Nanu Pin Kaya?

O Kaka...O Kaka... at atsing maputla,
Ngeni balu tana ing tawling balita,
Protesta nang Lilia, wayta sinulung ya
Ya ing penigan na ning Korte Suprema.

Y gobernor Ed Panlilio canyan ne mica problema
Uling culang ya pin pera gastusan ketang protesta
Detang atipun nang limos, mengulapu king baul na,
Barya la mu rugu reta nung cumpara me cang Lilia.

Deng Advisers nang Among Ed, anya ngeni mimisip la
Ating sasabing cuma la, ketang balas mangupit na,
O caya careng projectu ing commission adwan na ya,
O manyad la careng tawu contributions at saup da.

Agyamang magigipit ya ing Pari keng maliliyari
Ali...Ali...Nunca...Never, ecu buring gawan yti,
Ining pamagcandidatu, pamagpari linele cu,
Uling buri cung luminis, gobyernu king Capitulyu.

Mengadi ya itang Pari, anting sadya nang gagawan,
Menyad yang saup king babu, nung nanu ing dapat gawan,
Nung tutu ping Calbaryu ya, ing obrang canacung liban,
Dinan mu cung caisipan, king malinis a paralan.

At bigla nang mibulalag, caring TV at keng Diaryu,
Ing tagal neng Presidenti, Paring meging politicu,
Ytang buri naping Bise, gobernador Nueva Viscaya,
Malinis at Morlidad, yang plataporma dang adwa.

Careng mamarap keng Balen, bisang maging Presidenti,
Batican lang politicu, kilala da nu ngang "trapo"
Y Panlilio at Podaca, nung yla ping icandidato,
Alang "issue keng corruption" maki dangalan lang tawu.

Ing Sarswelu Capitolyu, sasanting na ing pulayi,
Deng eksenang mayayakit, eta balu ing tutuki,
Angga ngeni isipan ke, nung nanung caugnayan na,
Panlilio for Presidenti, ketang protesta nang Lilia

NANU PIN CAYA ? BALU YU po?

Lilia Pineda, MVP, Mayor Jun T.

Contextu ning poema
Bise Ed, Cong Mon, Mang Carlos, Abe Anac ning Arenas, at aliwa pang Caaptas:
NGAYU PA YA?. . . Pangasanting ning sinulat yu. Yti caya mangabaldugan a mancanyan la naman panandaman ding calupa tang Kapampangan cang Among Ed?. Nung wari sa keng "Survey", buri ya pang tagal pasibayung gobernador O munta ya babu ba neng alilan y Madam Gloria?
OBAT MIPAINTAGUN NAMAN. . .at malamang abalitan yu na, yng protesta nang Lilia Pineda ketigan ne ning Korte Suprema. Ybalus dong buclat deng urnu at bilangan da ing boto. Anti murin, pepalwal neng press release at meinterview ne y Among Ed, bisa at malaus ya namang cumandidatung Presidenti 2010. Ene bisa Capitolyu, Malacanang yang puntalan.!
Nung sakaling miswerte ya ing Pari a maging Presidenti, Nanu Kaya... Agyu Na?
Tuglungan ke ing POEMA (Ing Bie Ning Gobernador), at sana mikitalbugan cong pasibayu bata lang asanac detang mikipanandam kang Among Ed at balen Pilipinas.

Lugud Qng Mal A Indu (v. 3)

I

Ing lugud qng mal a Indu nung ipinta me ing cule na,
Pinturang guintu at pilac ena abye ing tingcad na,
Uling ing sintang binye na menibatan qng pusu na,
Pinunla na at sinese meging ligaya na kaya.

II

Ninu wari y Indu mu? anting metung yang cometa,
Mabilis pangabulasuc kinislap menibat banwa,
Qng dalumdum na ning bye mu pepakit na ytang sala,
Biklat nu ding kecang mata lugud at dalise sinta.

