Piesta Ning Baryu Sucad, Parangal Cang Sta. Lucia

Malaus co pu, nganang, Amor de Jesus

Malaus at Lungub co pu, salamat king panyatang yu
Piesta na ning Baryu Sucad, ya ing pagmasusian tamu
King Pasalamat at Tula, pamanantabe ning Ginu
At cang nuan a Santa Lucia, Patrona da ding Devotu
Balang banua pagmasusian, no ke man dane ning Yatu
Ing panata mi king Santa, capilan man e magbayu.

Deng ca-baryu mi pu Sucad, e anti mung Capangayan
Tapat lang lugud king Ginu, tune casalpantayanan
Dacal la reng memagaral, mesalese paintungulan
Ating doctor, abogado, madre, enhiero at maestru
At ding "OFW's", mendaywan keti king Yatu
Lalu keti America, at labwad da ding Arabu.

Dapot agyang licwan miya, ing baryu ming pacamalan
Dit man e mecu king isip, ing ugaling acagisnan
Anti ing pamag-masusi, Disyembre trese'ng daratang
Baryu Piesta na ning Sucad, parangal cang Lucia'ng Nuan
Y Luciang sinacwil bandi, dalagang miningat puri
"Nuan ca pung alang anti, caring lupa mung babai".

Ding Hermano'ng menatagan, canacu ing pasabi da
Malugud dang Pamananggap, pisulwan ta ing anda ra
Yti gewa rang panata, gagawan dang misnang tula
Magpiesta la't pasalamat king Dios at Santa Lucia
Salamat pu! Salamat pu! at milabas ing pabanua
Anya ngeni pupusan ke, ing cacung pamagsalita
Ketang mapuri nang Gosu, ning Patronang Mal a Santa:


    Bapu malugud a Santa
    Patulunan ming Debota
    Malagung Santa Lucia
    Ipanalangin mu ke sana.

Zon Pablo, with Sta. Lucia

Sta. Lucia, Sucad, Apalit, Pampanga

Artesia, Ca. U.S.A.

Nung Kecang Pibule-bule

A Capampangan version of an English poem
by Rodel Gosum

Nung keca yang pibulayan, mas mapali ya ing aldo, ngeni nang casalungsungan,
Detang Cutu keng kecang bwak, anti la waring tamumu, ing buntuc mu panginisan
Degulan da retang panas, mas madagul careng dutung, yti kecang pibulayan
At ytang kecang Sesesen, palac nang asna cabangis, carelang pitatacutan.

Keca nang pibule bule, nung deng bitis mung daralpac, casing dagul nu ning banca,
At deta nang kecang butul, e la masyadung matibe, payat la at malambut pa,
At pibule bule mu na, ing lasa da retang prutas, mapait anti mung sabun,
At ing uran a papatac, ketang banwa manibatan, dumalan ngan king acmulan.

Keca nang pibule bule, ing sala da detang tala, bulag anting talibatab,
At ing bulan king catasan, ala ya king cabilugan, sampad ya at misnang lapad,
Keca nang pibule bule, deta nang adwa mung mata, sindagul ning kecang asbuc,
At ding ayup king cakewan, caung namu ing daraptan, e nu dalit o magpasyuc.

E mu na pibule bule, dili mung magsasarili, manucnangan, keting yatu
At ing puso mu king salu, ketang dimla at mas ya pa, anting batung meging yelu
Pibule bule mu sana, nung ining benging daralan, e ne maging galing aldu,
Detang dutung a tanaman, keng paligid macatanam, malangi lang ting desyertu.

E mu na wari pagtachan , ining sablang malilyari, manintun pamagpalino,
Obat ing hegana gana, maging mayap at ustu ngan, alang bawas at exacto,
Ala cung balung palinu, metung yang capakibatan, at yti ya ing catutwan
Ing Mayupayang Miglalang, Dios yang ustu at cayapan, Ya mu ing tune Catutwan.

Artesia CA USA

Ing Lasa Na Ning Sinta

Capampangan Version of Sabor A Mí.

