Ing United Pampanga Leaders Council v.2

Neng Almario "Amor" C. de Jesus, P.L.
UPLC Charter Parliamentarian/Director

United Pampanga Leaders Council, UPLC ing aus da,
Ing marangal a aguman, mitatag ya California,
Labing walu ning Enero, 1998 ing banwa,
Yang aldo nang kebaitan, UPLC misapwak ya.

Adwang pulu't adwang balen, keng mabilug a Pampanga,
Ting sariling "association" estadu ning California,
At deta nang labing pitu, yla retang megumpisa,
Deng Pamuntok at Lider da, masaya lang menimuna.

O'bat caya mentun dalan, mica maulagang sangkan,
Destino ning UPLC miniral ya at yang tikyan,
Lalam ning pamisanmetung, anting tune Kapampangan,
Telacad de ing bandera... lugud qng labwad a tibwan.

Mumunang pake na yla, ing mipapanyaup la ngan,
Mantabe la at sumuyo, ninu man'g mangailangan,
Caring abe abeng balen macasadya dang damayan,
Pasalamat, alang libe, e da man rugu panayan.

Ing Computer Learning Centers, projectu na qng Pampanga,
A maigit lang atlung dalan a "computers" mengapamye la,
Capitolyo at ding balen, mekisanmetung programa,
Libring pamagaral/training, ketang pamangabyayan da.

"Medical Mission" gewa na, ketang tune pamaglingap,
Detang doctor at dentista, memanulu la ping ganap,
Memye dakal a panulu, pamangan a grasyang sapat,
Balang metung manga-palwa, qng tula at pasalamat.

Nung qng kasalpantayanan naman, UPLC modelu ya,
Nobena cang Birjen De Los Remedios, ya pa ytang menimuna,
Balang balen a cayabe, tinuki at mig-debocion la,
Siyam a Sabadong nobena at lamac cang Birjen Maria.

Deng manibatan Pilipinas, at Pampanga'ng mamuntukan,
Sasalubungan na la ngan, masaya nung suportaan,
Obispo at Governador, Presidenti estimaan,
Masipag yang makirungut, at ali ya mangabiran.

Ing UPLC aliya mag bidabida o maki-pagkompitensya,
Pamakiyabe'ng marangal parang tawu yang gagana,
Deng Fil-Am a associations, UPLC modelu ya,
"Prestigious Organization" ing UPLC karela.
Mi abe abe mipapanyaup... matibe buklud ning lugud...


U   P   L   C

U - ling ing Dios yang mumuna...
P - ati Balen cayabe na...
L - ugud parang tawu caring cabalen lalu na...
C - atalawran at Katuliran, careng egana gana...


Luid ya ing UPLC; Luid ya ing Pampanga;
Luid la reng Kapampangan at Luid ya ing Amanung Siswan!

See version 1 (graphic, 2009); version 3 (text, 2011).

Ing United Pampanga Leaders Council v.1

UPLC

See version 2 (text, 2009); version 3 (text, 2011).

Luid Ka Poeta Hernan Saban

Babye cu ing cacung puge, at matas a cagalangan,
Qng santing  ding poema mu, malalam la cabaldugan,
Ela matsurang isinup, qng caban ning caisipan,
Potang datang ing panaun, turu caring cayanacan.

Inyang misan ginale cu, at ecu rugu sasaryan,
Careng siglawe poeta, ing lagyu mu mecalingwan,
Samantalang ing balu cu, metung ca careng lalawan,
Biasang sumulat poema, a dapat dang pacyapusan.

Saludu cu keca Hernan, babasan cu reng poesya mu,
At dacal cu ababalu, qng santing da ding estilu,
Uling ing kecang cabiasnan, binye na ning Apung Guinu,
Yti e mu serilinan, tuturu mu careng tawu.

Salamat at cayabe ca, qng Anasi'ng Academya,
Poeta cang mababa lub, pamagparatot ala ca,
Mapinu lang cawatasan, ating aral a turu da,
Eca mataram a dila, eca biasang mamanyira.

Madalas me sang gamitan, itais me't pakinangan,
Ytang pluma ning Lira mung, babye tula at cabiasnan,
Dacalan mu reng punla mu, butil na ning cawatasan,
Maragul lang cayamanan, ing mayap kecang pupilan.

Luid ca Poeta Hernan Saban!

Luid Ya Ing Amanung Siswan

Cayama cung mekirandam, ketang migale poema,
Caibat yu pung miputungan, anting Poeta Lawreta,
At yta nang cagiwan yu, matenacan a Poeta,
Qng masanting diling Sabi, dane aslagan o Asia.

Cabang dudungdungan ke pa, ing poesyang belangcas yu,
Emu mapilan a besis, gagale cu ring amanu,
Amanung mipnu qng lambis, amanung sacdal qng yumu,
Ytang Isip at Panandam, yng tula na yang lalapu.

Inya linub qng isip cu, deng poeta aliwa la,
Caretang tawung lelangan, keti metu a sicluban,
Ing carelang cawatasan, pinili na ning Miglalang,
Enu inabe qng Babel, caring amanu nang gilwan.

Lugud qng Amanung Siswan, cayantabe na na ning bye,
Macananu ke mang basan, ya mu rin ing pamibule,
Agyang dimut mung cagiwan, magpilit cu ping gumale,
Ing munye cung pasalamat, at kilala yucung abe.

Mangapcap cung cawatasan, qng caban ning caisipan,
Qng pamanyulat, gagale, Deng poeta pacyapusan,
Magumpisang pagaralan, ing masanting a poesya mu,
Paninapan cung pinandit, a gale ke arapan yu.

Salamat mal a Poeta, pangadi cu ing lumwat ca,
Bacang dacal a atanam, cawatasang kecang lacwan,
At deti pupulan dala, deng lulugud salita ra,
A tutuking cayanacan, qng labwad ning Capampangan.

Luid ca Ari’ing Parnasu, at Ari na ning Alaya,
Luid ca O Capampangan, amanung cacuang beitan,
Luid ya ing Academya, ing ANASI' ng ausan da,
Luid ya ing Pilipinas, mal a labwad, mal tang tibwan.