III

Siyam a bulan mabuctot ya cambe ning sakit at dusa,
Alus ytang camatayan yang meging cayantabe na,
Ena na picabyang yta ligaya na’ing mibait ca,
Uling daya na ca’t laman ning laman na at daya na.

IV

Magcanta yang papasusu qng candungan matudtud ca,
Terac na ca’t panaplusan at panirug ing uma na,
At cabang daragul na ca ytang mayap tuturu na,
Lugud qng Dios, parang tawu mal a balen a tibwan na.

V

Anya nung maangu ne bye pacamalan a Indu mu,
Anti neng mepitna keca ing sala na niting yatu,
At ytang silbag nang lugud nitang mal a Guinu tamu,
Cabud na mipanpan keca calmang lumbe pibatan mu.

VI

Ala na ngening mamapis cacaul, mumuma keca,
At ala nang mituturu sasaup keca mamingwa,
Ninu ing agad lapitan qng busal na nitang lugma,
Dili mu na mung tatangis pibatan mung meging calma.

VII

Talaga yatang macanyan ing mabibye lalam banwa,
Masaya cayabe tula ating lungcut tumulung luwa,
Anya iti tanggapan mu yumu’t pait alducan la,
Neng iti yang caburian na nitang Dios tang Mayupaya.

VIII

Uling deng sablang melalang tutuki la ketang agus,
Nung nucarin ytang sabla ketang dagat ngan tataglus,
Keta nang pangabait mu nanung tawling caulyan mu,
Ytang dataorng mu pang bucas gabun ni’ya ing pagkeran mu.

IX

Anya ica o penganac emu dapat cacalingwan,
Cabang caba na ning bye mu itatac mu qng caisipan,
Ing lugud ning kecang Indu yti alang cayangganan,
Tapat e pamagcunwari lante guintu’ng panandaman.

X

Puryan la deng Indu tamu ytas tala qng calucan,
Ytang puri dang ingatan eta mu dapat musingan,
Casampat na sana Indu nung malyari mu sang gawan,
Tipunan cu ngang sampaga mitmung lugud keka iyampang.

Portland, Oregon, Sept. 2009
Ginale Poema, Proclamation, Poeta Lauradu
See version 1; version 2.

Lugud Qng Mal A Indu (v. 2)

I

Lugud mu qng mal a Indu, nung isulat me keng pluma
Detang tintang guintu’t pilac, ena abye ing gayuma
Uling ing sintang binye na, menibatan qng pusu na,
Pinunla na at sinese, meging ligaya na kaya.

II

Ninu wari Y Indu mu? Anting metung yang cometa,
Mabilis ya pangabaldug, kinislap ibat qng banwa,
Qng dalumdum nining bye mu, pepakit na ytang sala,
Biklat nu detang mata mu, lugud at dalise sinta.

III

Syam a bulan delanan na, anggang sakit pibata na,
Alus ytang camatayan, e mamacu qng siping na,
Ena na picabyang yta, ligaya na' ing mibait ca,
Uling daya na ka’t laman ning laman na at daya na.

IV

Magcanta yang Pepasusu, ena balu ing gawan na,
Terac na ca’t panaplusan, mumuma yang alang sawa.
At inyang magaral naca, ytang mayap tuturu na,
Lugud qng Dyos, parang tawu, mal a tibwan a balen na.

V

Anya nung maangu ne bye, pacamalan a Indu mu,
Anti neng mepitna keka, ing sala na niting yatu,
At ytang silbag nang lugud, nitang mal a Guinu tamu,
Cabud nala mu mipanpan , calmang lumbe pibatan mu,

VI

Ala na ngening mamapis, cacaul, mumuma keca,
At ala nang mituturu, sasaup keca mamingwa,
Ninu ing agad lapitan, king busal na nitang lugma,
Dili mu namung tatangis, pibatan mung meging calma.