Malwat ta mu ring pisulu, ing sinta mu at sinta cu
Ding pusu ta at caladwa, micanlapit lang talaga
Anya naman atacman cu, ing yumu na ning lasa mu
At balu cu ing lasa cu, alasa mu ing yumu na.

Nung sacaling ylingad mu cu, meging cayabe keng bie mu
Lumapit cu mu rin keca, pangawlan at paswala cu
Dacal a dake nining bie, mibye at meging dake na
At e mu na alingad pa, ytang alasa mu na cu.

E cu naman buring sabyan, ing yca bandi ra na ca
Uli rugung ala cu mu, ninu mu yacu keca
Nune babye cu ing mayap, O ytang peca mayap pa
Ytang lasa na ning sinta at yumu ning panalala.

Dacal pang datang a bucas, libung banwa ing lumabas
E cu balu nung ing Sinta, dasnan na ing alang angga
At calupa na pin ngeni, kening asbuc cu dadala
Ing lasa cu at lasa mu, cabang ating cung inawa.
Sabor a mi!

E cu naman...

Amor and Daisy

➡ see original in Spanish.

Sabor A Mí

by Álvaro Carrillo
1959

Tanto tiempo disfrutamos de este amor
Nuestras almas se acercaron tanto así
Que yo guardo tu sabor
Pero tu llevas también
Sabor a mí

Si negaras mi presencia en tu vivir
Bastaría con abrazarte y conversar
Tanta vida yo te di
Que por fuerza tienes ya
Sabor a mí

No pretendo ser tu dueño
No soy nada yo no tengo vanidad
De mi vida doy lo bueno
Soy tan pobre, que otra cosa puedo dar

Pasarán más de mil años, muchos más
Yo no sé si tenga amor la eternidad
Pero allá, tal como aquí
En la boca llevarás
Sabor a mí

No pretendo…

Dan and Imelda Danganan, Rizal monument

➡ see Capampangan translation.

Bie Ning Poeta

Madalas ing malilyari, keng bili mung misnang datun,
datang cabud ing pinandit, midinan cang inspirasyun,
deng amanung lipo-lipo, lalapit lang susun-susun,
canita ca macalalang, cawatasan a manayun.

At ing metung a poeta, alipan ne ning Romansa,
Mabibye ya't mangisnawa, king lagyu ning Pamalsinta,
Agyang nanu pang pabsubuc, talacad at labanan na,
Arapan at tanggapan na, ytang calma'ng mibye caya.

Deng amanung susulat cu, malwat na lang macasimpan,
migulis la at milulan, king caban ning caisipan,
keng lacad na ning panaun, dacal nacu rin delanan,
minye aral at tuntunan, cambe casalpantayanan.

Ing mabibye keting Yatu, anting mipayid a banglu,
caibat nang sinalingalngal, ala na cang ababau.

Patauad, Ing Sucat King Micasala

I

Utus na ning Ginu, peca maulaga,
Migit caninu man, ing Dios luguran Ya,
Lugud king sarili, pati na aliwa,
Ya na ing tutuking, kecang abitasa,
Dapat na ning Tau, ing mamatawad ya,
Caibat nang depatan, ing Dios Ya nang bala.

II

King bagsic ding Balas, a pamagmatulid
Anti lang Armalite, king pusu sasagid
Menga tulala cu, at alang a isip
Bisa na cung matras, mula'ing Pulandit
Uling ing PARUSA, cagaling nang Misip
Anya Mengadi cu, ba nang Magmatulid.

III

Ing Utang mi keca, sana patawad Mu
Anting Patawad mi, kecami menutang
At abitasa ke, ing Dios a Minyaclung
Malapit niyang Mate king crus macayungyung
Adwan na king IBPA ing capatawaran
Caring tau'ng maroc, a menampalasan.

IV

Dios Mematawad Ya careng micasala
Tau'ng lelangan Na, ena tucian yta?
Nung Patawaran me Micasala keca
Anti cang Memintu ketang caburian na
Uling ding Lelangan , Mal lang tutu caya
PATAWAD, PATAWAD, Yatu cailangan na.

