Pamicalugud King Amanu (v. 4)

Amanu Ning Magumasid, Aug. 8th

Itang yumu at lasa na,
binasa cung cawatasan,

Macabie yang capasnawan,
kening mainang caisipan;

Ditac ditac mangupas na,
ing lugud ta at panamdam,

Uling menga palaut na,
pamagobra at cabiasnan;

Detang aliwang Salita,
a pilit dang papagaral,

Anti na mu ing Tagalog,
Inglish, Arabu, Castillan,

Deting Sabing pinili da,
Paglibe re king amanung ...

Binie na nitang Miglalang,
caring dai' ng Capampangan.

Ing amanung meging mana,
e ya dapat macalinguan,

Yan ing dapat tang luguran,
tatac ning bye mung ingatan,

e me sana picarine,
ipagmaragul meng tune.

See other versions of poem: v. 1 | v. 2 | v. 3

Ing Agila Ning Apalit, Pugad Nang Misnang Tibe

Pugue para qng Aguila ning Apalit, a y Poeta Laureado Int. Atty. Almario C. de Jesus
    mala-soneto
neng Irvin Harvey Rivera
    Siuala Ning Maliwalu/Anac Ning Baculud

Luid ia ing Aguila caring Poesia na
Pamangulis na qng mataram nang pluma
Ding sunis o dalit at ding balang letra
Macabie lang diua pangabalangcas da.

Silung! dala mu cung iterac ning angin
Gamitan mo retang bagius mu't magmain
Sulapo mu cu qng lele da ring batuin
Qng babo ning bigua't bulan anti mu rin.

Amuiutan mucu't dinan capaldanan
Caring poesia mung mamie capasnauan
Detang quecang dalit ume cong balican
Bang ing ligalig cu mapulid mung misan.

Luid ca oh Poeta Laureadu ning Sucad
Balen ning Apalit ia ing caiang Pugad.

Pamicalugud King Amanu (v. 3)

Ari ning Parnasung Capampangan

Itang yumu at lasa na,
binasa cung cawatasan,
Macabie yang capasnawan,
kening mainang caisipan,
At agya mang mangupas na,
ing lugud ta at panamdam
Uling menga palaut na,
pamagobra at cabiasnan;

Detang aliwang Salita,
a pilit dang papagaral,
Anti na mu ing Tagalog,
Inglish, Arabu, Castillan,
Deting Sabing pinili da,
Paglibe re king amanung ...
Binie na nitang Miglalang,
caring dai' ng Capampangan.

Ing sabing Capampangan,
e me dapat picarine,
Maski pa ninung carap mu
yan ing salita mung tune,
Nuca mang labuad mipadpad,
e me cacalinguan abe,
Yan ing dapat tang luguran,
ketang lugud a dalise.

Yang licuan da reng pengari,
caring anac a mal dili.

See other versions of poem: v. 1 | v. 2 | v. 4

Mig-reyna Ya'y Elnora v. 2

neng Amor a caputol na

Fiestang baryu Santa Cruz, balen na pu ning Masantol,
Mag labi yang walung banua, ing pangane cung caputol,
Anac pa mu ing bili cu, e pa meyaring "high school",
Estorya na ning pamilya, matula ming pagmaragul.

Dapot ating mepalyari, yti e mi acalinguan
At ustung mi-tagpu tagpu, madalas ming pisasabian
Ing Aile pu alang patad, alus manga-pali ke ngan
Lalu na pu y Elnora, e na buring pisasabyan.

Bengi na ning Coronasyun, sinake la ketang bangca
Uling ing bucud mung dalan, ytang mababu a Sapa
At agya mang tatacut ya, sinake ne y Elnora
Oneng e biasang manimbang, mitiab ya pu itang bangca.

Ing gulisac nang Elnora, mengasdan la ngan deng tau
Mecu keni supan taya, melumud ya'ing Reyna tamu
Ing consorte'ng y Eduardo, a maca piblas pang ternu
Linundag ya ketang sapa, segipan ne pung masulu .

