Rafael D. Maniago, Pintor at Poeta: Puge keng Aldu mung Kebaitan

Keng aldu mung kebaitan, dadalit la reng poeta,
At deng calupa mung pintor, papalacpac la't mag-biba,
Ing carelang pasalamat, ing imbut da miras banua,
Ketang Dios tang Mayupa, penibatan na ning Grasya.

Kilub na ning banuang wewe, dacal la reng ginulis mu,
Nung aguran mu lang lawe, anting mabye lang litratu,
Obra Maestra lang melalang, king gelingan na ning Maestru,
At dacal keca metula, careng piniling Modelu.

Ding cayagum king Parnasu, itinas daca king Calucan,
Pantas, Poeta Laureadu, yang pinutung dang Dangalan,
Mekilala ca Pampanga, at labuad ding Capampangan,
Meging MOKA'ng tatangalan, ketang tagle mung cagiwan.

LUID CA RAFAEL MANIAGO, pagmaragul na ning Laji,
Ngening aldu kebaitan, masaya tang magmasusi,
Cambe ding caluguran mu, at Violeta'ng mal mung dili,
E ca metua, sasanting pa, icang talaga ing POGI.

Bellflower CA. USA, Sept. 11, 2016

Potang Matua Na Ca

Dacal la retang mangatwa, macalunus ing bili ra
Matwa lang magdilidili, alang lilingap carela,
Detang anac a asaan, cuculang ing panaun da,
Anya rugu nung matwa na, ketang Hospice ca mipunta.

Ing bie keti America, ing gagawan da macanyan,
At deta nang Pilipino, agad da nang pacyapusan,
Ing sesen la deng pengari, cabang mabie pacyabayan
Ugali rang keragulan, mistula ra nang gilutan.

Nung atyu ca Pilipinas, beitan mung mal a labwad
Detang Anac mung malugud, lingapan da cang misadsad
Potang miras ing panaun, metwa na et e milacad
Sesen da ca king panirug, at e la manintun bayad.

At nung matwa nang magulyan, malilyari e mu balu
Ala na ytang panandam, at carug ning kecang salu
Deta nang mal mung suli, e la tutucnang susuyu
Angga na king panlacu mung, lacwan mune' ing kecang pusu.

Ing bie keti na king Yatu, anting bulung malalagas
Mengaring lua a mamagus, mababaldug anting perlas
Yti dapat tang tandanan, mitacda na ngan ing horas
Ytang sabla mapupus ngan, ala na ca caiang bucas?

Artesia, CA, USA

Macasimpan Yung Delanan

Palage cu neng matwa na, dacal itang macasimpan,
a dinalan kening bie ta, e pa lubus mecalingwan,
at potang magdili-dili ca, keca nang pibulebule,
detang datang mu pang aldo, ala na sana ing lumbe,

Mapalyari at tutu pin, potang matwa nang magulyan,
itang belwan mibabalic, maging gintung cawatasan.
at keca na lang isalbag, anting bini mo ning pale,
ding bunga ning kecang isip, tumubu lang masalese.

Detang sinalbag mung bini, tumubu lang macayama,
palutan dong tunggal-tunggal, nabangnan ding cayanacan,
ding bini mung meging bunga, cayaman lang pamana
caring meging mal mung Suli, misnang lugud dang tanggapan.

Nung ati co keng cabilyan, paralum ne ytang bulan,
samasan yo sanang simen, ding selicut yu't sinimpan.

Artesia, CA

Mina

Amor de Jesus with Mina Tahayeri

Madalas pin ustung Misan, obat e apanginlagan
Asasabi mung catutuan, agyang buri mung Pigilan.

E cu sana pu mimimua, keng cacung pamagsalita
Ligaya na nining Bie cu, ing adinan da cung Tula.

Babye cu ing panlalawe, keng Matas yung Pangatau
Larauan na nitang Leguan, king Timan asna na Yumu.

Nung keng Beluan e mitawli, Mapiang asabi mung dili
Pamanyaup parang tau, mumuna ya e mitawli.

Anya naman bandang Portland, keng Aguman Capampangan
Meging Pamuntuc ya'y Mina, king sipag na at cagiwan.

E yu sana tutucnangan, ing lingap yu king Balayan
Pati na Salita tamu, ing Amanu tang Beitan.

