Singsing Nang Gallardo

Ing tawling estropa, aral yang matimbang,
mitanam king pusu, at maging tagimpan,
saingsing macudta, anting tagulaling,
gunyat lat migising, pamanintun Singsing.

Pagdulapan cung amanu, belangcas nang Bienvinido,
potang dudungdungan mula, asna naca cacusuelu,
uling amanu lang watas, pig-calam ning Ginu tamu,
namnaman mu at pilasan, alasa mung misnang yumu.

Pota palang tutua na ca, at bibilang na cang aldu,
ing caban ning caisipan, simen mu retang amanu,
mamili ang tungal-tungal idake mula caring tau,
bang e la masayang cabud, potang mayapas ing bye mu,
detang sinese amanu, ylang lacwan keting yatu,
caring suli'ng Capampangan, a malugud king Amanu.

Mutyang Capampangan, malwat pagdulapan,
bang ing budning pintor, gawang inspirasyun,
Uli nang Cupido, pitagpu't piagum
meging obra maestra, migulis king telon
ing mutya at pintor, mabibye maratun
busal ding bunga da, carelang lelangan.

Pakisabing Mayap

Nung malyari sana, at dapat a mayap
Malyari meng basan, poesia cung liningap
Balu cung culang pa, itang cacung sangcap
Kening linutu cung, bunga ning paninap.

Turu muna cacu, ing sucad a ustu
Masanting a rima, a pagdulapan cu.
Dinan mu cung diwa, nanu ing gawan ku
Bang luntu masanting, kilkal cung amanu.

Oyni ining poesiang , pigcasakitan cung
Belangcas telakad, king dimut a belwan
Magpilit gumale, uli ning parasan
Magbalic ing sinta, nitang cayanacan,.

Metung cang poetang, cacung gagalangan
Misasalbag bini, king amanung siswan
At itang bini mu, dimpot ke at tenam
Sana mamunga ya, mayubu't manyaman.

Eca micacunu, sabyan mu ing dapat,
Manayun cung tucyan, bayang maging sapat,
Ining cacung poesyang, buri cung ipalad
Careng cayanacan, keng bersu mangapcap.

Keni king ANASI, dacal ta abalu,
E ca micacunu, dacal la isuyu,
Deng matwang poeta, manenaya la mu
Maca antabe lang, bisa la pin turu.

Anya cayanacan, sigue sumulat ca,
Manenaya cami, ngeni galo na ca,
Abe abe tamu, Singsing pantunan ya,
Tingcad ibalic ya, nitang Amanu ta.

Ernie Q. Turla

Artesia CA USA