman misanmetung la ngan
At idayu tamu itang salangsangan,
Abe abe sana king Amanung Siwan.

Ari ning Parnasu at abe Ministru,
ANASI, AGTACA, CKS, KP, pa
Agumang Aliwa, pati na Colegyu,
Dinatang ing Horas, tucyan ing Procesu.

Poeta Laureadu

Namnaman Cu Ring Amanu

Namnaman cu ring Amanu,
keng sangcap da at recadu,

Apilasa mung talaga,
itang linamnan at yumu,

At lulub emu king atian,
ketang pusu, caisipan,

Nune pati king Caladwa,
at mabilug a catawan.

Macuyad ya ing soga cu,
angga yang metung pilapil,

Ena calupa ning keca,
limang pilapil culang pa,

At itang balun o tosang,
ning picicwanan mung danum,

Asne lalam at malino,
e malyaring cagisanan,

Macayama lang dungdungan,
detang kecang cawatasan,

Macabie lang capasnawan,
at mayap la detang Aral,

Anya kening panandam cu,
megaling cung mengamanu,

Ketang amanu tang sisuan,
a dapat tamung luguran.

Mang Paeng, Poeta Lauredu, Ing Canacung Maestru

Kareng anggang meging maestru, keng pamanigaral bersu,
Matas cu pamaglalawe, pagmaragul cung belwan mu,
Detang kecang cawatasan, a sinibul king salu mu,
Casing santing ning ginulis, obra maestra ning pinsil mu,
Ding picudta mung Amanu, alang sawang tiru cacu,
Ila ngening meging padron, melagwa ing gagawan cu. .

Itang lugud king Amanu, Amanung beitan tamu
Menakit matibeng bale, sesesen meng misnang yubu
Metung kang dutung a Narra, ing asias ning balangkas mu,
Bagyu't uran o sigwada, e miragsa, matatag ya,
Uling atin pang poeta, babye na ngan cagiwan na.
E ya maimut, turu na ngan, caretang lalapit caya.

Inya O poetang Paeng, ining kecang disipulu
Pamangawang cawatasan, rima at sucad a ustu
Magpilit yang mangamanu ketang lyra manigtigan
Bayang macatuki keca ketang layun mung gagawan
Itang Amanu tang Siswan, luguran ya capilan man..
Maski no tamu mipadpad, dalan taya't pacamalan.

Poeta Lauredu ca pin, ning Amanung Capampangan,
Meging kilala cang Pintor, "Global Pinoy" tatangalan,
Meging "MOKA" ketang ARTE, dapot ala cang degulan,
Angga ngeni ing panandam, ding MASA ing luluguran,
At detang tala pagobra, ortelano ketang linang,
Ica mu rin ing Capatad, e gumulut capilan man.

Taldawa Apalit, pampang na ning Ilug
Labwad ning Capampangan

Ing United Pampanga Leaders Council v. 3

Ing United Pampanga Leaders Council, U P L C 'ing mibansagan
Mitatag ya California, Aguman de deng Pampangan,
Labi'ng ualu ing Enero, 1998 ning banwa,
Yang aldo nang kebaitan, U P L C misapwac ya.

Adua lang pulu ding balen, adwang ciudad king Pampanga,
Canya canyang association, keti na king California,
At deta nang labing pitu, ila retang menimuna,
Deng Pamuntuc at Lider da, masaya lang megumpisa.

Chito Mandap ning Minalin, yang mepiling mamuntucan,
Subuc ne king panugali, pamaki-abe't tenacan,
Eya mapagmatas matas, mababa ya pilubluban,
At tune neng caluguran ing labwad tang Capampangan.

Busal ning pamisagsagan, mica maulagang sangcan,
Destiny ning UPLC, miniral ya at yang ticyan.
Lalam ning pamisangmetung, at panamdam maca balen,
Telacad de ing Bandera, lugud king labwad a tibwan.

Ing mumunang parasan na, mipaniaup, midamayan,
Mamantabe at sumuyu, careng Balen'ng mangailangan.
Pante pante itang lawe, ala itang mangabiran,
At ing sabla dumalan ngan, Caburian ding keracalan.

Pilan nang banwang milabas, keta Pampanga gewa na,
Ing Computer Learning Centers meging minunang Project na,
Dacal la retang computers caring Balen mipamie la,
Capitolyo at ding Balen, mikiabe keng programa.