VII

Talaga yatang macanyan, ing mabibye lalam banwa,
Masaya cayabe'ng tula, ating lungcut pati na luwa,
Anya yti tanggapan mu, aslam, pait alducan la,
Neng yti ing caburian na, nitang Dios tang Mayupaya.

VIII

Uling deng sablang melalang, tutuki la ketang agus,
Nung nucarin ytang sabla, ketang dagat ngan tataglus,
Keta nang pangabait mu, siguradung caulyan mu,
Ytang datang mu pang bucas, gabon ya ing pagkeran mu.

IX

Anya yka o penganac, emu dapat cacalingwan,
Cabang caba na ning bye mu, itanam mu king caisipan,
Ing lugud ning kecang Indu, yti alang cayangganan,
Tapat e  pamagcunwari, lante guintu ing panandam.

Lily, Rosa, Dunie and Let

See version 1; version 3.

Ing Bie Ning Gobernador

Kaka..... O kaka.... sagacgac at tula
Ecu apigilan kening pamamasa,
Detang susulat dang pasiag, babalita
anti mung comedya O sarsuela kaya.

Obat mipacanyan lulub king isup cu
E wari y Among buri de deng tau?
Ing moralidad na ampung pangatau
Ala lang asabi mas biasa ya kanu.

Nung Gobernador ca, taung mamuntucan
Metung a probinsyang kekang sasacupan
Emu moralidad ing kekang gamitan
Uling politica marinat a luban.

Agyamang balu mu itang theologia
Pamanaral tau e pagcasakitan
Yti eya sapat king pamanunculan
"Diplomasya" murin yang dapat mung tukian.

Emu basta cabud istung milucluc ca
Agad mung alilan disnan mung "sistema"
Agyamang nang santing ing buri mung gawan
Macacalale ca kekang pagaralan.

Ugali ning tau keta kekatamu
Masakit yang tutung pakibagayan mu
Dacal lang lalapit kareng politicu
Istung eca bisa calaban ka canu.

Ytang malilyari carin capitulyu
Dacal ke abalung tutu pa keng diaryu.
E sana paysupil lumaban yang ustu
Ba namang magbayu ing sistema tamu.


Nung atin mang mituturan caring batong besibas yu
Ela sana manasakit o mimimua kekatamu
Uling iti cailangan ya bang abalu da ding tau
Nung nanung clasing gobiernu ing mimiral capitolyu.

Dinan de sanang panaun ing kekatang gobernador
A pagaralan nang ibayu gewa de retang cubrador
Alben dang miamasamas ela basta manyad pabor
Era agad sisingilan bayad caring "contributor".

Malapit na ing election, nung sakali tagal ya pa
Nung dapat O aliya na ya, "Second Term" ibye pa caya?
Nung midayu ing "corruption" ketang pamanungkulan na,
Keta king National Government, siguru dapat munta ya.

NGAYU PA YA?

Louie Uy and Gov. Among Ed

Para king katuglung na ning poemang ini: Nanu Pin Kaya?

St. Anthony de Padua, Frayle at Doctor

Anthony ning Padua, Santung Patulunan
Ning Franciscan Order, at ding Agustinian
Tikyan ne ing Guinu, likwan na ing pibandian
Haleluya, penaral na ing Banal a Kasulatan.
O bat mirasnan yang sakit, e melaus babalakan,
Nasang karetang Moors, manaral at saupan nala
Ya, ing kilala at biasa, lupang Frayle tuturu na.

Detang librung teologya, escriptura't , kawatasan
E kinupas bitasa man ita nang kayang kabyasnan.

Patron de deta nang manaliwa ketang dalan,
Ampung mibabayu king bye, milalapit king karukan
Dapat at pusu na, kang Cristo binie na ngan
Uli na pin nita ing sabla at eganaganang miuman
At ing bage bage penalig na king Dios a sasalpantayanan.

Sermon nang Anthony, yti ing sasabian na
Anti mu reng santu, balamu tala at batuin la
Na ela basta't saslag pakasalikut la, at ustung laltu la
Tukyan de ing Aus ning Dios karing tau sumaup la
O yan ing meging bye na, Santong Anthony de Padua.