Keng malalaguang salita, aliuang bangca re seke,
Maki-catig misnang tibe, at dacal nang mamantabe
E ne menaliling malan, coronasyun belaus de
Agyang merimla ing bengi, ytang timan e miwale.

Macanyan ing istorya na, pamag-Reyna nang Elnora
Deng anac na asnung tula istung acung mag-istorya
Disnan nang migit Otsenta, ketang tawling mig-"birthday" ya
Kecaming lulugud caya, angga ngeni, ya pang REYNA.

Elnora

See version 1.

Meco At Memun Ne

Masaya catang mabibye, micalugud, terac terac,
Ala cang cuscus balungus, cabuysitan agyang ditac,
Anya ining mepalyari, alus mate cu keng sindac,
Ot bigla cang mebangungut, bayu dinatang ing abac.

Ing ligaya a binye mu, minuli ngan king pagsalbat,
Ytang tula'ng pisulu ta, ngeni king dusa micasat,
Ngening ala na ca bandi, yning casi'ng keca tapat,
Pibatan na ing dalumdum, capa capa, salat salat.

Panamdamam cu ing paling macapaligd canacu,
Anti ca mong atyu keni, malapit mu king siping cu,
Agad cung mag-piac a mata, isipang acakit cu pa,
Iyang maamo mung lupa, pati pisulung ligaya.

Detang masayang pinandit, e malyaring macalinguan,
Anting gintung cayamanan, a lubus tang pacamalan,
At ing sabla misimpan ngan, kening pusu't pilubluban,
Yla ngening gaganacan, kening salu macapaldan.

Cabang ating panalala, mabibye cu't mangisnawa,
Capilan man e malyaring ing canacu miwale ca,
Tutu e na maulit pa, ing macapisabi cata,
At damdaman mu cu bosis, calupa na nitang sadya.

Dapot istung matudtud cu, ycang dalo ning paninap,
Ing bengi misna yang saya, alus e na cu misingap,
Anti ca mong e man meco, babyayan ta ing milabas,
Ligaya'ng alang cayanti, at e mabilang ing Horas.

Potang talilis ney'ing bengi, at ing sala paratang ne,
Canita na cu milingat, migising na at mipacde,
Pasibayung mibalic na, ytang cabilyan a tune,
Ing meco at licuan mu cu, magdili-dili na keng bye.

Singsing Nang Gallardo

Ing tawling estropa, aral yang matimbang,
mitanam king pusu, at maging tagimpan,
saingsing macudta, anting tagulaling,
gunyat lat migising, pamanintun Singsing.

Pagdulapan cung amanu, belangcas nang Bienvinido,
potang dudungdungan mula, asna naca cacusuelu,
uling amanu lang watas, pig-calam ning Ginu tamu,
namnaman mu at pilasan, alasa mung misnang yumu.

Pota palang tutua na ca, at bibilang na cang aldu,
ing caban ning caisipan, simen mu retang amanu,
mamili ang tungal-tungal idake mula caring tau,
bang e la masayang cabud, potang mayapas ing bye mu,
detang sinese amanu, ylang lacwan keting yatu,
caring suli'ng Capampangan, a malugud king Amanu.

Mutyang Capampangan, malwat pagdulapan,
bang ing budning pintor, gawang inspirasyun,
Uli nang Cupido, pitagpu't piagum
meging obra maestra, migulis king telon
ing mutya at pintor, mabibye maratun
busal ding bunga da, carelang lelangan.

Gulis Ning Palad

1

Sasabian da mitacda na, maging bie mu keting Yatu
Uling iti macagulis o mikintal keng Palad Mu
Nanan mu man pagaralan, maski biasa ca pang tau
Iti e mu atalastas, uling metung yang misteryu.