Marites M. Evangelista, Ing Musa Na Ning ANASI

Mibansagan yan ping Musa, qng lagu at cagiwan na,
Agad yang manalacaran, ketang Aus na ning Lira,
Retang Bersu at ing Rima, papakit nu caring poesya,
Ila ngening gagawan na, ketang librung belangcas na,
Tapat at tune malugud, ketang mal a amanu na,
E ya manginayang pagal at panaun gugulan na,
Sumulung mu at sumala ing Amanung beitan na.

Marandam la balang suluc cawatasan qng legwan da.

E balang anac a Eba, susulat la at mamoesya,
Viva ta ya y Maritess abe tamung manimuna,
A gagaleng sacdal timyas keta qng Radio Pampanga,
Ning Parnasong Capampangan a tutu nang caluguran.
Gugusal yang alang binit, Qng ANASI tang aguman,
E ya sasawang makibat, detang Puna pakibatan,
Lulub capa king ANASI, masaya nung salubungan,
Ing bisang maki-aguman, makiabe qng talbugan,
Saguli  mipandatun la,  qng ganaca na at legwan,
Timan, lugud ampon puge, ing agad naping iampang,
Anya anting  mal a Musa't, ibwat taya't palacpacan.

Meging Poeta Lauredu, ning Amanung Capampangan,
Reng king KP masaya la, at king AKI modelu ya,
Sasaup yang alang sawa, pamanuru king Amanu.

Pamananggap Galal, Anting Poeta Lawredu

PUGUE CARING SABLA

Almario “Amor” C. de Jesus, P.L. (Ing Agila Ning Apalit)

(Bayu cu pu malaus keng canacung catungculan a gumale poesya, Manyad cung pinandit a yagcas cu ing “Pugue”, “Pasalamat” at “Pawaga”, caring sabla.)

Ing mayap a caorasan, kekayu kaku yang babye,
Pasalamat kung maragul, tinggap yukeng masalese,
Qng Aguman Capampangan, Atsing Mina Talajare
At caring mangasipag at mangalagu nang Cayabe.

Pugue cang Sir Ernie Turla, Pamuntok ning Academya
Qng sipag na at cagiwan, ing ANASI mitatag ya,
Cayabe ne y Atsing Anggie, ing malagung cabangal na,
Lulub capa mu bale ra, asnang saya sagana ya

Luid  Poeta Lauredu, Renato Bonus Alzadon.
Anting Ari ning Parnasu, babye cu po’ ing cagalangan,
At tuki cu gulutan na, keng masanting nang parasan,
Isalba ya at pamingwa ing Amanu tamung siswan.

At cang Sir Benjamin Yuzon, UPLI tatalnan na,
Salamat , pagmaragul cu, itang galal a binye na,
Midinan cung inspiration, menigaral, migsicap cu,
Disnan cu ing paintungulan, milub cu ketang Parnasu.

Careng abe cung poeta, at caaptas Academya,
Piling Poeta Lawredu, mangayap la ampon biasa,
Lalu na qng cacung maestro, poging pintor Raf Maniago,
Cang poeta Pids Rivera ning ANASI’ng secretaryu
Pasalamat cu kekayu, kilala at tinggap yucu.

At cang tatang Felix Garcia, pamuntuk na ning AGTACA,
Secretaryu Rom Rodriguez, principi na ning Parnasu
Ing “Rotarian” Josie Henson, nitang DILA at AKAP pa
Asyas cong telacaran na, ning Bonduc na ning Alaya. . .

Capampangan a malugud, macamal a Amanu da!

PASALAMAT AT PAWAGA

Pasalamat, pacamalan king pinutung yung dangalan
Meging Poeta Lauredu ning Amanu tamung Siswan,
Anya naman pangacu cu luguran ke’ ing Capampangan
Agya mang ing bye poeta, dacal itang casakitan,
Pagluwalu, pamingwa ke, ing dangal na at santingan,
Ning masampat diling Sabi, a binye na ning Miglalang.

Detang matwang talasulat, galang culang ting sasamban,
Guintung “libru” a bisni ra,  sundu tala e pabustan,
Caring mitmung yumung dalit, igale cung misnang miuman,
Gng Dios, Balen, parang Tawu, matulid at catalauran.
Mebye cung meging poeta, at qng lira manigtigan,
Mye cu’t mate poeta na, ning Poesyang Capampangan.

POEMA

“Ing canacu pung Poesya mica titulu yang Lugud qng Mal a Indu at iti iparikil ke caring sablang Indu, lalunglalu na caring atyu ngening pesitagun.” ➡




This composite poem was declaimed by the author when he was recognized and proclaimed Poeta Lauredu Ning Capampangan by the Ari Ning Parnasu Renato B. Alzadon, Aguman Capampangan and Academya Ning Amanung Siswan International at Portland, Oregon on September 6, 2009.

O Santo Cristo Del Perdon

The Crucified Jesus

Y Jesus Ala yang Ypus O Alipan,
Obat ausan yang Guinu?

Ala yang liban a "universidad" at
eya mica "degree" O Titulu,
Obat mayayaus yang Maestru?

At lalung eya gagawang Panulu,

Uling eya parmasyuticu,
Obat ausan deng "Healer"?

Ala yang panlaban a "Army" anti'y Ceasar,
Obat pitatacutan de ding aliwang Ari?

Eya mikeguerra nanu mang balayan,
Obat simbut ne ing Yatu?

Sasabyan da ala yang bacas Casalanan
at ala yang gewan krimen,
Obat dinalan yang Lasa at
Mipacu ya qng Cruz?

E wari mete ya, kitkut de keng burulan,
Obat y Jesus Mabye ya.. NGENI.

Sto. Cristo del Perdon

Nanu Pin Kaya?

O Kaka...O Kaka... at atsing maputla,
Ngeni balu tana ing tawling balita,
Protesta nang Lilia, wayta sinulung ya
Ya ing penigan na ning Korte Suprema.