V

Lex Talion, Eye for Eye, gisanan Palipi,
Salvage, Rub Out, tomba, Parusa mu wari
Careng micasala batas yang matuki ?
Keng Pamamatawad magbayu la bili
At manaliwa pa maroc a ugali
Lugud parang tau, sarili mu, ali.

VI

King Mumunang Tipan, ing Dios tictac bagsic
Uling Upaya Na, buri nang ipakit
Ytang mipairal, Batas a maigpit
Careta nang Judyu a mapag-inakit,
Kening Bayung Tipan, ing Anac ning Tau
Mapamatawad ya, lugud kecatamu.

VII

Tutu pepalbug ne ing yatu canita
Anti mong parusa caring micasala
Keta nang gewa na, nanung sinabi Na
E cu no sintangan ding mabie Lelangan
Anting depatan cu e na miulitan,
Itang Pinanari sacsi’t catibayan.

VIII

Careng maganaca't matulid a lacad
E ne dapat ibie ing pamamatawad
Detang micasala, ugaling marawac
Ilang panupaya at luguran sucat
Anti mo'ing Tulisan keta king Calbaryo
Patawad binye Na, dela Paraiso.

IX

Bayu na aranas, casakitang sidsad
Yta nang San Pedro, Caya na inawad
Nung micasala ya, ing cacung capatad
Pitung Ucdu dapat, ing bye cung patawad?
Ali pekibat Na, king Caya mipalad
Pitung Ucdu a tia, Pitung Pulung ladlad.

X

Ing Meliling Anac turu at aral ya
Keng Pamamatawad Ibpa king Anac Na
Anac a miglayas, migwaldas king Mana
Malugud a Ibpa malwat manenaya
Agyang nang depatan magbalic ya sana
Ing ‘gang casalanan ing Patawad caya.

XI

Nung bisa cang saya tumibe catawan
Ing pamamatawad ya nang kecang gawan
Milisya king sakit, pusu't pilubluban
Mibaba ing presyon, carug alabanan
E anti mo retang, ala nang isipan
Nung e ytang casbu, at maki-ablasan.

XII

Manyaman ping tutu, ing mipanupayan
Lasa na at yumu ning pulut pucyutan
Dapot keng linamnam at peca-manyaman
Ing kecang casalang ya ing patawaran
Nuan pin ing mapamie’t, mamatawad naman
kesa keng tatanggap at mipatawaran.

XIII

Yca ing sinabi, at kecang Amanu,
Parusang mipatung, caring nunu tamu,
E pa miwawale, yatu ne ing yatu;
Macanyan cabagsic, ing paintungulan mu,
Nung pane parusa, buri mu king tau,
Ala na ing lugud, purus nang Impyernu.

XIV

Manang casalanan, mipatawaran na
At ing meging bayad, Crus king Golgotha;
Agyang y Muhammad inyad na cang Allah,
Detang casalang na mipatawaran la,
Ketang depatan dang pamamugbug caya,
Ding tau king Ta’if, miligtas la sana.

XV

Y Papa Benedict, dinalo Lebanon,
Panaung “Civil War", yang capalipalian,
Nung buri yu ngana, ing catajimican
Capatawaran mu, ing dalan yung tucyan
At canita tucnang sablang cagutgutan
Labwad ning Lebanon, tajimic neng miuman.

XVI

Anti mung panyara, mamatawad tamu
Kecang caisipan, tucyan ne ing Ginu
At carin ta ackit ketang pamamintu
Yti macacayap ketang sarili mu,
At tanggapan taya masanting a premyu
Bunga ning Patawad, lumaya cang ustu

Litratu Ning Milabas

1941

Babalican ing milabas, e na rugu mibalic pa
At saca ca pasalamat, ketang Mayap a binie Na,
Ytang timan a capurit, ya ing mamantabe keca,
Cabang deng kecang litratu, maluluma no itsura.

At ing sangcan mipaskil la, e cu bisang macalingwan,
Uling malwat na ping tutu, milaut cu at mindaywan,
Detang casising-anac cu, e ra na cu atandanan
Anya naman kening Face Book, malugud cu lang balican.