Mina Tahayeri, Aguman Capampangan, NW USA

Artesia, CA USA

Nung Kecang Pibule-bule

A Capampangan version of an English poem
by Rodel Gosum

Nung keca yang pibulayan, mas mapali ya ing aldo, ngeni nang casalungsungan,
Detang Cutu keng kecang bwak, anti la waring tamumu, ing buntuc mu panginisan
Degulan da retang panas, mas madagul careng dutung, yti kecang pibulayan
At ytang kecang Sesesen, palac nang asna cabangis, carelang pitatacutan.

Keca nang pibule bule, nung deng bitis mung daralpac, casing dagul nu ning banca,
At deta nang kecang butul, e la masyadung matibe, payat la at malambut pa,
At pibule bule mu na, ing lasa da retang prutas, mapait anti mung sabun,
At ing uran a papatac, ketang banwa manibatan, dumalan ngan king acmulan.

Keca nang pibule bule, ing sala da detang tala, bulag anting talibatab,
At ing bulan king catasan, ala ya king cabilugan, sampad ya at misnang lapad,
Keca nang pibule bule, deta nang adwa mung mata, sindagul ning kecang asbuc,
At ding ayup king cakewan, caung namu ing daraptan, e nu dalit o magpasyuc.

E mu na pibule bule, dili mung magsasarili, manucnangan, keting yatu
At ing puso mu king salu, ketang dimla at mas ya pa, anting batung meging yelu
Pibule bule mu sana, nung ining benging daralan, e ne maging galing aldu,
Detang dutung a tanaman, keng paligid macatanam, malangi lang ting desyertu.

E mu na wari pagtachan , ining sablang malilyari, manintun pamagpalino,
Obat ing hegana gana, maging mayap at ustu ngan, alang bawas at exacto,
Ala cung balung palinu, metung yang capakibatan, at yti ya ing catutwan
Ing Mayupayang Miglalang, Dios yang ustu at cayapan, Ya mu ing tune Catutwan.

Artesia CA USA

Sonetong Dapat Tandanan

Sasabian da deng mangatwa, iti cacung tatandanan
Lilan cu na king isip cu, piki abe king balutan,
E mu cacalingwan Anac, ganacan mu ing delanan
Ba cang e na malilili, dasan mu ing pupuntalan.

Dacal ca abalung aral ketang delanan mu keng bie,
Ytang maroc at matsura, ylele mu na at yugse,
Isipan mu ytang mayap, yang dapat a acayabe
Keng gagawan mu aldol'du, ba mung e dasan ing lumbe.

Nung sakaling dacal ytang dinatang a camalasan
Mitumba ca at mipase asna sakit penandaman
Pilitan mu ing talacad, at king sarili mu sabian
Yti pamagsubuc ya mu, kening canacung tetagan.

Ining Sonetong lelang cu, sana pacatandanan mu
Ing mabibie keting Yatu, yti metung neng Regalu.

Artesia, Ca USA

Panamdam Capampangan

Mimiral mu kecatamu ing PANAMDAM Capampangan,
PANAMDAM a pepamana detang matwa tang LIGURAN
LIGURAN ya ing Amanu, anting tune CAYAMANAN
CAYAMANAN a mal dili, lacwan caring CAYANACAN.

CAYANACAN migising ca, damdaman mu ing GULISAC
GULISAC na nining matwa, king busal na nitang PISAC
PISAC ing meging cabilian, ning Amanung CAPAMPANGAN
CAPAMPANGAN ing sala mu, calwat mi nang PAGDULAPAN.

PAGDULAPAN mi ing aldu, mibalic ca king CALUCAN
CALUCAN yng cabilian mu, king dane na ning ASLAGAN
ASLAGAN mo caisipan ding poetang MATENACAN
MATENACAN dang iladlad, itang tune CAWATASAN.

CAWATASAN a panamdam, tatatap king CAPALSINTAN
CAPALSINTAN king Amanu e mapawi CAPILAN MAN
CAPILAN MAN ing panamdam, lugud king AMANUNG SISWAN
Ing AMANU  TAMUNG SISWAN, ing salitang CAPAMPANGAN

CAPAMPANGAN ya ing  lahi a binye  na ning MIGLALANG. !