2

Itang gulis king Palad mu, anting Mapang macasulat
Keng dalan a tutuntunan, keng lacad mung misnang bayat
Itang sablang miliari na, careng mata mu mimulat
Yang calmang mitutuc keca, agyang nanu ing pagsalbat.

3

Dapot agiang macanian man, keca sang pacaisipan
Tagle ning taung lelangan, ing timawang caisipan
Balu mu itang marawac, ustu at mayap a gawan
Ing banal a cautusan, yang pagpilitan mung tucyan.

4

Ing mabibie keting yatu, metung ca waring maglacbe
Dacal itang dalanan mung, a capagsubucan keng bie
Agyang sabla mitacda na, nung gawa cang masalese
Yang meging Gulis Ning Palad, a pagmaragul mung tune.

5

Caibat ning panga-bait mu, camatayan ca paintungul
Tacdang Horas e mu balu, nung capilan itang atul
Mengari keng pating-apun, ing dalumdum yang cumaul
Keng catawan mung maglacbe, mitambunan ya keng culcul.

6

Lacwan me ing yatung iti, aliwang carinan munta.
At lawen de itang libru, nung dapat a matanggap ca
Ketang Gulis ning Palad mu, metupad o e mu gewa?
At ing atul miras keca, keta ca lalam o gloria.!

7

Nung kecang pacaisipan, Itang Gulis na Ning Palad
Yang mamantabe keng bie mu, bacang miras at misadsad
At maging macabaldugan, pamanucnang keting labwad
E ca cabud anting singo, o ulad acusad-cusad.

8

Tau cang palpicasala, dapat tuki ketang Utus
Tumibe ca salpantaya, bacang lubus a micabus
Puso at caisipan mu, luguran me ing Mengabus
Pati na para mung tau, e mu tuturing Busabus.

Misnang Datun

Detang tugac at culiglig, ylang keca magtumayla,
At mamagus ytang danum, ketang mamatucbang sapa;
Ing bunduc na ning Alaya, babatyu yang misnang saya,
Cabang yca ketang duyan, gagale cang macakera,
Cayagum mo retang Pipit ketang cantores rang siwala ,
At ing angin a manene, king catawan mu mumuma,
Pepepen na itang pali, e ca lisangan bitasa;
Alang asuc a mabuluc, O Smog a macasira,
E ca manakit saken, misusuglulu't masigla
Misnang datun ing paligid, alang mangulung bitasa,
At alang manutus keca, mamipi ca ketang batya,
Anti ya mong paraiso, ing madicut a taldawa.

Amor de Jesus, Pirate :)

Deng Talapagobra Keng Gabun: Nucarin La Deng Sasarul?

E la rugu sasalicut, lalung e ra acalinguan,
Agyang ala nang paranum, sasarul la at gagambul,
Ytang pali at ing dimla, angga da nang paimburisan,
Bang ing amanu tang menan, e ya mate at masaul,

Mapalyaring diritac la, Ortelanu ketang parang,
Deng sadyang talapagobra, linaut la at mindaywan,
Pibata rang macalaut, bala mu sang manakitan,
Ba lang numawa pagcabye, ding pamilyang pacamalan.

Dapot sumangid na niti, pamag-obra king taldawa,
Paninapan dang balican, potang bucas o macadwa,
Yti e ra cacalingwan, uling pamana ring icwa,
Menibatan cang Ibpa ra, a maluat nang memayapa.

Anti murin ing Amanu, salitang pematad pusad,
Ya ing tune mung amanu, agyang noca pa mipadpad.