Y gobernor Ed Panlilio canyan ne mica problema
Uling culang ya pin pera gastusan ketang protesta
Detang atipun nang limos, mengulapu king baul na,
Barya la mu rugu reta nung cumpara me cang Lilia.

Deng Advisers nang Among Ed, anya ngeni mimisip la
Ating sasabing cuma la, ketang balas mangupit na,
O caya careng projectu ing commission adwan na ya,
O manyad la careng tawu contributions at saup da.

Agyamang magigipit ya ing Pari keng maliliyari
Ali...Ali...Nunca...Never, ecu buring gawan yti,
Ining pamagcandidatu, pamagpari linele cu,
Uling buri cung luminis, gobyernu king Capitulyu.

Mengadi ya itang Pari, anting sadya nang gagawan,
Menyad yang saup king babu, nung nanu ing dapat gawan,
Nung tutu ping Calbaryu ya, ing obrang canacung liban,
Dinan mu cung caisipan, king malinis a paralan.

At bigla nang mibulalag, caring TV at keng Diaryu,
Ing tagal neng Presidenti, Paring meging politicu,
Ytang buri naping Bise, gobernador Nueva Viscaya,
Malinis at Morlidad, yang plataporma dang adwa.

Careng mamarap keng Balen, bisang maging Presidenti,
Batican lang politicu, kilala da nu ngang "trapo"
Y Panlilio at Podaca, nung yla ping icandidato,
Alang "issue keng corruption" maki dangalan lang tawu.

Ing Sarswelu Capitolyu, sasanting na ing pulayi,
Deng eksenang mayayakit, eta balu ing tutuki,
Angga ngeni isipan ke, nung nanung caugnayan na,
Panlilio for Presidenti, ketang protesta nang Lilia

NANU PIN CAYA ? BALU YU po?

Lilia Pineda, MVP, Mayor Jun T.

Contextu ning poema
Bise Ed, Cong Mon, Mang Carlos, Abe Anac ning Arenas, at aliwa pang Caaptas:
NGAYU PA YA?. . . Pangasanting ning sinulat yu. Yti caya mangabaldugan a mancanyan la naman panandaman ding calupa tang Kapampangan cang Among Ed?. Nung wari sa keng "Survey", buri ya pang tagal pasibayung gobernador O munta ya babu ba neng alilan y Madam Gloria?
OBAT MIPAINTAGUN NAMAN. . .at malamang abalitan yu na, yng protesta nang Lilia Pineda ketigan ne ning Korte Suprema. Ybalus dong buclat deng urnu at bilangan da ing boto. Anti murin, pepalwal neng press release at meinterview ne y Among Ed, bisa at malaus ya namang cumandidatung Presidenti 2010. Ene bisa Capitolyu, Malacanang yang puntalan.!
Nung sakaling miswerte ya ing Pari a maging Presidenti, Nanu Kaya... Agyu Na?
Tuglungan ke ing POEMA (Ing Bie Ning Gobernador), at sana mikitalbugan cong pasibayu bata lang asanac detang mikipanandam kang Among Ed at balen Pilipinas.

Lugud Qng Mal A Indu (v. 3)

I

Ing lugud qng mal a Indu nung ipinta me ing cule na,
Pinturang guintu at pilac ena abye ing tingcad na,
Uling ing sintang binye na menibatan qng pusu na,
Pinunla na at sinese meging ligaya na kaya.

II

Ninu wari y Indu mu? anting metung yang cometa,
Mabilis pangabulasuc kinislap menibat banwa,
Qng dalumdum na ning bye mu pepakit na ytang sala,
Biklat nu ding kecang mata lugud at dalise sinta.

III

Siyam a bulan mabuctot ya cambe ning sakit at dusa,
Alus ytang camatayan yang meging cayantabe na,
Ena na picabyang yta ligaya na’ing mibait ca,
Uling daya na ca’t laman ning laman na at daya na.

IV

Magcanta yang papasusu qng candungan matudtud ca,
Terac na ca’t panaplusan at panirug ing uma na,
At cabang daragul na ca ytang mayap tuturu na,
Lugud qng Dios, parang tawu mal a balen a tibwan na.

V

Anya nung maangu ne bye pacamalan a Indu mu,
Anti neng mepitna keca ing sala na niting yatu,
At ytang silbag nang lugud nitang mal a Guinu tamu,
Cabud na mipanpan keca calmang lumbe pibatan mu.

VI

Ala na ngening mamapis cacaul, mumuma keca,
At ala nang mituturu sasaup keca mamingwa,
Ninu ing agad lapitan qng busal na nitang lugma,
Dili mu na mung tatangis pibatan mung meging calma.

VII

Talaga yatang macanyan ing mabibye lalam banwa,
Masaya cayabe tula ating lungcut tumulung luwa,
Anya iti tanggapan mu yumu’t pait alducan la,
Neng iti yang caburian na nitang Dios tang Mayupaya.

VIII

Uling deng sablang melalang tutuki la ketang agus,
Nung nucarin ytang sabla ketang dagat ngan tataglus,
Keta nang pangabait mu nanung tawling caulyan mu,
Ytang dataorng mu pang bucas gabun ni’ya ing pagkeran mu.

IX

Anya ica o penganac emu dapat cacalingwan,
Cabang caba na ning bye mu itatac mu qng caisipan,
Ing lugud ning kecang Indu yti alang cayangganan,
Tapat e pamagcunwari lante guintu’ng panandaman.

X

Puryan la deng Indu tamu ytas tala qng calucan,
Ytang puri dang ingatan eta mu dapat musingan,
Casampat na sana Indu nung malyari mu sang gawan,
Tipunan cu ngang sampaga mitmung lugud keka iyampang.

Portland, Oregon, Sept. 2009
Ginale Poema, Proclamation, Poeta Lauradu
See version 1; version 2.

Lugud Qng Mal A Indu (v. 2)

I

Lugud mu qng mal a Indu, nung isulat me keng pluma
Detang tintang guintu’t pilac, ena abye ing gayuma
Uling ing sintang binye na, menibatan qng pusu na,
Pinunla na at sinese, meging ligaya na kaya.