Metung careng minuna cung poema at peparikil ke cang Dr. Antonio C. Quiroz, Poetang Taga Apalit, Pampanga, Philippines

Pamanlalang Dase

Dacal na ing menaliwa ketang Sucad a baryu ta,
Nung nun ya macataluntun Rio Grande ning Pampanga,
Ing balitang Arnedo Dike alus menga tibag naya,
Anya neng dagul ya ing ilog deng tawu mag bacwit na la.

Inyang anac pa ing bili nung agaganaca mu pa,
Balang bale deng babai obra da pa ing lalala,
Ala cang ackit mandaywan alang mamacu carela,
Alang mag-"domestic Helper" O Japayuking aus da.

Ngeni rugu detang Ebus megisan at mewala na,
Ala nu retang "biyajeru" maca"cascu" lang magtinda.
Anya ngeni reng babai era na balu ing lalala,
Keraclan tinu "abroad" anting ipus ing obra da.

Anyang ala nang lalala Cabud na la mipaburen,
Detang aliwang salitang malwat da nang gagamitan,
Basan mu lang masalese At pilitan mung tandanan.
Nung dapat la pang ibalic keng kekatang pisasabyan.

Potang sasali cang Ebus Manenaya ketang dungan,
Makisiglulu cang mamwat ysaka mu ngan babu dalan,
Mamirapal mung BALBALAN ding Ebus at PALANGPANGAN,
Saka mu idayu ing Tingting tunggal tunggla mung TISTISAN.

Ytang Ebus a METISTIS agad da nang SAPUNGGULAN
Bang ketang TUKUNG a lata dapugan la't pacatamban,
At potang melaga nala YKID da nung mirarapal,
At ibilad lele dalan SABUNGKEN dang misnang dapal.

Panga langi na ning Ebus MANALESE na lang agad,
Aptasan dang sapasapunggul bang king ilog da IBABAD,
At istung metulid na la ing baluctuc ala na ya
Pasibayu dang ibilad ing Ebus paka ylera.

At catacup na ning silim detang Ebus pa-ambon la,
Ba ping lambut ing catawan at mayan la ping AYKIRAN,
At mipilang pamung aldu anda ra ne ing TISTISAN,
At BULAYAN da ing Ebus at saka ra pamututan.

Gawan da na ytang MULA ya ing umpisa ning Cupya,
At saka nala MANGUPA Yta ing peka-buntuc na,
At caibat PALDASAN da nung nanu ing lapad na
At saka nala MANYUBLI yari na ing pamanlala.

Potang aldu ning Dominggo dumalan yang MAGCUCUPYA,
Saliwan na la't bayaran detang ayari mung Cupya,
Samasan na lang gupitan plantsaan at almirisan,
At agad na nung ybyaji keta king Binondo Menila.

Mewala nu retang Cupyang a megawa kareng Ebus,
At deng Cupyang asali mu gawang plastic misnang pali,
Detang Cupyang gawa tsina king palengke micalat na,
"Cottage Industry" Apalit ngeni rugu mewala na.

Macanyan ya ing Amanu Anti yang Ebus a Cupya,
Linub ya ing Cupyang "plastic" Tagalog anting "lintik",
Nung Ebus mesambut ya King Plastic a gawa Tsina,
Ing Amanung Kapampangan Pamingwa, ylaban taya.

Albug king Sucad

2009-07-14 Norwalk, CA

Lilibeth, Libu-libong Tula

Libu, libong tula, ing digpa kanaku
Inyang mikilala kata, kinarug ya ing salu,
Lawe mung asnang lagkit, at timan da ring mata mu
Ilang pepasaya kaku, me anak ya ining pusu.
Balamu malwat nang tutu, sadya katang mikilala
E wari makanyan ing panandam nita ning mumunang sinta
Tambing kung mengangas, kaulan da naka sana
Hay, Atsing Liling,emu sana ikakamwa ining kakung Pamatula.

