Macananu Ing Maging Poeta Lauredu

Tiran me ping ustu, O, mal a Ministru,
Kecang pepabalu, daptan a Procesu,
Ytang pamamiling Poeta Lauredu,
Bang luntu manayun, at e mica gulu.

Keta nang Colegyu, dapat yang dumalan,
Poetang mepili, carin de pisabyan,
At uling atin nang, procesung tutucyan,
E neman matsura, ot eta mu gawan.

At nung mepili ne, Poeta Lauredu,
Dapat yang igalang buri ning Colegyu,
At ing ginung ari, Ari ning Parnasu,
Putungan ne ngeni, mepiling Lauredu.

Mepiling poeta, kecatang pugayan,
Deng anggang Aguman misanmetung la ngan
At idayu tamu itang salangsangan,
Abe abe sana king Amanung Siwan.

Ari ning Parnasu at abe Ministru,
ANASI, AGTACA, CKS, KP, pa
Agumang Aliwa, pati na Colegyu,
Dinatang ing Horas, tucyan ing Procesu.

Poeta Laureadu

Nung E Ca Pogi

Casakit na pala, itang eca pogi
keng cang lelelele, saca maglalawe.

Bisa cang lumapit, saca makiabe
capalan meng lupa, ena ca didine.

Uling casanting na, ning pisasabyan yu
mayama cu rugung, darandam kecayu,

Anya lumapit cu, at makitalbugan
bang detang e Pogi, marandam la naman.

Ing casantingan na, dili cung aliwa
'gad dang apansingan, ing pamialiwa

Tutung Pogi la ngan, detang cacung disnan
Uling ecu Pogi, era na pinsingan.

Oneng era balu, magdala cung make-up
Agad cung apinta, kening cacung lupa,

Anya reng menakit cacu kelaguan la
Balamu ikit de i Sharon Cuneta. (Hay...)

Agyang e ca "Pogi", e ca manandaman,
Guintu ya ing Pusu, malugud ca naman.

Inspiradu

E Cu balu at nung bakit,
inspiradu cung masyadu...

Agyang era ca ikit,
at ala ca king siping cu,

Nanu cayang gayuma mu,
careng poetang abe mu,

Alben da ca mu litratru,
apapalwal da ing bersu.

At lalu na pa siguru,
nung ati ca arapan cu,

At akit da cang titiman
cambeng mapunge mata mu,

Anti na cu mung Poeta,
babo na ning entabladu,

At ica mu itang Reyna,
a purian cu careng bersu,

Nanu la cayang amanu,
pangapcapan king isip cu,


Bacung masampat asabi,
macabage king leguan mu.

At midinan capaldanan,
ining malsintang pusu cu,

Damdaman mu itang pali,
sisilab keng caladwa cu,

Alang binit lalagablab,
kilub na ning cacung salu,

Midinan mung capasnawan,
nung ibie me'ng kecang pusu.

ACJ: Crowning of Poet Laureate, Sept. 2009, Portland OR

Midinan Cung Diua

Metaba ya ining puso,
uling midinan cung diwa,

Anyang apansingan mu cu,
ketang poemang megawa,

Itang puge'ng tegulaling,
caluguran a macudta,

Papuring ibat king pusu,
Pasalamat ketang Puna.

Dacal la reng abalu cu,
pamanyulat cawatasan,

Uling atin cung tutucyan,
a poetang matenacan,

At gewa mu cung sundalus,
Inabe king Academya,

Keng tiagga ning pamagaral,
Maging metung nang Poeta.

Dapot matwa na ing bili,
Malagad na ing lapugpug,

Anting manuc keng bularit,
sicad sicad, atras sulung,

Manaya ta na mung tiempu,
Nung capilan maca sacyud,

At agad ta na ping matras,
ketang suluc magpalpatuc.

Pabanua Na

Malwat na cung batyu batyu, ketang awang ning Parnasu,
Panenayan keng panyatang, nitang gagalang cung Maestru,
Kilub ning pabanwang wewe, linaut ya at mindaywan,
Ing silid na king Parnasu, babanten ke't lilinisan.

At ngeni pin, migbalic ne, anti ya mung balikbayan,
Magdala yang pasalubung, king Parnasu na yayampang,
Agad agad sinabit de, ketang dingding ba yang lawan,
At dacal lang mecuswelu, at buri deng paciapusan.

Anting alagad ning sining, aliwa cang dumiscarte,
Balang manibatan keca, anting obra maestra'ng lawe,
Ding ginulis mu king telon, anting lelangan ning Guinu,
Mayayakit itang calam, keca binie nang talentu.

Deng poemang mibalangcas, ababasa ing lugud mu,
Ketang Amanu tang Siswan, a abe mung anting tau,
Neng simen mu reng amanu, at ibugnus keti'ng yatu,
Cawatasan lang menibat, lalang Poeta Lauredu.

Mag Biba la reng abe mu, ketang binie rang dangalan,
Mekilala ca ping MOKA king labwad ning Capampangan,
At deta nang ginulis mung, litratu ding mamuntcan,
King capitulyu Pampanga, pacasabit lang hang-ngaan.

Anya ngeni king Parnasu, dagdagan la ding ipaskil mu,
Neng mitais ne ping ustu, ing pambihirang pluma mu,
Uling dening cayanacan, bisang mabiasa king bersu,
Emu sana paimburisan, ytang mayap ituru mu.

Paeng Maniago

ACDJ, Rolando Malit and Paeng

Mibabalic

Metagkil ya ing panandam
Kinarug ya ining salu,

king santing ning picudta mu,
Macapasno caisipan,

At mibabalik ing aldu
Delanan cung pamalsinta,

Ketang napun nacadwa na,
bayu cu pa mu malsinta.

E cu rugu amalayan
Itang tulang panamdaman,

Cabang yuyuyu mo sunis
detang bersu't cawatasan,

Misan pa mibalic cacu,
itang napung cayanacan,

Inyang ing anak kung puso,
Migising king capalsintan.

King kecaba ning panaun,
mipadpad ku Amerika,

At lubus e abalitan.
itang minunang pilsintan.

Ngeni rugu e cu balu
nanu ing meging kabilian.

"SOMEWHERE MY LOVE, paninap cu
Ing akit daca pang misan,

At agyang paglalawe mu,
aplusan daka.... catawan."

Amoco, Nohrie Losada, ACDJ

Namnaman Cu Ring Amanu

Namnaman cu ring Amanu,
keng sangcap da at recadu,

Apilasa mung talaga,
itang linamnan at yumu,

At lulub emu king atian,
ketang pusu, caisipan,

Nune pati king Caladwa,
at mabilug a catawan.

Macuyad ya ing soga cu,
angga yang metung pilapil,

Ena calupa ning keca,
limang pilapil culang pa,

At itang balun o tosang,
ning picicwanan mung danum,

Asne lalam at malino,
e malyaring cagisanan,

Macayama lang dungdungan,
detang kecang cawatasan,

Macabie lang capasnawan,
at mayap la detang Aral,

Anya kening panandam cu,
megaling cung mengamanu,

Ketang amanu tang sisuan,
a dapat tamung luguran.