II

Ninu wari Y Indu mu? Anting metung yang cometa,
Mabilis ya pangabaldug, kinislap ibat qng banwa,
Qng dalumdum nining bye mu, pepakit na ytang sala,
Biklat nu detang mata mu, lugud at dalise sinta.

III

Syam a bulan delanan na, anggang sakit pibata na,
Alus ytang camatayan, e mamacu qng siping na,
Ena na picabyang yta, ligaya na' ing mibait ca,
Uling daya na ka’t laman ning laman na at daya na.

IV

Magcanta yang Pepasusu, ena balu ing gawan na,
Terac na ca’t panaplusan, mumuma yang alang sawa.
At inyang magaral naca, ytang mayap tuturu na,
Lugud qng Dyos, parang tawu, mal a tibwan a balen na.

V

Anya nung maangu ne bye, pacamalan a Indu mu,
Anti neng mepitna keka, ing sala na niting yatu,
At ytang silbag nang lugud, nitang mal a Guinu tamu,
Cabud nala mu mipanpan , calmang lumbe pibatan mu,

VI

Ala na ngening mamapis, cacaul, mumuma keca,
At ala nang mituturu, sasaup keca mamingwa,
Ninu ing agad lapitan, king busal na nitang lugma,
Dili mu namung tatangis, pibatan mung meging calma.

VII

Talaga yatang macanyan, ing mabibye lalam banwa,
Masaya cayabe'ng tula, ating lungcut pati na luwa,
Anya yti tanggapan mu, aslam, pait alducan la,
Neng yti ing caburian na, nitang Dios tang Mayupaya.

VIII

Uling deng sablang melalang, tutuki la ketang agus,
Nung nucarin ytang sabla, ketang dagat ngan tataglus,
Keta nang pangabait mu, siguradung caulyan mu,
Ytang datang mu pang bucas, gabon ya ing pagkeran mu.

IX

Anya yka o penganac, emu dapat cacalingwan,
Cabang caba na ning bye mu, itanam mu king caisipan,
Ing lugud ning kecang Indu, yti alang cayangganan,
Tapat e  pamagcunwari, lante guintu ing panandam.

Lily, Rosa, Dunie and Let

See version 1; version 3.

Ing Bie Ning Gobernador

Kaka..... O kaka.... sagacgac at tula
Ecu apigilan kening pamamasa,
Detang susulat dang pasiag, babalita
anti mung comedya O sarsuela kaya.

Obat mipacanyan lulub king isup cu
E wari y Among buri de deng tau?
Ing moralidad na ampung pangatau
Ala lang asabi mas biasa ya kanu.

Nung Gobernador ca, taung mamuntucan
Metung a probinsyang kekang sasacupan
Emu moralidad ing kekang gamitan
Uling politica marinat a luban.

Agyamang balu mu itang theologia
Pamanaral tau e pagcasakitan
Yti eya sapat king pamanunculan
"Diplomasya" murin yang dapat mung tukian.

Emu basta cabud istung milucluc ca
Agad mung alilan disnan mung "sistema"
Agyamang nang santing ing buri mung gawan
Macacalale ca kekang pagaralan.

Ugali ning tau keta kekatamu
Masakit yang tutung pakibagayan mu
Dacal lang lalapit kareng politicu
Istung eca bisa calaban ka canu.

Ytang malilyari carin capitulyu
Dacal ke abalung tutu pa keng diaryu.
E sana paysupil lumaban yang ustu
Ba namang magbayu ing sistema tamu.


Nung atin mang mituturan caring batong besibas yu
Ela sana manasakit o mimimua kekatamu
Uling iti cailangan ya bang abalu da ding tau
Nung nanung clasing gobiernu ing mimiral capitolyu.

Dinan de sanang panaun ing kekatang gobernador
A pagaralan nang ibayu gewa de retang cubrador
Alben dang miamasamas ela basta manyad pabor
Era agad sisingilan bayad caring "contributor".

Malapit na ing election, nung sakali tagal ya pa
Nung dapat O aliya na ya, "Second Term" ibye pa caya?
Nung midayu ing "corruption" ketang pamanungkulan na,
Keta king National Government, siguru dapat munta ya.

NGAYU PA YA?

Louie Uy and Gov. Among Ed

Para king katuglung na ning poemang ini: Nanu Pin Kaya?

St. Anthony de Padua, Frayle at Doctor

Anthony ning Padua, Santung Patulunan
Ning Franciscan Order, at ding Agustinian
Tikyan ne ing Guinu, likwan na ing pibandian
Haleluya, penaral na ing Banal a Kasulatan.
O bat mirasnan yang sakit, e melaus babalakan,
Nasang karetang Moors, manaral at saupan nala
Ya, ing kilala at biasa, lupang Frayle tuturu na.

Detang librung teologya, escriptura't , kawatasan
E kinupas bitasa man ita nang kayang kabyasnan.

Patron de deta nang manaliwa ketang dalan,
Ampung mibabayu king bye, milalapit king karukan
Dapat at pusu na, kang Cristo binie na ngan
Uli na pin nita ing sabla at eganaganang miuman
At ing bage bage penalig na king Dios a sasalpantayanan.

Sermon nang Anthony, yti ing sasabian na
Anti mu reng santu, balamu tala at batuin la
Na ela basta't saslag pakasalikut la, at ustung laltu la
Tukyan de ing Aus ning Dios karing tau sumaup la
O yan ing meging bye na, Santong Anthony de Padua.

Metung careng minuna cung poema at peparikil ke cang Dr. Antonio C. Quiroz, Poetang Taga Apalit, Pampanga, Philippines

Pamanlalang Dase

Dacal na ing menaliwa ketang Sucad a baryu ta,
Nung nun ya macataluntun Rio Grande ning Pampanga,
Ing balitang Arnedo Dike alus menga tibag naya,
Anya neng dagul ya ing ilog deng tawu mag bacwit na la.

Inyang anac pa ing bili nung agaganaca mu pa,
Balang bale deng babai obra da pa ing lalala,
Ala cang ackit mandaywan alang mamacu carela,
Alang mag-"domestic Helper" O Japayuking aus da.