Nung atatandanan mu, pig-tumayla ra kapa
Itang "dalumdum ning bengi" yang kakung meging harana,
Nanu itang gewa mu , mig-karoaki at kinending ka
Ganadu kang memagkanta, meluma la reng artista.

Anya deng kaaptas keng Anasi, maaga lang kayabe ka
Nung malyari mu sana balang pinandit ati ka
Agad lang misusuglulu, lalapit papansin keka
Sasaya ing pamitipun, nung king libutad ati ka....
Ika, ing malagung Rosal, king ardin na ning Poesya.

Tagulele Ning Milsinta

Cang Isabella, Caluguran Da Ca

Ating metung a dalaga  a canacung apalsintan
legwan nang pambihira, ecu malyaring calingwan
ing ugali at pangimut, babai yang Capampangan
capilas ya waring bulan, potang ackit meng titiman,
inya alus memulang cu, inyang misan nacu licwan.
angga ngeni dela cupa, ing sakit ning pilubluban.

Caibat ning dacal a banwa, miikit keng e sasarian.

Qng kecaba ning panahun e migbayu bitasa man
uaring ababacas cupa lupa na batal at canwan 
istung panaplusan cu ne ketang yumu at pacamal
as neng tula at babye na ligayang sampat at dacal.
macanyan man e  cu balu biglang migbayu ing bili
bakit caya menaliwa licwan nacu king palsimi,
agyang nanu ing aus cu ala nang capakibatan
o rugu, ot mipacanyan ining cacung capalaran,

Casakit na ning malsinta lalu na nung linaut ya
angga na cang tagal tagal magpalimos keng lugud na
labis na cang mangainipan anting tulalang manaya,
ustung cayi e mu balu ketang lumbe tatangis ca
GUINU yang kekang ausan bacang midinan sicanan
uling misna na cabayat king pusu mu pupusanan.
reng penandit gigisanan babalic mu ing delanan
anting yumu ning alala nitang ginulut a sinta.
nya sana o mutya cu ibalic mu ytang ligaya.

Detang litratung binie mu a malwat nang sisimpan cu
alus ylang casabi cu kening pamangulila cu
capilan kaya malyari ing magbalic ca canacu
asahan mung manenaya anggang mapupus ing bye cu.

Nung atin ya mang calagyu ing Poema, iti e pu sasarian at ing sabla bacas na ning milabasan

Nanu Ing Tutu?

Nanu mu caya ing Tutu...
dapat tamung panintunan?
Anti ca waring  Diogenes...
a susulu neng caugtwan?
Nanung maulaga keng bye...
a dapat mung pagdulapan?
Deta nang batong brilyantes...
guintu't perang cayamanan?

Oy' tang  matas a Tungculan...
upaya, ticdi't cabyasnan?
Gelingan keng pamamasa...
king banal a casulatan?
Mapalyari kening bye mu,
ala na cang panintunan,
Uling atyu na ngan keca,
keng  yatung pamangailangan.

Dapat ganacan mu sana,
itang kecang caligtasan,
At yang pacasamasan mu,
paintunan me ing catutwan,
At nung dudungdung cang biblya
Amanu yang pagaralan,
Uling metung ya ing dalan,
ba meng ackit ing Miglalang.

Ing sabla keti king Yatu,
melalang uli ning Berbu,
Ing  Berbu o ing Amanu
ya mu namang meging Tawu,
Bata yang lubus abalu
king Aske na ampon Anyu,
Pamagaral king Amanu
Ipakit na ngan kecatamu.

At ica O Capampangan,
nanu mu ing Salita mu,
A dapat mung pacamalan
uling binye ne ning Guinu,
Yti at alang aliwa,
nune siswan mung Amanu,
Yang pematad da ping pusad
at mitatac king pusu mu.