Comment:
Masanting ya pangalatag ing pamag limpi karing ortelano at ding gagambul (talasulat at poeta) king Amanung Siswan.  Ing diwa ning era pami aliwa mayaquit king lojical a versada.  Lalo yang makayama ing cudta ketang parteng ding ortelanong memag abroad panagimpan dang balikan ing marangle antimu naman ing paganaka a e dapat kalingwan ing Amanung tune kekatamu. It' s like a legal brief presented poetically!  Kasanting na ning cudta yung analogy Atty. PL Almario C. de Jesus. Mapaling puge kekayu!
LUID po!

by Libby Garces

Rafael D. Maniago, Pintor at Poeta: Puge keng Aldu mung Kebaitan

Keng aldu mung kebaitan, dadalit la reng poeta,
At deng calupa mung pintor, papalacpac la't mag-biba,
Ing carelang pasalamat, ing imbut da miras banua,
Ketang Dios tang Mayupa, penibatan na ning Grasya.

Kilub na ning banuang wewe, dacal la reng ginulis mu,
Nung aguran mu lang lawe, anting mabye lang litratu,
Obra Maestra lang melalang, king gelingan na ning Maestru,
At dacal keca metula, careng piniling Modelu.

Ding cayagum king Parnasu, itinas daca king Calucan,
Pantas, Poeta Laureadu, yang pinutung dang Dangalan,
Mekilala ca Pampanga, at labuad ding Capampangan,
Meging MOKA'ng tatangalan, ketang tagle mung cagiwan.

LUID CA RAFAEL MANIAGO, pagmaragul na ning Laji,
Ngening aldu kebaitan, masaya tang magmasusi,
Cambe ding caluguran mu, at Violeta'ng mal mung dili,
E ca metua, sasanting pa, icang talaga ing POGI.

Bellflower CA. USA, Sept. 11, 2016

Amanung Mal Dili

Ketang magaral cu'ng maging abogadu,
Amanu mung Inglish, yamu ing buri cu,
E man rugu linub, keng caisipan cu,
Ing datang ing aldu, poeta laureadu,

Obat caras keti, labuad America,
Carin cu meninap ing maging poeta,
Pegaralan cu la poesya ra reng matua,
Biblia'ng Capampangan, dindungan, memasa.

Ining bage bage a cacu miliari,
Nung pagpilitan mu, ing sabla malyari,
Nung pitutuliran sanung mal mung dili,
Amanung beitan, Oy'tang e sarili?.

Cacung atalustus, kening cacung ketuan,
Amanung mal dili, ing AMANUNG SISUAN.

Malsintang Pasibayu

Nung magmatudturan ya mu, masakit ya ping gisingan
Dapot nung mipatudtud ya, migising yang sarili na;

Ytang milabas a sinta, anting pisac ning cabengian,
Malsinta cang pasibayu, anting masala yang bulan;

Cagising mu istung abac, mibuclat ca caisipan,
Ing bye tamu keting yatu, dacal ing capagsubucan;

Ketang kecang pangasacab, marapal ca ping talacad,
E ca tatacut lumacad, mesubuc cang misnang tatag.

Elsa Rufino

King Leguan Mu Atsi

Keng leguan mu Atsi, mengatulala la,
Aduang baintau, a maglolo keca,
Anya e ra balu nung nanung sabian da,
Lawe't timan, timan , anti na mung diga,
Dapot macanyan man, e ca sa magduda,
Ing lugud da keca, sasagid king banua.

Casakit na pala, ning malsintang tapat,
Carap meng babai, labi mipapacat,
Ing palual ning asbuc, obat mica-cabat,
Potang migulut ca carin ca magsalbat,
Dugdugan meng lande, saca na magcasat,
Caretang manakit, anti ca mong berat.

Lagu ning dalaga, tutung pangawilyan,
Mag-piesta ya'ing mata, ketang pagumasdan,
Tatatap ya'ing salu, kecang pipigilan,
Ing nasang uman me at saca pangaulan,
Lupa na at batal, keca lang aplusan,
Dalagang malagu a kecang palsintan.

Mabanding Matuang Baintau

Matwang baintau, dacal a pibandian,
Uling migsicap ya, king capanintunan,
Anya naman ngeni, cayang pupupulan,...
Ing yumu na ning bye, a cayang tatacman,
Dacal lang babai, caya magparandam.
"Sana acu nasa, ing keyang paglolwan".