Ngeni rugu detang Ebus megisan at mewala na,
Ala nu retang "biyajeru" maca"cascu" lang magtinda.
Anya ngeni reng babai era na balu ing lalala,
Keraclan tinu "abroad" anting ipus ing obra da.

Anyang ala nang lalala Cabud na la mipaburen,
Detang aliwang salitang malwat da nang gagamitan,
Basan mu lang masalese At pilitan mung tandanan.
Nung dapat la pang ibalic keng kekatang pisasabyan.

Potang sasali cang Ebus Manenaya ketang dungan,
Makisiglulu cang mamwat ysaka mu ngan babu dalan,
Mamirapal mung BALBALAN ding Ebus at PALANGPANGAN,
Saka mu idayu ing Tingting tunggal tunggla mung TISTISAN.

Ytang Ebus a METISTIS agad da nang SAPUNGGULAN
Bang ketang TUKUNG a lata dapugan la't pacatamban,
At potang melaga nala YKID da nung mirarapal,
At ibilad lele dalan SABUNGKEN dang misnang dapal.

Panga langi na ning Ebus MANALESE na lang agad,
Aptasan dang sapasapunggul bang king ilog da IBABAD,
At istung metulid na la ing baluctuc ala na ya
Pasibayu dang ibilad ing Ebus paka ylera.

At catacup na ning silim detang Ebus pa-ambon la,
Ba ping lambut ing catawan at mayan la ping AYKIRAN,
At mipilang pamung aldu anda ra ne ing TISTISAN,
At BULAYAN da ing Ebus at saka ra pamututan.

Gawan da na ytang MULA ya ing umpisa ning Cupya,
At saka nala MANGUPA Yta ing peka-buntuc na,
At caibat PALDASAN da nung nanu ing lapad na
At saka nala MANYUBLI yari na ing pamanlala.

Potang aldu ning Dominggo dumalan yang MAGCUCUPYA,
Saliwan na la't bayaran detang ayari mung Cupya,
Samasan na lang gupitan plantsaan at almirisan,
At agad na nung ybyaji keta king Binondo Menila.

Mewala nu retang Cupyang a megawa kareng Ebus,
At deng Cupyang asali mu gawang plastic misnang pali,
Detang Cupyang gawa tsina king palengke micalat na,
"Cottage Industry" Apalit ngeni rugu mewala na.

Macanyan ya ing Amanu Anti yang Ebus a Cupya,
Linub ya ing Cupyang "plastic" Tagalog anting "lintik",
Nung Ebus mesambut ya King Plastic a gawa Tsina,
Ing Amanung Kapampangan Pamingwa, ylaban taya.

Albug king Sucad

2009-07-14 Norwalk, CA

Lilibeth, Libu-libong Tula

Libu, libong tula, ing digpa kanaku
Inyang mikilala kata, kinarug ya ing salu,
Lawe mung asnang lagkit, at timan da ring mata mu
Ilang pepasaya kaku, me anak ya ining pusu.
Balamu malwat nang tutu, sadya katang mikilala
E wari makanyan ing panandam nita ning mumunang sinta
Tambing kung mengangas, kaulan da naka sana
Hay, Atsing Liling,emu sana ikakamwa ining kakung Pamatula.

Nung atatandanan mu, pig-tumayla ra kapa
Itang "dalumdum ning bengi" yang kakung meging harana,
Nanu itang gewa mu , mig-karoaki at kinending ka
Ganadu kang memagkanta, meluma la reng artista.

Anya deng kaaptas keng Anasi, maaga lang kayabe ka
Nung malyari mu sana balang pinandit ati ka
Agad lang misusuglulu, lalapit papansin keka
Sasaya ing pamitipun, nung king libutad ati ka....
Ika, ing malagung Rosal, king ardin na ning Poesya.

Tagulele Ning Milsinta

Cang Isabella, Caluguran Da Ca

Ating metung a dalaga  a canacung apalsintan
legwan nang pambihira, ecu malyaring calingwan
ing ugali at pangimut, babai yang Capampangan
capilas ya waring bulan, potang ackit meng titiman,
inya alus memulang cu, inyang misan nacu licwan.
angga ngeni dela cupa, ing sakit ning pilubluban.

Caibat ning dacal a banwa, miikit keng e sasarian.

Qng kecaba ning panahun e migbayu bitasa man
uaring ababacas cupa lupa na batal at canwan 
istung panaplusan cu ne ketang yumu at pacamal
as neng tula at babye na ligayang sampat at dacal.
macanyan man e  cu balu biglang migbayu ing bili
bakit caya menaliwa licwan nacu king palsimi,
agyang nanu ing aus cu ala nang capakibatan
o rugu, ot mipacanyan ining cacung capalaran,

Casakit na ning malsinta lalu na nung linaut ya
angga na cang tagal tagal magpalimos keng lugud na
labis na cang mangainipan anting tulalang manaya,
ustung cayi e mu balu ketang lumbe tatangis ca
GUINU yang kekang ausan bacang midinan sicanan
uling misna na cabayat king pusu mu pupusanan.
reng penandit gigisanan babalic mu ing delanan
anting yumu ning alala nitang ginulut a sinta.
nya sana o mutya cu ibalic mu ytang ligaya.

Detang litratung binie mu a malwat nang sisimpan cu
alus ylang casabi cu kening pamangulila cu
capilan kaya malyari ing magbalic ca canacu
asahan mung manenaya anggang mapupus ing bye cu.

Nung atin ya mang calagyu ing Poema, iti e pu sasarian at ing sabla bacas na ning milabasan

Nanu Ing Tutu?

Nanu mu caya ing Tutu...
dapat tamung panintunan?
Anti ca waring  Diogenes...
a susulu neng caugtwan?
Nanung maulaga keng bye...
a dapat mung pagdulapan?
Deta nang batong brilyantes...
guintu't perang cayamanan?