Nung sacaling buri ning Dios, e na cu macapagbalic,
Kening lugal America, keni na cu manahimic,
Pilitan cung ipatad pa, ing alalang mipnung sabic
Carng angin a marimla, at uran a atic atic.

Caretang cacung capatad, cacuyug at capanalig
Meging dake na ning bie cu, ketang lugud a sasagid.

Masayang Aldu'ng Kebaitan, Tang

Capampangan Version nang Amor C. de Jesus
poema nang Macy Ann Picardal in English

E mu sinabing macu ca
dit rugu eca memun man,

Miwale king panlalawe
bayu iti amalayan,

Dios yamu ing makibalu
ketang tune meging sangcan,

Angga ngeni ing pusu cu
Malumbe ing  panandaman;

Caring pisni mamalebe,
Ing sasalicut cung Lua,

At nanung cabaldugan na
Ing canacu miwale ca,

Nino cayang macatantu
acu mu ing makibalu?

Nung atipun cu mu ing lua
at macagawa cung eran,

Ing yumu ning panalala
yang taluntunan cung dalan,

Mamirapal cung lumacad
ketang banwa raca dasan,

E na cu micacunu pa
Bale tamu yang balican;

Sana naman carin banwa
atin la sang telepono,

Pasibayung damdaman ke
ing bosis mung maki tono,


Uling ita nang pamun mu
Alang anggang capupusan,

Pamun ing meging parasan
Ya pin na'y tang capupusan,

Dapot kilub ning pusu cu
Maulagang panalala,

At carin ca manucnangan
E na macu capilan man;

Masayang aldu kebaitan
O Tata cung pacamalan,

Ing lugud cu keca Tatang
Capilan man pagdulapan,

Nung ala ca man siping mi
mantabe ca sang parati,

Ing cabilian mu balu mi
Carinan ning Matas Dili

Pacamalan a Miglalang
Tanggapan me y Tata Mi.


HAPPY BIRTHDAY, TANG!

Happy Birthday, Tang

by Macy Ann Picardal

No farewell words were spoken, no time to say goodbye,
You were gone before I knew it and only God knows it.

My heart still aches in sadness and secret tears still flows,
What is meant to lose you, no one will ever know,

If tears could build a stairway and memories a lane,
I'd walk right up to heaven and bring you home again.

I wish heaven had a phone, so I could hear your voice again
Goodbye seems forever, farewell, the end.

But in my heart a memory, and there you'll always be
Happy Birthday Tang, We miss you and love you.

Continous guide us, I know you are in heaven,
with our beloved Creator. Happy Birthday, Tang

See the Capampangan version.

Keca Caluguran

Nung malyari mu pin sana, dacpan ke ing Pinanari,
At potang agawa cu na, keng candunggan mu ibili,

Pisulwan ta itang adwa, ing legwan na ampon cule,
Lalu na caretang aldu, datangan na ca ning lumbe.

Nung agyu cung gawang bunduc, maging keca ya sana'y ti,
Mica lugal cang puntalan masayang magsasarili,

Mayumu cung cunan keca, ing nanu mang cagutgutan,
Cararagling ibalugse, ketang dagat calalamnan.

Dapot ing sabla balu cu, masakit ping mapalyari,
Macananu ing gawan cu, careng bage imposibli,

Ing bunduc e ke agawa, pinanari'ng pakiracpan,
Anya ing balu cung gawan, keca masaya cung iampang

Ing maging caluguran mu , ngeni at aldung daratang,
Ing panlalawe cu keca, e magbayu capilan man.

Elsa Rufino

Mica-diua cu ketang mensahing A Hug Certificate for You keng English, ibat keca Elsa at geua ke ining Capampangan Version.

Nung Nanu Ya Ing Pun (Cang Felix)

Acakit mu ing cagiwan, ning anac a mamicudta,
Ing istilu ning poema, a babacas me'y Tata Na,

Anti la waring Pamana, mitmung lugud pigcalub na,
Ketang suli ning poeta, panabilin... luguran da,

Ing salitang sinese na, manibat ketang anac ya,
At angga ngening metua ne, ya pa muring gagawan na;

Nung nanu ya ing tanaman, bunga na anti ya naman
Anya babye cu ing puge, penibatan a Ibpa da,

Anti murin caring Suli, tapat pamangilala ra
King Cagiwan at parasan a gagawan na ning Pun da,

Oyan ngeni mayayakit, memuli lang meging watas,
Macule at misnang wagas, deng Poemang babalangcas,

Mipala ya ing Amanu, macanyan yang e na mate,
At dacal la pa sana, ding lulugud sari tibe.