Mig Medical Missions la pa, ketang tune pamaglingap,
Detang Doctor at Dentista, memanulu la ping ganap.
Memie dacal a panulu, pamangan at grasyang sapat,
Deng midinan asnong tula, mangapalwa'ng pasalamat.

Y Birhen De Los Remedios, Mal a Patron ning probinsya,
Balang bulan ning Septiembre, pagmasusian ing aldo na,
Akit me deng UPLC, gugusal, lilibutad la,
Keng Nobena't Salpantaya, Pamagsaya at Programa.

At nung ating Dalo naman, O magpasyal California,
Caring matas manungculan Malacanang at Pampanga,
Anti mu ing Gobernador, Obispo't Presidenti pa,
UPLC yang pupuge, biasa yang tanggap bisita.

Careng Fil-Ams Associations, madalas ing asabian da,
Prestigious Organization ing UPLC carela,
Uling e magbida bida, ala itang "compitensya",
Pamakiabeng marangal caring sabla yang gagana.

Monomento nang Gat RIZAL, king Carson talacad de ya,
Miyaliwang manungculan, ing "ground breaking" tinagun la,
Pati Mayor, Consulado, JPRMM, Fil-Ams pa,
Abe na ning UPLC, king Filipino idaun ya.

Aldo ning annibersaryo, alus labing atlung banwa,
Detang meging Presidenti, Pasalamat, Panalala,
Chito Mandap, Tito Barin, EdTrovada, Philip Gueco,
At adwang gamat yang supan, Pres Ed Ronquillo.

Cacuyug king UPLC, Capanalig a Pampangan,
Abe abe, misanmetung, ing buclud pacatibayan,

U – uling ing Dios yang mumuna...
P – pati Balen tutuki na ...
L – lugud king para tang tau, lalu caretang cabalen...
C – catuliran, catalawran, yta ing dapat tang tucian...

Luid ya ing UPLC; Luid reng Capampangan;
Luid ya ing Pilipinas, Pampanga't Amanung Sisuan!

See version 1 (graphic, 2009); version 2 (text, 2009).

Pamicalugud King Amanu (v. 1)

Itang yumu at lasa na,
binasa cung cawatasan,
Macabie yang capasnawan,
kening mainang caisipan,
At agya mang mengupas na,
ing lugud ta at panandam ...
E pa murin menaliwa,
 pamagdulap tang cabiasnan.

Detang aliwang Salita,
a pilit tang papagaral ...
Anti na mu ing tagalog,
Inglish, arabu, castillan...
Deting Sabing pinili da,
paglibe ra king amanung ...
Binie na nitang Miglalang,
caring dai'ng Capampangan.

Amanung miras caladwa,
mabilug tang caisipan.
Yan ing dapat pacamalan....
yapin ing Amanung Siswan,
Pamicalugud a lante...
iti alang cayangganan,
Macanyan mung e ya mate,
e ya dapat ipaglibe.

Parnasung Capampangan Poets receiving awards from UPLI

See other versions of poem: v. 2 | v. 3 | v. 4

Ing United Pampanga Leaders Council v.2

Neng Almario "Amor" C. de Jesus, P.L.
UPLC Charter Parliamentarian/Director

United Pampanga Leaders Council, UPLC ing aus da,
Ing marangal a aguman, mitatag ya California,
Labing walu ning Enero, 1998 ing banwa,
Yang aldo nang kebaitan, UPLC misapwak ya.

Adwang pulu't adwang balen, keng mabilug a Pampanga,
Ting sariling "association" estadu ning California,
At deta nang labing pitu, yla retang megumpisa,
Deng Pamuntok at Lider da, masaya lang menimuna.

O'bat caya mentun dalan, mica maulagang sangkan,
Destino ning UPLC miniral ya at yang tikyan,
Lalam ning pamisanmetung, anting tune Kapampangan,
Telacad de ing bandera... lugud qng labwad a tibwan.

Mumunang pake na yla, ing mipapanyaup la ngan,
Mantabe la at sumuyo, ninu man'g mangailangan,
Caring abe abeng balen macasadya dang damayan,
Pasalamat, alang libe, e da man rugu panayan.

Ing Computer Learning Centers, projectu na qng Pampanga,
A maigit lang atlung dalan a "computers" mengapamye la,
Capitolyo at ding balen, mekisanmetung programa,
Libring pamagaral/training, ketang pamangabyayan da.

"Medical Mission" gewa na, ketang tune pamaglingap,
Detang doctor at dentista, memanulu la ping ganap,
Memye dakal a panulu, pamangan a grasyang sapat,
Balang metung manga-palwa, qng tula at pasalamat.