Oy' tang  matas a Tungculan...
upaya, ticdi't cabyasnan?
Gelingan keng pamamasa...
king banal a casulatan?
Mapalyari kening bye mu,
ala na cang panintunan,
Uling atyu na ngan keca,
keng  yatung pamangailangan.

Dapat ganacan mu sana,
itang kecang caligtasan,
At yang pacasamasan mu,
paintunan me ing catutwan,
At nung dudungdung cang biblya
Amanu yang pagaralan,
Uling metung ya ing dalan,
ba meng ackit ing Miglalang.

Ing sabla keti king Yatu,
melalang uli ning Berbu,
Ing  Berbu o ing Amanu
ya mu namang meging Tawu,
Bata yang lubus abalu
king Aske na ampon Anyu,
Pamagaral king Amanu
Ipakit na ngan kecatamu.

At ica O Capampangan,
nanu mu ing Salita mu,
A dapat mung pacamalan
uling binye ne ning Guinu,
Yti at alang aliwa,
nune siswan mung Amanu,
Yang pematad da ping pusad
at mitatac king pusu mu.

Anya sana itang  Tutu...
ing dapat a panintunan,
Ytang banal a utus na...
caministilan yang tucyan,
At ing tune Lugud king Dios,
at parang tawu mu naman,
Yla ding tune Catutwan...
maging kecang Caligtasan.

Misan Ginale Cu

Misan a pamicatagun, mekiabe cu't tinagun
Keng masayang "birthday party", nitang cacung caluguran
dacal la retang dinalo, alus Capampangan la ngan
Anya at nake casaya, alang tucnang cumustaan.

Menyapucaki’ng  pamanganm alang patad ing terac da
At atin pang magsalita, liwas liwas lang magcanta,
Dapot lubus cung magtaca, pane rugu ing Inglis da
Inya migsican nacu lub, lepitan ke ing Emcee ra.

At saka cu pin sinabi, nung malyariu gumale cu
Uling buri cung parandam, ytang tune tang amanu
At agad nemang mebisa, buri cu ing samasan mu
Anya naman migsadya na, pelipit cung balugbug cu.

Anyang pakilala nacu, ala rugung papalacpac
Era ticnangan ing cwentu, saca la pa sasagacgac
Dapot inyang umpisan ke, ing poema cung busilac
bigla la ngan menajimic, maglalaweng anting maclac.

Potang bugnus me keng gale, ing siswan tamung amanu
Detang balang cawatasan tuki ya ing pangimut mu
Balamu duduyan mula, ing bosis pabayubayu
Ing yumu’t cabaldugan na, manibatan king pusu mu.

Pagtumayla raca diosa, tagulale qng dalaga..."
Macanyang keng inumpisan, ing gale cu ketang mutya.
At linawe ya canacu, marayuput ing timan na
Nung emu pin macarine, bisa na cu sang dumiga.

At anyang mayari ne po, ing canacung pamamoesya
Daig ke pa ing Poeta, king palacpac a binie ra.
Dacal lang ginalamanu, at dindam cu pa carela
Canyanman nang darandaman, ytang poesyang Capampangan.

At agad pepabalu cu, atin taping Academya
Nung bisa lang manigaral, at balican ing Cultura
Ing ANASI king "Internet”, dacal itang abalu ra
Istorya ning Capampangan, powesya, pulosa at canta.

At nung poema ing buri, basan da lang macuswelu
Ding poema di Alzadon, Turla, Laquian at Maniago
Anti murin ytang Castro, Saban, Pena, Rivera, Soto
Sale, Rodriguez, at Singian, Arenas at Tolentino.

Basan yu ring articulo nang Ben Yuzon, Nancy Lagman
Garcia, Tantingco at Babal, itang anac a sisig-man,
Ing malilyari Pampanga, king ANASI mibabadandu
King uli  ning Pamagcusa, Rodriguez at Josie Castro.

Caring maldang Capampangan, diasporang meturingan
Eye sana cacalingwan, itang amanu tang siswan
Eme sana picarine, nucarin mang catatagan
Uling Ing dayang mamagos, keng utak mu at catawan...

"Ytang dayang Capampangan, daya re retang marangal"

    Luid ya ing Amanung Siswan,
    At ing lahi ding Pampangan;
    Luid ya ing Mal tang tibwan.
    Ing ANASI at Poetang Capampangan!

Nung Balu Cu Mu Sana

Nung balu cu na mu sana, iti yang tawling pinandit
a ikit dacang matudtud, painawa ketang cama,
ing ulas mu semasan ke, itang eca micarimla
at lubus cu pang mengadi, qng Guinu tang Mayupaya.

At nung balu cu mu sana, ya na ing tawling panlacu
ing acakit da na cang lulwal, ketang pasbul mamun macu
metalic sa ing caul cu, penuma labi at lupa.
inausa dacang magbalic, pasibayung gawan cu pa.

Nung balu cumu pin  sana, ya na iting catatawlian
damdamam cu ing bosis mu, a purian cu king catasan
sana gewa racang video, balang kimut mu o sabian
ala cung sawang piyalungan, madalas pakirandamdaman.

Rugu nung balu cu  sana, ya iti ing tawling dili
binie cu sa  ing pinandit, at e ca magdilidili
malambis cung tagulele, tune catang micacasi
Emu itang palague cu sadyang balu mu na iti.

Nung balu cu na mu sana, iti yang tawli tang aldu
E ca mig-adwang salita, ing pating-apun pisulu
Uling balu cung dacal pa ing daratang ta pang alduldu
Pepabusten cung milabas, ngeni rugu sisisyan cu.

Alimbawang migcamali, aldung aita  e canacu
buri cung pabalu  keca, macananu ing lugud cu
At ica mu ing luguran, Cabang caba na ning bie cu.
Angga caring aliwang bie, dadalan ke ing lugud mu.

Tutu pin  pala ing bucas, e me basta ipangacu
cayanacan o matwa, keti babo na king yatu
nung itang pinandit a'y ta, tawling miparikil cacu
ba cung aparandam keca, ytang tune a lugud cu.