Leguan

Legwan tutung macayama, meging gayuma keng mata
Ytang kecang panamdaman, miraras na king caladwa
Pati ing isip at pusu, e sumalang e na cambe,
Ing nasang pabalu sana, sinta nang dalise't tune.

E mu misan, e mu adwa, micasat cu king paliasa,
at ali cu mababandal, e cu biasa ping sasawa,
Anti cu waring mamadwas, pating -apun a magtiyaga,
matula Na nung manicwa, agyang asan a bilasa.

Ing babaing liguran cu, malagu yang dili cacu
Anti ya mung Miss Universe, ke ni nang panlalawe cu
E cu manakit ditac man a malyaring capintasan
Ibat babu angga lalam, macanyan ke pang panuman.

Anya nanu mu ing legwan?  E masakit pakibatan
Uling ing kecang tutucian, ing pusu mu at panamdam.

Lynne, 2011

Napun Nacadua Na

Tutu pin at melakuan na ya, ytang napun ning nacadua na,
E na ya malyaring ibalic, calupa na nitang sadya,
Mengari mu ketang malan, kinupas ne ytang cule na,
Meging matbud me at meluma, e ra ne buring isulud pa,
Dapot ytang magpaganaca, ketang napun ning nacadua na,
Mitanam ya king caisipan, keng isip mibabalic pa.

Ketang napun ning nacadua na, tenam mu la detang tanaman,
Tutugtugan la at sesesen, maralas mu lang gagambulan,
at ngeni meragul na la, ing bunga da menyaputputan,
Careng tau, pati ayup, ylang babye cabyayan.
Ketang napun ning nacadua na, nung ala ca rugung tenam,
Ing bye mu misna nang sakit, nung ala cang pupupulan.

Balicdan me ing milabas, ba mung dasan ytang bucas,
Casakitan o canawan, lalun me ing meging bacas.

Nanu Ing Beer Keng Capampangan?

Dacal la retang amanung malwat ta nang gagamitan,
Manibatan ketang napun, amanu la mung inandam,
E la licas a salita, e amanung capampangan,
At ala ta mung balac, alilan la o calingwan.

Salitang BEER nanu ya mu keng amanun Capampangan,
E wari CERBESA neman, madalas tang darandaman,
Obat iti aburi de, deng mahilig keng inuman,
At agyang malasing nala, BEER pa mu rin ing sasabyan.

Nung muli ca Pilipinas, Abe... e na ca magtaca,
Balang cantu careng baryu, agyang keta pa Menila,
Akit mu itang umpucan, mag-sayang misna na tula,
Miminum la at tagayan, lalu neng aldu ning sweldu.

At siempre BEER ing number one, paborito dang inuman,
Lalu na nung ing pulutan, azucena ya ping Aw...Aw.

Mumunang Balitang

Mumunang balitang, tutung maulaga
Sablang manigaral, carin magumpisa,
Lalu na keng baryu, neng mamanican ca,
Mumunang balitang, paindispu ca pa.

Keng Poesya macanian, tutuclu cang eran,
E ca gad miraras, matas a balitang,
Ing balang tacbang mu, ating cabaldugan
A pagaralan mu, bang mica cagiwan.

Balaus mu Abe, e ca micacunu,
Salbag mu ring bini, punla ning amanu
King linang asikan at balang tumubu
Ylang nabangnan mu, palut misnang yubu..

At ing pamamalut , kecang pipagalan,
Mumunang balitang, dapat mung balicdan.