Anya sana itang  Tutu...
ing dapat a panintunan,
Ytang banal a utus na...
caministilan yang tucyan,
At ing tune Lugud king Dios,
at parang tawu mu naman,
Yla ding tune Catutwan...
maging kecang Caligtasan.

Misan Ginale Cu

Misan a pamicatagun, mekiabe cu't tinagun
Keng masayang "birthday party", nitang cacung caluguran
dacal la retang dinalo, alus Capampangan la ngan
Anya at nake casaya, alang tucnang cumustaan.

Menyapucaki’ng  pamanganm alang patad ing terac da
At atin pang magsalita, liwas liwas lang magcanta,
Dapot lubus cung magtaca, pane rugu ing Inglis da
Inya migsican nacu lub, lepitan ke ing Emcee ra.

At saka cu pin sinabi, nung malyariu gumale cu
Uling buri cung parandam, ytang tune tang amanu
At agad nemang mebisa, buri cu ing samasan mu
Anya naman migsadya na, pelipit cung balugbug cu.

Anyang pakilala nacu, ala rugung papalacpac
Era ticnangan ing cwentu, saca la pa sasagacgac
Dapot inyang umpisan ke, ing poema cung busilac
bigla la ngan menajimic, maglalaweng anting maclac.

Potang bugnus me keng gale, ing siswan tamung amanu
Detang balang cawatasan tuki ya ing pangimut mu
Balamu duduyan mula, ing bosis pabayubayu
Ing yumu’t cabaldugan na, manibatan king pusu mu.

Pagtumayla raca diosa, tagulale qng dalaga..."
Macanyang keng inumpisan, ing gale cu ketang mutya.
At linawe ya canacu, marayuput ing timan na
Nung emu pin macarine, bisa na cu sang dumiga.

At anyang mayari ne po, ing canacung pamamoesya
Daig ke pa ing Poeta, king palacpac a binie ra.
Dacal lang ginalamanu, at dindam cu pa carela
Canyanman nang darandaman, ytang poesyang Capampangan.

At agad pepabalu cu, atin taping Academya
Nung bisa lang manigaral, at balican ing Cultura
Ing ANASI king "Internet”, dacal itang abalu ra
Istorya ning Capampangan, powesya, pulosa at canta.

At nung poema ing buri, basan da lang macuswelu
Ding poema di Alzadon, Turla, Laquian at Maniago
Anti murin ytang Castro, Saban, Pena, Rivera, Soto
Sale, Rodriguez, at Singian, Arenas at Tolentino.

Basan yu ring articulo nang Ben Yuzon, Nancy Lagman
Garcia, Tantingco at Babal, itang anac a sisig-man,
Ing malilyari Pampanga, king ANASI mibabadandu
King uli  ning Pamagcusa, Rodriguez at Josie Castro.

Caring maldang Capampangan, diasporang meturingan
Eye sana cacalingwan, itang amanu tang siswan
Eme sana picarine, nucarin mang catatagan
Uling Ing dayang mamagos, keng utak mu at catawan...

"Ytang dayang Capampangan, daya re retang marangal"

    Luid ya ing Amanung Siswan,
    At ing lahi ding Pampangan;
    Luid ya ing Mal tang tibwan.
    Ing ANASI at Poetang Capampangan!

Nung Balu Cu Mu Sana

Nung balu cu na mu sana, iti yang tawling pinandit
a ikit dacang matudtud, painawa ketang cama,
ing ulas mu semasan ke, itang eca micarimla
at lubus cu pang mengadi, qng Guinu tang Mayupaya.

At nung balu cu mu sana, ya na ing tawling panlacu
ing acakit da na cang lulwal, ketang pasbul mamun macu
metalic sa ing caul cu, penuma labi at lupa.
inausa dacang magbalic, pasibayung gawan cu pa.

Nung balu cumu pin  sana, ya na iting catatawlian
damdamam cu ing bosis mu, a purian cu king catasan
sana gewa racang video, balang kimut mu o sabian
ala cung sawang piyalungan, madalas pakirandamdaman.