Anya sana kecang caulan, talnan me't pacaingatan
ngeni mu ring oras ayiti, itang kecang caluguran
isitsit mung misnang lambis, pacamal mu at panandam
ya mu ing kecang palsintan, e magbayu capilan man.

At dinan mu pang panaun, sana madalas mung sabian
Ba yang ena manandaman, ketang kecang camalian,
I'm sorry, Panupaya mu, Thank you, mingatan ca mu sana
I love you very very much, ika mu'ng cacung luguran.

NB: Culled from the tragedy at the World trade Center, NY USA

Lugud

Macananu ya ing yatu, nung ing Lugud ala na ya?
Nanu caya ing ugali, ding tawung palpicasala?
King mabilug a sicluban, alang patna ing patayan,
At caring mabye pang tawu, maging dios de ing carucan.

Ing Lugud nanu ya keca, nanu ing cabaldugan na,
Nung yti bilin  ning Guinu, caretang apostoles na,
Dapat detang kinabus na, ketang utos mamintu la,
"Ing micacalugud cayu, anti'ng lugud cu kecayu.

Nung atin mang tune Lugud, alang cupas king panamdam,
Lugud a dapat mung gawan, maygit para caninu man,
Ybie mu ngan ytang Lugud, caladwa mu at catawan
King Dios a mapangalalu, ya cabud ing dapat samban.

Nung tutung ing sarilu mu, dapat mung kecang luguran
Uling yti yang "templu" na, espiritung cabanalan,
E me sana mumusingan, keca yang pacaingatan,
Ganacan mung ytang "banal", atyu keca manucnangan.

At caring para mung tawu, cayabe  no  ring casalang
Gamitan mu itang Lugud, ketang muwa da yang panlaban,
Nung atin lamang agawa, mesakit ca pilubluban
Caulan mula at tanggapan, cambe ning capatawaran.

Uling ing Lugud utos ya, ning Guinu tang Mayupaya
Ycang tawung lelangan na, caministilan tupad ya,
Lugud  a atyu  Isipan, eya cabud mu panamdam
Pilitan meng maging Dapat, at yti agyu mung gawan.

Detang Malugud a Pusu, tanaman la O masetas
Misnang Lugud Caisipan, yla ring Uyat a Masyas,
Ding Malugud a Amanu, Sampaga lang pangawilyan
Ytang Mayap namang Dapat, ylang Bunga, sacdal yaman.

        ULING ING DIOS YA ING LUGUD...
        ING TAWU LUGUD YA NAMAN...
        KING LUGUD  TAWU BEIT YA...
        AT KING LUGUD  MABIBIE YA...
        AT KETANG CAMATAYAN NA,
        ING LUGUD TUKI YA CA YA.

De Jesus siblings

Ing diwa keng panga-balangcas na ning poema, menibatan ya keng pamamasa cu king biblia (see translation in English).

Lugud Qng Mal A Indu (v. 1)

Nung kekang isulat, lugud mu king Indu
Letrang pilac, guintu, ela pa macagyu,
Uling Sinta caya, menibat king pusu
caring candungan na, meragul, tinubu.

Ninu mo'y Indu mu? metung yang cometa,
mebaldug, kinislap, bayang munie sala,
king dalumdum ning bie, biclat nu ding mata
akit dang dalise at tune a sinta.

King pangabait mu, itang delanan na
alus camatayan, yang meging dalu na
ena na picabyang sakit pibata na
baca mu sang luntu keti king masala.

Pepasusu naca, at peparagul pa
caring uma't aplus a alang capara.
at king pamagaral, ing sabla tiru na
itang lugud king Dios, tawu at balen pa.

Anya nung maangu ing bie nang Indu mu
anti neng mepitna, sala na ning yatu
ing silbag nang lugud nitang mal a Guinu
cabud niya mipanpan , lumbe pibatan mu.

Ala nang mamapis, cacaul mumuma
ala nang tuturu at keka mamingwa
ala cang lapitan busal na ning lugma
dili cang tatangis, king bigu mung calma.

Macanyan mabibie keti babu yatu
nung atin mang tula, sumangid ya ing luwa
Yti tanggapan ya, , pait alducan mu
Nung ya ing caburian nitang Mayupaya.

Deng sablang melalang, tuki la king agus
ing sabla mumuli, king dagat ya taglus
king pangabait mu, nanung caulian mu
King datang a bucas, maangu ing bie mu.

Anya o Penganac, emu sa calingwan
Anggang mabibye ca, tanam qng isipan
Ing Lugud ning Indu era apantayan
E pamagcunwari, angga qng cutcutan.

Apung Osang

See version 2; version 3.

Inyang Matuli Ya Y Adan

Inyang matuli ya'y Adan minta yapa lalam cwayan
Ing darala nang batacan yang ginamit nang pucpucan
Ala pang campit canita batong sampad ginamit na
Sinabeung ing gulisac ketang caplas a dimdam na.

Deng king Eden mengasdan la ding tupa sinalicut la
Pati na y Indang Eba a magpaangin magpainawa
King ngulangul nitang Adan pupulandit linapit ya.
Obat rugu mecanyan ca, anyang ackit neng arap na.

Pati na ing andu andu sucat me pang pacialaman?
Anya ngeni magadya ca ing boss mimwa ne canian.
At ytang ubingan naman sisilip yang timan timan
Ytang matuli ya'y Adan malwat na nang babalacan

Aray! Aray! kyak nang Adan,   Eba ot emu cu supan.
Tucnang naca sang dadaldal gawa na ca mung paralan,
Minisip ya ytang Eba miglalawe paligid na,
Uling ngeni pa milyari king Eden ining disgrasya.

Aisip nu reng tanaman tulud biabas yang lengutan,
At pirapal nung tinapal bang  ing daya patucnangan.
Dapot mica ditac a problema Ala pang band Aid canita,
Minisip ya pa y Eba Nanu pa cayang dagdag na.

Kinanwa yang bulong Lara semutan ne pang Apalya
At agad na neng tinali ing metuli ticpan na ya
Mipangadwan ing gulisac lucsu keni lundag keta
Anting duldul neng caleldu at y Eba mengaclac ya.