Bunduc Alaya

Bunduc Alaya

Artesia Ca, USA

Sinalibatbat

Mi salibatbat ya'ing Ginu, anting metung a sisisi,
Pemarug at pemalasbas, catawan na menga gisi,
Ing parusang pengawa ra, caren yang macasalanan,
Mapanaco, maca mate, a sidsad na king carocan.

Dapot sabla pibata na, uling buri nang tuparan,
Miligtas la detang taung, a tutu nang pacamalan,
Ya na pin itang menatbus, para cacu at keca man,
Nanu ngeni ing yablas mu, o taung macasalanan.

Ing lugud a pepakit na, casakitan a delanan,
Dinan ta mung cabaldugan, ing lasa na at parasan,
Kilalanan ta't tanggapan ing lagyu na at caharian,
Uling yamu ing tune dalan, ketang Ibpa tang sasamban.

Silwac na itang daya na, ba tang miligtas king sala,
Peca mayan a gawan mu, ing mabie ca king uli Na.

Sto. Cristo del Perdon

Artesia CA USA

La Dolce Vita (Biskote)

La Dolce Vita ngara pin, manyaman ya ing Biskoti,
Lalu na nung asnang pali itang inuman mung Cafe,
At saca ca timan timan uling alalasa meng tune,
Detang semada at mamun, keta na lang lele lele.

Salamat Cacaluguran, mesaya ya ing pascu cu,
Careng regalung tinggap cu, buri keng dili'ng kecayu,
Ing Biskote aliwa ya, lalu nung bucal king lub yu,
At detang taung didinan, pasalamat la kecayu.

The Sweet Life ya pin keng Inglish, Ing Bie asna ping canyaman,
Lalu keti California nung dacal ca caluguran,
Detang keca maki abe, tapat alang ca-plastican
At keca Gay at Mang July, tinggap yu keng caluguran.

Pasalamat cu kecayu, masayang Pascu Ning Dispu,
Pangadi cung mantabe ya, pagcalaman na cu ning Dios
Maging tahimic ing bie yu, busal ding aduang anac yu.
At nung cailangan ing saup, mutus cu pu at ati cu.

Amor at Daisy

Ing United Pampanga Leaders Council v. 3

Ing United Pampanga Leaders Council, U P L C 'ing mibansagan
Mitatag ya California, Aguman de deng Pampangan,
Labi'ng ualu ing Enero, 1998 ning banwa,
Yang aldo nang kebaitan, U P L C misapwac ya.

Adua lang pulu ding balen, adwang ciudad king Pampanga,
Canya canyang association, keti na king California,
At deta nang labing pitu, ila retang menimuna,
Deng Pamuntuc at Lider da, masaya lang megumpisa.

Chito Mandap ning Minalin, yang mepiling mamuntucan,
Subuc ne king panugali, pamaki-abe't tenacan,
Eya mapagmatas matas, mababa ya pilubluban,
At tune neng caluguran ing labwad tang Capampangan.

Busal ning pamisagsagan, mica maulagang sangcan,
Destiny ning UPLC, miniral ya at yang ticyan.
Lalam ning pamisangmetung, at panamdam maca balen,
Telacad de ing Bandera, lugud king labwad a tibwan.

Ing mumunang parasan na, mipaniaup, midamayan,
Mamantabe at sumuyu, careng Balen'ng mangailangan.
Pante pante itang lawe, ala itang mangabiran,
At ing sabla dumalan ngan, Caburian ding keracalan.

Pilan nang banwang milabas, keta Pampanga gewa na,
Ing Computer Learning Centers meging minunang Project na,
Dacal la retang computers caring Balen mipamie la,
Capitolyo at ding Balen, mikiabe keng programa.

Mig Medical Missions la pa, ketang tune pamaglingap,
Detang Doctor at Dentista, memanulu la ping ganap.
Memie dacal a panulu, pamangan at grasyang sapat,
Deng midinan asnong tula, mangapalwa'ng pasalamat.

Y Birhen De Los Remedios, Mal a Patron ning probinsya,
Balang bulan ning Septiembre, pagmasusian ing aldo na,
Akit me deng UPLC, gugusal, lilibutad la,
Keng Nobena't Salpantaya, Pamagsaya at Programa.

At nung ating Dalo naman, O magpasyal California,
Caring matas manungculan Malacanang at Pampanga,
Anti mu ing Gobernador, Obispo't Presidenti pa,
UPLC yang pupuge, biasa yang tanggap bisita.