Nung qng kasalpantayanan naman, UPLC modelu ya,
Nobena cang Birjen De Los Remedios, ya pa ytang menimuna,
Balang balen a cayabe, tinuki at mig-debocion la,
Siyam a Sabadong nobena at lamac cang Birjen Maria.

Deng manibatan Pilipinas, at Pampanga'ng mamuntukan,
Sasalubungan na la ngan, masaya nung suportaan,
Obispo at Governador, Presidenti estimaan,
Masipag yang makirungut, at ali ya mangabiran.

Ing UPLC aliya mag bidabida o maki-pagkompitensya,
Pamakiyabe'ng marangal parang tawu yang gagana,
Deng Fil-Am a associations, UPLC modelu ya,
"Prestigious Organization" ing UPLC karela.
Mi abe abe mipapanyaup... matibe buklud ning lugud...


U   P   L   C

U - ling ing Dios yang mumuna...
P - ati Balen cayabe na...
L - ugud parang tawu caring cabalen lalu na...
C - atalawran at Katuliran, careng egana gana...


Luid ya ing UPLC; Luid ya ing Pampanga;
Luid la reng Kapampangan at Luid ya ing Amanung Siswan!

See version 1 (graphic, 2009); version 3 (text, 2011).

Ing United Pampanga Leaders Council v.1

UPLC

See version 2 (text, 2009); version 3 (text, 2011).

Luid Ya Ing Amanung Siswan

Cayama cung mekirandam, ketang migale poema,
Caibat yu pung miputungan, anting Poeta Lawreta,
At yta nang cagiwan yu, matenacan a Poeta,
Qng masanting diling Sabi, dane aslagan o Asia.

Cabang dudungdungan ke pa, ing poesyang belangcas yu,
Emu mapilan a besis, gagale cu ring amanu,
Amanung mipnu qng lambis, amanung sacdal qng yumu,
Ytang Isip at Panandam, yng tula na yang lalapu.

Inya linub qng isip cu, deng poeta aliwa la,
Caretang tawung lelangan, keti metu a sicluban,
Ing carelang cawatasan, pinili na ning Miglalang,
Enu inabe qng Babel, caring amanu nang gilwan.

Lugud qng Amanung Siswan, cayantabe na na ning bye,
Macananu ke mang basan, ya mu rin ing pamibule,
Agyang dimut mung cagiwan, magpilit cu ping gumale,
Ing munye cung pasalamat, at kilala yucung abe.

Mangapcap cung cawatasan, qng caban ning caisipan,
Qng pamanyulat, gagale, Deng poeta pacyapusan,
Magumpisang pagaralan, ing masanting a poesya mu,
Paninapan cung pinandit, a gale ke arapan yu.

Salamat mal a Poeta, pangadi cu ing lumwat ca,
Bacang dacal a atanam, cawatasang kecang lacwan,
At deti pupulan dala, deng lulugud salita ra,
A tutuking cayanacan, qng labwad ning Capampangan.

Luid ca Ari’ing Parnasu, at Ari na ning Alaya,
Luid ca O Capampangan, amanung cacuang beitan,
Luid ya ing Academya, ing ANASI' ng ausan da,
Luid ya ing Pilipinas, mal a labwad, mal tang tibwan.

Misan Ginale Cu

Misan a pamicatagun, mekiabe cu't tinagun
Keng masayang "birthday party", nitang cacung caluguran
dacal la retang dinalo, alus Capampangan la ngan
Anya at nake casaya, alang tucnang cumustaan.

Menyapucaki’ng  pamanganm alang patad ing terac da
At atin pang magsalita, liwas liwas lang magcanta,
Dapot lubus cung magtaca, pane rugu ing Inglis da
Inya migsican nacu lub, lepitan ke ing Emcee ra.

At saka cu pin sinabi, nung malyariu gumale cu
Uling buri cung parandam, ytang tune tang amanu
At agad nemang mebisa, buri cu ing samasan mu
Anya naman migsadya na, pelipit cung balugbug cu.

Anyang pakilala nacu, ala rugung papalacpac
Era ticnangan ing cwentu, saca la pa sasagacgac
Dapot inyang umpisan ke, ing poema cung busilac
bigla la ngan menajimic, maglalaweng anting maclac.

Potang bugnus me keng gale, ing siswan tamung amanu
Detang balang cawatasan tuki ya ing pangimut mu
Balamu duduyan mula, ing bosis pabayubayu
Ing yumu’t cabaldugan na, manibatan king pusu mu.