Uling manintun yang, cayang acayabe,
Keng dimla ning bengi, a caya dumame,
Deng pilang babai, caya lelelele,
Cayang lang piglolon, lepitan, linawe,
Ning ninu carela, ing malsintang tune,
King mabanding matwa, e na lumwat a bye.

Agya mang dacal la, detang lepitan na,
E mangabaldugan, ing mamanlocu ya,
Atin mung Ugaling, pantunan carela,
A e na pa ykit, anya pin metwa ya,
At angga man ngeni, e pa mecyasawa,
Anya lapitan ne, Malagung Teresa.

Pakibat King Lugud Ning Indu

Espiritu, Ilug, Lugud ning Castilyu nang Jesus

Deng Amanu sasanting la, nung menibat la keng Pusu,
Lalu nung ing pisasabian, lugud ta king mal a Indu,
Agyang e ca pa poeta, o sadiang ditac mu Balu,
Macalalang cang Poema, uling manyabi cang Tutu.

Keng panamdaman ning Pusu, ity ala cang Aparis,
At e mu basta alele,  paimburisan mung Unabis,
Deng amanu ning lugud mu, piniling Pecamalinis,
Idaun mula cang Indu mu, panlalaweng sari Lambis.

E cu balu nung "talent" pin, ing bunga ning Caisipan,
O sadyang meging calma cu, a binye na ning Miglalang,
Mebiasa cu ping sinulat, agyang dimut mu ing Belwan,
At ing Amanung Beitan, Mal ya cacu Capilan man.

Matula cu mekibat ca, at yan e dapat Cailyan.
Lalu nung pawang catutuan,  itang kecang buring Sabian.

Sintang Irang Na Ning Bie Cu

GANACAN MU CU SA, potang memun nacu,
mitacpan nang belo, king panimanman mu,
masayang pinandit, king duyan migyuyu,
keca lang isimpan, king caban ning pusu,
REMEMBER, tandanan, I will always love you !

CALUGURAN DACA, busal ning cabengian,
cayabe ring batuin at maslag a bulan,
sablang acakit mu king capaligiran,
ylang meging sacsi, ning sumpa cu Irang,
YO TE AMO MI AMOR, alang cayangganan !

ING LUGUD CU KECA, ting saslag a aldu,
babo ra deng bunduc, ume neng tatandu,
Keng dala nang paling, isalbag na king yatu,
ot e man merimla, pali ning lugud cu,
I NEED YOU, TE QUIERO, yan ing tandanan mu !

PACA TALINGTINGAN, neng paldas ne'ing bengi,
at mitda ne sala, ining bye cu bandi,
lubus menajimic, ala nang asabi,
e na la marandam, poesyang macawili.
SOLMENTE UNA VEZ, ycang mal cung dili.

TUNOG NANG BATINGAW, keca ra iparandam,
anting tauling singap, sakit ning panamdam,
tacdang ca-horasan, nining bye cung indam,
Panalangin mu sang, midinan cung Calam;
MAY GOD BLESS AND KEEP YOU, king pusu mitanam.

My sister Teresita Castillo de Jesus and her husband Virgilio Caccam are now both in the bosom of the Almighty.  May they rest in eternal peace.

Metung a Panalangin

E mesayang unabis man, ing canacung pamanaya,
Cayantabe panalangin, pepalwal me ing poema;
Mipasnu cu pilubluban, pati na cacung caladwa,
King banal mung panalangin, at santing na nitang tema.

Anti cang dudungdung Biblia, careng salmo at casebyan,
Pepakit ning kecang diwa, tune casalpantayanan,
Detang amanung pisiag mu, e la keca menibatan,
Uling penalig mu Caya, nung dimut mu ytang belwan.