Mengisnaua Cung Saldac

Mipangisnawa cung saldac,
king legwan na ning ikit cu,

Misusuglulu la ring alun,
maca uma king aplaya,

Alben me ing capaligiran,
ing santing na pangawilyan,

Asna linis itang balas,
ala cang akit a calat,

Itang bigang lipo lipo,
e sisiru itang lulam,

king legwan na ning babae
anting aldu a titiman

A lalacad misnang saya,
caring mata babye tula,

Calagu nang Atsing Elsie,
Pakirandam meanac ya,

Kinarug ya ining pusu,
At ing isip melingo-ngo,

Mengisnawa na cung saldac,
At ala nang acarapat.

Uling kening cabilian cu
Ing malsinta e na dapat.

Elsa Rufino

Masampat A Diwa (Don Fernando)

Puge nang Amor C. de Jesus

Don Fernandong Archetectu, gulis mung misnang deretsu,
Agyang careta nang Bersu, ing diwa mu susulagpu,
Malaut man itang bili, nu ya man danggat ning yatu,
Potang king Amanung Siswan, susulat yang inspiradu.

Anya abe king Aguman, paciapusan ya'y Fernando,
A Capampangan a tune, pagmaragul tamung tau,
E ya biasang mangalingwan, ketang cayang penibatan,
Detang taung mal pin caya, sisimpan king caisipan.

Ing mangga e mamulaclac, nung e me salaban mayap
Nung ali ing mapaliari, mamutat yang misnang salpac,
Ing Amanung Capampangan, calupa re deng tanaman,
Gambulan me at diligan, bayang mamungang manyaman.

Uling nung macalingwan ne, amanu tamung beitan,
Nanu pa'ing cabaldugan na, kecang panga Capampangan?
E wari sasamban taya, Dios linalang keca tamu. . .
Anya dapat luguran ya, itang binie nang Amanu.

Luid ca Don Fernando Garcia, king lingap mu king Salita,
Anya naman matula cu, tinggap mu cung cakilala,
E ca sasawang susulat, madalas cang mamicudta,
Idake talang Cayanacan, ketang masampat mung diwa.

Salubungan Da Ca

Busten mung queng dalit, salubung cu queca.
Bina cung mewili, caring quecang rima
Nung deng maquiabe anti la sa queca
Caul a matalic, yta culang ya pa.

Ing bondoc Arayat, atin yang catasan
agyang nuca banda quecang abatyawan
Mengari yang bante caring Capampangan
Balang e malili quetang lalakaran.

Ena ca sa micacunu malwat da na cang panayan
Uling ing amanung Sisuan samasan yaping lingapan
Ytang mebating a Singsing, pisupan yang panintunan
Bayang mibalic a cule gng sunis na at santingan.

MALAUS ca O Macudta, mapse na cang cawatasan
Sana miqui agum naka queng nanu mang pisasabyan
Deng caaptas queng ANASI  atin la ngening tultulan
Sanu cayang Ortograpya ing dapat tamung gamitan?

Ing upaya atiu queca, neng manigaral amanu
Tucyan mu itang minuna,  o maliwa cang modelu
Ala ytang sapilitan, a cailangan cang magbayu
Datang murin ing panahun, itang mayap yang magbabu.

Maria Teresa Magtuloy Evangelista

Sonetong Dapat Tandanan

Sasabian da deng mangatwa, iti cacung tatandanan
Lilan cu na king isip cu, piki abe king balutan,
E mu cacalingwan Anac, ganacan mu ing delanan
Ba cang e na malilili, dasan mu ing pupuntalan.

Dacal ca abalung aral ketang delanan mu keng bie,
Ytang maroc at matsura, ylele mu na at yugse,
Isipan mu ytang mayap, yang dapat a acayabe
Keng gagawan mu aldol'du, ba mung e dasan ing lumbe.

Nung sakaling dacal ytang dinatang a camalasan
Mitumba ca at mipase asna sakit penandaman
Pilitan mu ing talacad, at king sarili mu sabian
Yti pamagsubuc ya mu, kening canacung tetagan.

Ining Sonetong lelang cu, sana pacatandanan mu
Ing mabibie keting Yatu, yti metung neng Regalu.