Pagtumayla raca diosa, tagulale qng dalaga..."
Macanyang keng inumpisan, ing gale cu ketang mutya.
At linawe ya canacu, marayuput ing timan na
Nung emu pin macarine, bisa na cu sang dumiga.

At anyang mayari ne po, ing canacung pamamoesya
Daig ke pa ing Poeta, king palacpac a binie ra.
Dacal lang ginalamanu, at dindam cu pa carela
Canyanman nang darandaman, ytang poesyang Capampangan.

At agad pepabalu cu, atin taping Academya
Nung bisa lang manigaral, at balican ing Cultura
Ing ANASI king "Internet”, dacal itang abalu ra
Istorya ning Capampangan, powesya, pulosa at canta.

At nung poema ing buri, basan da lang macuswelu
Ding poema di Alzadon, Turla, Laquian at Maniago
Anti murin ytang Castro, Saban, Pena, Rivera, Soto
Sale, Rodriguez, at Singian, Arenas at Tolentino.

Basan yu ring articulo nang Ben Yuzon, Nancy Lagman
Garcia, Tantingco at Babal, itang anac a sisig-man,
Ing malilyari Pampanga, king ANASI mibabadandu
King uli  ning Pamagcusa, Rodriguez at Josie Castro.

Caring maldang Capampangan, diasporang meturingan
Eye sana cacalingwan, itang amanu tang siswan
Eme sana picarine, nucarin mang catatagan
Uling Ing dayang mamagos, keng utak mu at catawan...

"Ytang dayang Capampangan, daya re retang marangal"

    Luid ya ing Amanung Siswan,
    At ing lahi ding Pampangan;
    Luid ya ing Mal tang tibwan.
    Ing ANASI at Poetang Capampangan!

Matwa Na Ing Bili

Dacal napin itang napun, kening bie mu a dinalan,
Detang  anggang sablang bage, maralas mu lang balicdan
At magmunimuni ca pa, at lubus catahimican
Nung atin capa cayang, maging BUCAS a asaan?

Ing NGENI nanu ya caya, nanung maging panandaman
Uling magbayu ing isip, pati na itang  catawan.
Dacal itang maging sangcan,  e mu binang amalayan
E mu balu ing malyari, anting metung a  tanaman.

Detang tanaman a dutung, keng kelwatan ning mabibie,
Ding yamut, pun at sanga da, magbayu ngan itang  aske
Ding bulung malalanat la, malagas keta nang tangke
At mibwal niya  cabud ing pun, ketang gabun ni'ya mipase.

Ing catawan na ning tawu, anting tanaman ya naman,
Magbayu ing sablang bage, miminang e apiadyan,
At anti reta nang tud mu,  a sadyang tune masican,
Obat ngeni cacalu ca, ing baston ya nang tatalnan.

At deta nang adwang mata, ding salamin ning catawan
Melabug at mapula la, cataratang parsalanan,
At meging calbu na ca pa, at lintu mapangalingwan,
Rugu meging Maclac capa, angga racang picacaylian.

Neng misan ing Asawa mu, madalas malmura na ya,
Uling eme papansingan, at mebating ing Romansa,
Itang sadyang gagawan mu, at machong magbidabida,
Cabud niya mu meganaca, Lupa namu ing Mimimwa.

Neng capitangan ning bengi, madalas cang mibabangun,
Mamalagwa cang lalacad, papulayi ketang cumun,
Carin ca pacantacanta, uling mangainipan na,
Angga niyang Urung at Sulong, eya lulwal ing punyeta.

Dapot agyang macanyan man, bista't ing bili matwa na,
Dapat tamung pasalamat king Guinung Dios Mayupaya,
Ing Mayap a Depatan mu, yamu ing kecang Pamana
Anti ing Lugud king Guinu, Tawu, at Mal a Salita.

Dacal lang lulugud king Dios, keti mabilug sicluban,
At parang tawung manwala king banal a cautusan,
Dapot king Amanung Siswan, itang sabing Capampangan
Ngeni rugu ot macanyan, dacal nu reng mengalingwan.

Agyang MATWA NA ING BILI, mabaya na ing catawan,
Itang lugud king Amanu, e menaliwa ditac man.
Nung tutung ala ng BUCAS, uling paralum neng Bulan...
Luid  na ning AMANUNG SISWAN, ya ing BUCAS a panayan.

Norwalk, CA