Misnang Datun

Detang tugac at culiglig, ylang keca magtumayla,
At mamagus ytang danum, ketang mamatucbang sapa;
Ing bunduc na ning Alaya, babatyu yang misnang saya,
Cabang yca ketang duyan, gagale cang macakera,
Cayagum mo retang Pipit ketang cantores rang siwala ,
At ing angin a manene, king catawan mu mumuma,
Pepepen na itang pali, e ca lisangan bitasa;
Alang asuc a mabuluc, O Smog a macasira,
E ca manakit saken, misusuglulu't masigla
Misnang datun ing paligid, alang mangulung bitasa,
At alang manutus keca, mamipi ca ketang batya,
Anti ya mong paraiso, ing madicut a taldawa.

Amor de Jesus, Pirate :)

Salubungan Da Ca

Busten mung queng dalit, salubung cu queca.
Bina cung mewili, caring quecang rima
Nung deng maquiabe anti la sa queca
Caul a matalic, yta culang ya pa.

Ing bondoc Arayat, atin yang catasan
agyang nuca banda quecang abatyawan
Mengari yang bante caring Capampangan
Balang e malili quetang lalakaran.

Ena ca sa micacunu malwat da na cang panayan
Uling ing amanung Sisuan samasan yaping lingapan
Ytang mebating a Singsing, pisupan yang panintunan
Bayang mibalic a cule gng sunis na at santingan.

MALAUS ca O Macudta, mapse na cang cawatasan
Sana miqui agum naka queng nanu mang pisasabyan
Deng caaptas queng ANASI  atin la ngening tultulan
Sanu cayang Ortograpya ing dapat tamung gamitan?

Ing upaya atiu queca, neng manigaral amanu
Tucyan mu itang minuna,  o maliwa cang modelu
Ala ytang sapilitan, a cailangan cang magbayu
Datang murin ing panahun, itang mayap yang magbabu.

Maria Teresa Magtuloy Evangelista

Panamdam Capampangan

Mimiral mu kecatamu ing PANAMDAM Capampangan,
PANAMDAM a pepamana detang matwa tang LIGURAN
LIGURAN ya ing Amanu, anting tune CAYAMANAN
CAYAMANAN a mal dili, lacwan caring CAYANACAN.

CAYANACAN migising ca, damdaman mu ing GULISAC
GULISAC na nining matwa, king busal na nitang PISAC
PISAC ing meging cabilian, ning Amanung CAPAMPANGAN
CAPAMPANGAN ing sala mu, calwat mi nang PAGDULAPAN.

PAGDULAPAN mi ing aldu, mibalic ca king CALUCAN
CALUCAN yng cabilian mu, king dane na ning ASLAGAN
ASLAGAN mo caisipan ding poetang MATENACAN
MATENACAN dang iladlad, itang tune CAWATASAN.

CAWATASAN a panamdam, tatatap king CAPALSINTAN
CAPALSINTAN king Amanu e mapawi CAPILAN MAN
CAPILAN MAN ing panamdam, lugud king AMANUNG SISWAN
Ing AMANU  TAMUNG SISWAN, ing salitang CAPAMPANGAN

CAPAMPANGAN ya ing  lahi a binye  na ning MIGLALANG. !

Bunduc Alaya

Bunduc Alaya

Artesia Ca, USA

Y Mely G. Catacutan

Y Mely Gatbonton Catacutan,
Sapni nang Maria Sinucwan,
Mibait at meragul ya,
Tibis ning Bunduc Alaya.

At king aus na ning sinta,
King Apalit mipadpad ya,
Meging calma ne'y Rodolfo
A apu nang Panday Pira.

Oneng e la mipaindatun,
Ing buri da maglacbe la,
Mig alsa balutan la,
Miparas la America.

Misan a benging marimla,
Ketang tudtud mipacde ya,
Ginising ne ing Lira na,
At linalang yang poema.

Metung a Paninap, mumunang Poesia,
Dilang Maingat, yang cadwang gewa na,
Dacal pang tutuki, lalcas king isip na,
E ta mangainipan, panenayan tala.

Waling Anac Arenas

Ing Panlalawe cu keka calupa na ning Alaya;
Nuka mang suluk ning Pampanga ababatyawan ya;
Anti ya mung tagabante potang mipapalaut ka;
Ylingos mung bagyang ing lawe atuntun ing puntalan da.

Anti ning Moderator ka, Keng Aguman tang Anasi,
Balang lulub a Caaptas, salubung kang misnang pali,
Detang kekang kawatasan masanting la ngang pulutan
Kareng bisang manigaral bersu't rimang sakdal myuman.

Babye cu ing mayap a oras keng aldu mung kebaitan,
Kayabe na ing pangadi masalese ka kabilyan,
Ela sana mapapatna detang poesya mung gagawan,
Uling kareng kayanakan, ika ing Alayang tutukyan.

Luid Ya Ing Amanung Siswan

Cayama cung mekirandam, ketang migale poema,
Caibat yu pung miputungan, anting Poeta Lawreta,
At yta nang cagiwan yu, matenacan a Poeta,
Qng masanting diling Sabi, dane aslagan o Asia.

Cabang dudungdungan ke pa, ing poesyang belangcas yu,
Emu mapilan a besis, gagale cu ring amanu,
Amanung mipnu qng lambis, amanung sacdal qng yumu,
Ytang Isip at Panandam, yng tula na yang lalapu.

Inya linub qng isip cu, deng poeta aliwa la,
Caretang tawung lelangan, keti metu a sicluban,
Ing carelang cawatasan, pinili na ning Miglalang,
Enu inabe qng Babel, caring amanu nang gilwan.

Lugud qng Amanung Siswan, cayantabe na na ning bye,
Macananu ke mang basan, ya mu rin ing pamibule,
Agyang dimut mung cagiwan, magpilit cu ping gumale,
Ing munye cung pasalamat, at kilala yucung abe.

Mangapcap cung cawatasan, qng caban ning caisipan,
Qng pamanyulat, gagale, Deng poeta pacyapusan,
Magumpisang pagaralan, ing masanting a poesya mu,
Paninapan cung pinandit, a gale ke arapan yu.

Salamat mal a Poeta, pangadi cu ing lumwat ca,
Bacang dacal a atanam, cawatasang kecang lacwan,
At deti pupulan dala, deng lulugud salita ra,
A tutuking cayanacan, qng labwad ning Capampangan.

Luid ca Ari’ing Parnasu, at Ari na ning Alaya,
Luid ca O Capampangan, amanung cacuang beitan,
Luid ya ing Academya, ing ANASI' ng ausan da,
Luid ya ing Pilipinas, mal a labwad, mal tang tibwan.