Artesia, Ca USA

Istoria De Un Amor (Pamanlala)

Nung atatandanan mu pa, mag-babaintau cata,
Deng dalaga ketang baryu, maglame la pang lalala,

Lalam bale ating papag, masaya lang abe abe,
Cabang itang baintau, ligid ligid lele lele.

Macanyan tang mamag lolo, paralan ta na keng lawe.
Sangcan ta mung papaturu, pabulung bulung manene,

Anya naman ditac ditac, mebiasa cung diga diga
Calabas ning paru-minggu, tinangu ne ing dalaga,

E mu itang pamanlala ing abulu cu canita.
Itang pihican cung pusu, migising ya at milsinta,

Ing Istorya de un Amor, nitang cacung cayanacan
Angga ngeni timan timan, potang cacung babalicdan.

Inyang misan minuli cu, migpasyal cu king baryu mi,
Ala nang lalalang cupya, at maglame istung bengi,

Deng bayung tubung dalaga, alus memandaywan na la,
Pamanlalang keragulan, licwan da na at ala na.

Puge Cang Ca Marc M. Mangalindan (R.I.P.)

Potang Matua na ca

Ing tawling Soneto, kecami licwan mu
Tune mung panamdam, lugud king Amanu

Memun at meco ca, carin ipagsulit mu
Ing Amanung Siswan, ya sang gamitan mu

Carin dasan mula detang Capanalig
Panenayan daca ba rang maging cabig

King pamagtumayla dalit co king Sunis
Pakit yu ing lugud, king Dios sacdal linis.

Y caming melacwan, e ra ca calingwan
Ketang masabal mung tapat a parasan

Ing luwid ya sana, Amanu tang Siswan.
Amanung binye ra caring Capampangan.

Mituc sana keca tune Caratunan
Uling malugud ca king Ginung Miglalang.

Pamigunamgunam

Madalas ing maliliari, capanwalan mababawas
Potang daratangan na ca, casakitan at ning malas
Agad na cang micacunu, at maralas mu pang iyagcas,
Obat caya mipacanyan, mipase cang atna caplas.

Ing magcacasakit ca mu, metung caring mecalingwan,
Sana paca sanacan mung, e na ca pepaimburisan,
Ketang babie nang cayapan, dacal la reng mekinabang,
Metung ca careng liguran, dapat mung pasalamatan.

Detang dicut at sampaga tutubu ketang marangle,
Ambon, uran, pali't gabun,binye na balang e mate,
Mas la pa wari deng dicut o sampagang lingunan na,
Kesa kecatamung taung, misnang lugud lelangan na,

Deting tau anac na la, ylang dalan na king banwa;
Anya manatili cang tapat, agyang nanu mang problema,
A daralan kening bye mu, maging matatag ca sana,
Tumula ca't salpantaya, uling ing ing Dios malapit Ya.

Panamdam Capampangan

Mimiral mu kecatamu ing PANAMDAM Capampangan,
PANAMDAM a pepamana detang matwa tang LIGURAN
LIGURAN ya ing Amanu, anting tune CAYAMANAN
CAYAMANAN a mal dili, lacwan caring CAYANACAN.

CAYANACAN migising ca, damdaman mu ing GULISAC
GULISAC na nining matwa, king busal na nitang PISAC
PISAC ing meging cabilian, ning Amanung CAPAMPANGAN
CAPAMPANGAN ing sala mu, calwat mi nang PAGDULAPAN.

PAGDULAPAN mi ing aldu, mibalic ca king CALUCAN
CALUCAN yng cabilian mu, king dane na ning ASLAGAN
ASLAGAN mo caisipan ding poetang MATENACAN
MATENACAN dang iladlad, itang tune CAWATASAN.

CAWATASAN a panamdam, tatatap king CAPALSINTAN
CAPALSINTAN king Amanu e mapawi CAPILAN MAN
CAPILAN MAN ing panamdam, lugud king AMANUNG SISWAN
Ing AMANU  TAMUNG SISWAN, ing salitang CAPAMPANGAN

CAPAMPANGAN ya ing  lahi a binye  na ning MIGLALANG. !

Bunduc Alaya

Bunduc Alaya

Artesia Ca, USA