Pilan bulan ing milabas ytang tuli kinayap ya
Mibalic itang ticas , lalung mesyas ing talacad
Merayupot ing timan na neng sipatsipatan ne' y Eba,
At lalun nang masalese ot ing caya aliwa ya.

At caibat ning atlung aldu Ing ubingan linapit ya
keta nang malagung Eba a kindat kindat pa mata
At saca ne inumpisan ita nang pamanucsu na
at iti ing sinitsit na... ... bisa cang mangan MANSANAS.. .EBA?

NB:  Epu sana maging calapastangan ining cacung pamamatula kekayu; nung atin pung kewanangan, adwan cu po ing panupaya.

Matwa Na Ing Bili

Dacal napin itang napun, kening bie mu a dinalan,
Detang  anggang sablang bage, maralas mu lang balicdan
At magmunimuni ca pa, at lubus catahimican
Nung atin capa cayang, maging BUCAS a asaan?

Ing NGENI nanu ya caya, nanung maging panandaman
Uling magbayu ing isip, pati na itang  catawan.
Dacal itang maging sangcan,  e mu binang amalayan
E mu balu ing malyari, anting metung a  tanaman.

Detang tanaman a dutung, keng kelwatan ning mabibie,
Ding yamut, pun at sanga da, magbayu ngan itang  aske
Ding bulung malalanat la, malagas keta nang tangke
At mibwal niya  cabud ing pun, ketang gabun ni'ya mipase.

Ing catawan na ning tawu, anting tanaman ya naman,
Magbayu ing sablang bage, miminang e apiadyan,
At anti reta nang tud mu,  a sadyang tune masican,
Obat ngeni cacalu ca, ing baston ya nang tatalnan.

At deta nang adwang mata, ding salamin ning catawan
Melabug at mapula la, cataratang parsalanan,
At meging calbu na ca pa, at lintu mapangalingwan,
Rugu meging Maclac capa, angga racang picacaylian.

Neng misan ing Asawa mu, madalas malmura na ya,
Uling eme papansingan, at mebating ing Romansa,
Itang sadyang gagawan mu, at machong magbidabida,
Cabud niya mu meganaca, Lupa namu ing Mimimwa.

Neng capitangan ning bengi, madalas cang mibabangun,
Mamalagwa cang lalacad, papulayi ketang cumun,
Carin ca pacantacanta, uling mangainipan na,
Angga niyang Urung at Sulong, eya lulwal ing punyeta.

Dapot agyang macanyan man, bista't ing bili matwa na,
Dapat tamung pasalamat king Guinung Dios Mayupaya,
Ing Mayap a Depatan mu, yamu ing kecang Pamana
Anti ing Lugud king Guinu, Tawu, at Mal a Salita.

Dacal lang lulugud king Dios, keti mabilug sicluban,
At parang tawung manwala king banal a cautusan,
Dapot king Amanung Siswan, itang sabing Capampangan
Ngeni rugu ot macanyan, dacal nu reng mengalingwan.

Agyang MATWA NA ING BILI, mabaya na ing catawan,
Itang lugud king Amanu, e menaliwa ditac man.
Nung tutung ala ng BUCAS, uling paralum neng Bulan...
Luid  na ning AMANUNG SISWAN, ya ing BUCAS a panayan.

Norwalk, CA

Puge Cang Rafael Maniago, Pintor, Poweta At Pogi Pa

O Poging Poweta at Pintor a biasa
Galamanu pa mu ing abut cu keka
Nung mipunta cumu dumalan cu sana
Bacu lang asilip detang Obra Maestra.

Uling meaquit na ing quecang sibucan
Nung ing Pamagpinta ya ing pisasabyan
Meging modelu cu ing kekang gelingan
Ing pininta mu cu cacung pacamalan.

Bijira mung tutu tawung anti keca
Tagle mung beitan iyang pamagpinta
Pati pamag gale sadyang magaling ca
At nung alben daca, aba... Pogi ca pa.

Anya cang Violeta dacal lang marirya
Queng pamamili nang cayabe queng bie na
Uling agyang POGI ytang cabangal na
E ne ipaglibe ing lugud na caya.

Ining agawa mu qng balen tang tibwan
Deng tawu Pampanga e ra acalingwan
KULE CAPAMPANGAN intoryang balicdan
Lacwan nang MANIAGO careng Capampangan.

Luid Ca   Poweta Rafael Maniago, PLI

San Pedro, santong patulunan Apalit, Pampanga

Ing pisamban nang San Pedro, Apalit, Pampanga

Sinta Cung Dalagang Baryu

Ating metung a dalaga, ketang baryung keragulan,
tasing ing cayang palayu, yang mengising capalsintan.
agyang anac pa ing bili, canacu nang peninapan.
nasang luguran nacu sa, bang midinan capaldanan.
agyang maluca  ing bili , dagul mu keng cacalulwan
canyaman na at ing lugud, masaya ming apisulwan.
inya ngeni ke ning bie cu, canacu mung babalicdan
anting metung a paninap, babye lumbe ampon timan.

Bakit caya, mipacanyan, aliwa ing capalaran...

Talaga ing bie keti king yatu, ala cang asisiguru
agyang nanu ing gawan mu, ing malyari emu balu,
gulung ya waring dudurut, milalam ca o mibabu
lasang agyang nanung pait, o mayumu alducan mu
eme parsalanan ing Dios, nung mebigu ing Sinta mu.

Ica cabud ing mikintal, kilub na ning cacung pusu...
e milacu itang tattoo maski na nanung gawan cu.
Legwan mung alang capara, yang mitanam kening salu,
O bat caya balang oras, ena midayu king lub cu,
Virgen ca waring sasamban, pangadian at ausan cu
E na balang manaya cu pa, cabang yatu ya ing yatu.

Yana ngening malapit na, itang cacung caorasan
O reni detang Amanung, malwat cu naping sisimpan
Ustung asabi cu nala, midinan cung caligayan...

Dala cu no king cutcutan, ketang marinlang pageran,
Salamat ketang lugud mu, Ica ing cacung Palsintan.