Rugu nung balu cu  sana, ya iti ing tawling dili
binie cu sa  ing pinandit, at e ca magdilidili
malambis cung tagulele, tune catang micacasi
Emu itang palague cu sadyang balu mu na iti.

Nung balu cu na mu sana, iti yang tawli tang aldu
E ca mig-adwang salita, ing pating-apun pisulu
Uling balu cung dacal pa ing daratang ta pang alduldu
Pepabusten cung milabas, ngeni rugu sisisyan cu.

Alimbawang migcamali, aldung aita  e canacu
buri cung pabalu  keca, macananu ing lugud cu
At ica mu ing luguran, Cabang caba na ning bie cu.
Angga caring aliwang bie, dadalan ke ing lugud mu.

Tutu pin  pala ing bucas, e me basta ipangacu
cayanacan o matwa, keti babo na king yatu
nung itang pinandit a'y ta, tawling miparikil cacu
ba cung aparandam keca, ytang tune a lugud cu.

Anya sana kecang caulan, talnan me't pacaingatan
ngeni mu ring oras ayiti, itang kecang caluguran
isitsit mung misnang lambis, pacamal mu at panandam
ya mu ing kecang palsintan, e magbayu capilan man.

At dinan mu pang panaun, sana madalas mung sabian
Ba yang ena manandaman, ketang kecang camalian,
I'm sorry, Panupaya mu, Thank you, mingatan ca mu sana
I love you very very much, ika mu'ng cacung luguran.

NB: Culled from the tragedy at the World trade Center, NY USA

Lugud

Macananu ya ing yatu, nung ing Lugud ala na ya?
Nanu caya ing ugali, ding tawung palpicasala?
King mabilug a sicluban, alang patna ing patayan,
At caring mabye pang tawu, maging dios de ing carucan.

Ing Lugud nanu ya keca, nanu ing cabaldugan na,
Nung yti bilin  ning Guinu, caretang apostoles na,
Dapat detang kinabus na, ketang utos mamintu la,
"Ing micacalugud cayu, anti'ng lugud cu kecayu.

Nung atin mang tune Lugud, alang cupas king panamdam,
Lugud a dapat mung gawan, maygit para caninu man,
Ybie mu ngan ytang Lugud, caladwa mu at catawan
King Dios a mapangalalu, ya cabud ing dapat samban.

Nung tutung ing sarilu mu, dapat mung kecang luguran
Uling yti yang "templu" na, espiritung cabanalan,
E me sana mumusingan, keca yang pacaingatan,
Ganacan mung ytang "banal", atyu keca manucnangan.

At caring para mung tawu, cayabe  no  ring casalang
Gamitan mu itang Lugud, ketang muwa da yang panlaban,
Nung atin lamang agawa, mesakit ca pilubluban
Caulan mula at tanggapan, cambe ning capatawaran.

Uling ing Lugud utos ya, ning Guinu tang Mayupaya
Ycang tawung lelangan na, caministilan tupad ya,
Lugud  a atyu  Isipan, eya cabud mu panamdam
Pilitan meng maging Dapat, at yti agyu mung gawan.

Detang Malugud a Pusu, tanaman la O masetas
Misnang Lugud Caisipan, yla ring Uyat a Masyas,
Ding Malugud a Amanu, Sampaga lang pangawilyan
Ytang Mayap namang Dapat, ylang Bunga, sacdal yaman.

        ULING ING DIOS YA ING LUGUD...
        ING TAWU LUGUD YA NAMAN...
        KING LUGUD  TAWU BEIT YA...
        AT KING LUGUD  MABIBIE YA...
        AT KETANG CAMATAYAN NA,
        ING LUGUD TUKI YA CA YA.

De Jesus siblings

Ing diwa keng panga-balangcas na ning poema, menibatan ya keng pamamasa cu king biblia (see translation in English).