Nung idalit da reng Anghel, deng rima ampon ing bersu,
Keng Metung a Panalangin, pematulan de ing Ginu,
Uling ken ya mayayakit, casalpantayanan tau,
Midayu ing cagutgutan, at tajimic ya ing Yatu.

Panalangin yang cailangan, e ca masayang a Horas,
Tajimic ca pilubluban, misip tang miamasamas.

See version 1.

Potang Matua Na Ca

Dacal la retang mangatwa, macalunus ing bili ra
Matwa lang magdilidili, alang lilingap carela,
Detang anac a asaan, cuculang ing panaun da,
Anya rugu nung matwa na, ketang Hospice ca mipunta.

Ing bie keti America, ing gagawan da macanyan,
At deta nang Pilipino, agad da nang pacyapusan,
Ing sesen la deng pengari, cabang mabie pacyabayan
Ugali rang keragulan, mistula ra nang gilutan.

Nung atyu ca Pilipinas, beitan mung mal a labwad
Detang Anac mung malugud, lingapan da cang misadsad
Potang miras ing panaun, metwa na et e milacad
Sesen da ca king panirug, at e la manintun bayad.

At nung matwa nang magulyan, malilyari e mu balu
Ala na ytang panandam, at carug ning kecang salu
Deta nang mal mung suli, e la tutucnang susuyu
Angga na king panlacu mung, lacwan mune' ing kecang pusu.

Ing bie keti na king Yatu, anting bulung malalagas
Mengaring lua a mamagus, mababaldug anting perlas
Yti dapat tang tandanan, mitacda na ngan ing horas
Ytang sabla mapupus ngan, ala na ca caiang bucas?

Artesia, CA, USA

Wayni Acu Ginu!

Acu ing ginu ning dagat at banua
dimdam cu ing tangis ding tau cu
a mandatila king dulum at pamicasala
deng Gamat cu, ila ring magligtas.

Acu, ing linalang careng batwin ning Cabengian
gawang keng masala ing caralumduman
ninu ing miyatad king sala cu carela?
Ninu ing cacung Parala?

Wayni Acu, Ginu!
Acu na pin, Ginu?
Dimdam cu ing pamanaus king cabengian
Munta cu Ginu, nung itake mu cu
Kening pusu, talnan cu reng tau mu.

Acu, ing Ginu ning Yelu at Uran
Acung memusan keng carelang casakitan
Manangis cu para keng lugud carela
Mecu at gilutan da.

Palambutan cu la ding batu rang pusu
Deng carelang pusu, ibie cu ing lugud mu.
Carela sabian cu ing cacung Amanu
Ninu ing canacung parala?

Acu, ing Ginu ning Angin at Lablab
Padala cu reng Calulu at ating pile
At mag-anda cu para carela
Careng gamat cu, miligtas la.

Misnang canyaman a tinape, ing ibie cu
Mangan lang misnang cabsi king pusu da
at pati Bie Cu, ibie cu carela
Ninu ing Cacung parala?

See English version.

Macasimpan Yung Delanan

Palage cu neng matwa na, dacal itang macasimpan,
a dinalan kening bie ta, e pa lubus mecalingwan,
at potang magdili-dili ca, keca nang pibulebule,
detang datang mu pang aldo, ala na sana ing lumbe,

Mapalyari at tutu pin, potang matwa nang magulyan,
itang belwan mibabalic, maging gintung cawatasan.
at keca na lang isalbag, anting bini mo ning pale,
ding bunga ning kecang isip, tumubu lang masalese.

Detang sinalbag mung bini, tumubu lang macayama,
palutan dong tunggal-tunggal, nabangnan ding cayanacan,
ding bini mung meging bunga, cayaman lang pamana
caring meging mal mung Suli, misnang lugud dang tanggapan.

Nung ati co keng cabilyan, paralum ne ytang bulan,
samasan yo sanang simen, ding selicut yu't sinimpan.

Artesia, CA