Lugud Qng Mal A Indu (v. 1)

Nung kekang isulat, lugud mu king Indu
Letrang pilac, guintu, ela pa macagyu,
Uling Sinta caya, menibat king pusu
caring candungan na, meragul, tinubu.

Ninu mo'y Indu mu? metung yang cometa,
mebaldug, kinislap, bayang munie sala,
king dalumdum ning bie, biclat nu ding mata
akit dang dalise at tune a sinta.

King pangabait mu, itang delanan na
alus camatayan, yang meging dalu na
ena na picabyang sakit pibata na
baca mu sang luntu keti king masala.

Pepasusu naca, at peparagul pa
caring uma't aplus a alang capara.
at king pamagaral, ing sabla tiru na
itang lugud king Dios, tawu at balen pa.

Anya nung maangu ing bie nang Indu mu
anti neng mepitna, sala na ning yatu
ing silbag nang lugud nitang mal a Guinu
cabud niya mipanpan , lumbe pibatan mu.

Ala nang mamapis, cacaul mumuma
ala nang tuturu at keka mamingwa
ala cang lapitan busal na ning lugma
dili cang tatangis, king bigu mung calma.

Macanyan mabibie keti babu yatu
nung atin mang tula, sumangid ya ing luwa
Yti tanggapan ya, , pait alducan mu
Nung ya ing caburian nitang Mayupaya.

Deng sablang melalang, tuki la king agus
ing sabla mumuli, king dagat ya taglus
king pangabait mu, nanung caulian mu
King datang a bucas, maangu ing bie mu.

Anya o Penganac, emu sa calingwan
Anggang mabibye ca, tanam qng isipan
Ing Lugud ning Indu era apantayan
E pamagcunwari, angga qng cutcutan.

Apung Osang

See version 2; version 3.

Inyang Matuli Ya Y Adan

Inyang matuli ya'y Adan minta yapa lalam cwayan
Ing darala nang batacan yang ginamit nang pucpucan
Ala pang campit canita batong sampad ginamit na
Sinabeung ing gulisac ketang caplas a dimdam na.

Deng king Eden mengasdan la ding tupa sinalicut la
Pati na y Indang Eba a magpaangin magpainawa
King ngulangul nitang Adan pupulandit linapit ya.
Obat rugu mecanyan ca, anyang ackit neng arap na.

Pati na ing andu andu sucat me pang pacialaman?
Anya ngeni magadya ca ing boss mimwa ne canian.
At ytang ubingan naman sisilip yang timan timan
Ytang matuli ya'y Adan malwat na nang babalacan

Aray! Aray! kyak nang Adan,   Eba ot emu cu supan.
Tucnang naca sang dadaldal gawa na ca mung paralan,
Minisip ya ytang Eba miglalawe paligid na,
Uling ngeni pa milyari king Eden ining disgrasya.

Aisip nu reng tanaman tulud biabas yang lengutan,
At pirapal nung tinapal bang  ing daya patucnangan.
Dapot mica ditac a problema Ala pang band Aid canita,
Minisip ya pa y Eba Nanu pa cayang dagdag na.

Kinanwa yang bulong Lara semutan ne pang Apalya
At agad na neng tinali ing metuli ticpan na ya
Mipangadwan ing gulisac lucsu keni lundag keta
Anting duldul neng caleldu at y Eba mengaclac ya.

Pilan bulan ing milabas ytang tuli kinayap ya
Mibalic itang ticas , lalung mesyas ing talacad
Merayupot ing timan na neng sipatsipatan ne' y Eba,
At lalun nang masalese ot ing caya aliwa ya.

At caibat ning atlung aldu Ing ubingan linapit ya
keta nang malagung Eba a kindat kindat pa mata
At saca ne inumpisan ita nang pamanucsu na
at iti ing sinitsit na... ... bisa cang mangan MANSANAS.. .EBA?

NB:  Epu sana maging calapastangan ining cacung pamamatula kekayu; nung atin pung kewanangan, adwan cu po ing panupaya.