Careng Fil-Ams Associations, madalas ing asabian da,
Prestigious Organization ing UPLC carela,
Uling e magbida bida, ala itang "compitensya",
Pamakiabeng marangal caring sabla yang gagana.

Monomento nang Gat RIZAL, king Carson talacad de ya,
Miyaliwang manungculan, ing "ground breaking" tinagun la,
Pati Mayor, Consulado, JPRMM, Fil-Ams pa,
Abe na ning UPLC, king Filipino idaun ya.

Aldo ning annibersaryo, alus labing atlung banwa,
Detang meging Presidenti, Pasalamat, Panalala,
Chito Mandap, Tito Barin, EdTrovada, Philip Gueco,
At adwang gamat yang supan, Pres Ed Ronquillo.

Cacuyug king UPLC, Capanalig a Pampangan,
Abe abe, misanmetung, ing buclud pacatibayan,

U – uling ing Dios yang mumuna...
P – pati Balen tutuki na ...
L – lugud king para tang tau, lalu caretang cabalen...
C – catuliran, catalawran, yta ing dapat tang tucian...

Luid ya ing UPLC; Luid reng Capampangan;
Luid ya ing Pilipinas, Pampanga't Amanung Sisuan!

See version 1 (graphic, 2009); version 2 (text, 2009).

Ing United Pampanga Leaders Council v.2

Neng Almario "Amor" C. de Jesus, P.L.
UPLC Charter Parliamentarian/Director

United Pampanga Leaders Council, UPLC ing aus da,
Ing marangal a aguman, mitatag ya California,
Labing walu ning Enero, 1998 ing banwa,
Yang aldo nang kebaitan, UPLC misapwak ya.

Adwang pulu't adwang balen, keng mabilug a Pampanga,
Ting sariling "association" estadu ning California,
At deta nang labing pitu, yla retang megumpisa,
Deng Pamuntok at Lider da, masaya lang menimuna.

O'bat caya mentun dalan, mica maulagang sangkan,
Destino ning UPLC miniral ya at yang tikyan,
Lalam ning pamisanmetung, anting tune Kapampangan,
Telacad de ing bandera... lugud qng labwad a tibwan.

Mumunang pake na yla, ing mipapanyaup la ngan,
Mantabe la at sumuyo, ninu man'g mangailangan,
Caring abe abeng balen macasadya dang damayan,
Pasalamat, alang libe, e da man rugu panayan.

Ing Computer Learning Centers, projectu na qng Pampanga,
A maigit lang atlung dalan a "computers" mengapamye la,
Capitolyo at ding balen, mekisanmetung programa,
Libring pamagaral/training, ketang pamangabyayan da.

"Medical Mission" gewa na, ketang tune pamaglingap,
Detang doctor at dentista, memanulu la ping ganap,
Memye dakal a panulu, pamangan a grasyang sapat,
Balang metung manga-palwa, qng tula at pasalamat.

Nung qng kasalpantayanan naman, UPLC modelu ya,
Nobena cang Birjen De Los Remedios, ya pa ytang menimuna,
Balang balen a cayabe, tinuki at mig-debocion la,
Siyam a Sabadong nobena at lamac cang Birjen Maria.

Deng manibatan Pilipinas, at Pampanga'ng mamuntukan,
Sasalubungan na la ngan, masaya nung suportaan,
Obispo at Governador, Presidenti estimaan,
Masipag yang makirungut, at ali ya mangabiran.

Ing UPLC aliya mag bidabida o maki-pagkompitensya,
Pamakiyabe'ng marangal parang tawu yang gagana,
Deng Fil-Am a associations, UPLC modelu ya,
"Prestigious Organization" ing UPLC karela.
Mi abe abe mipapanyaup... matibe buklud ning lugud...


U   P   L   C

U - ling ing Dios yang mumuna...
P - ati Balen cayabe na...
L - ugud parang tawu caring cabalen lalu na...
C - atalawran at Katuliran, careng egana gana...


Luid ya ing UPLC; Luid ya ing Pampanga;
Luid la reng Kapampangan at Luid ya ing Amanung Siswan!

See version 1 (graphic, 2009); version 3 (text, 2011).

Pamanlalang Dase

Dacal na ing menaliwa ketang Sucad a baryu ta,
Nung nun ya macataluntun Rio Grande ning Pampanga,
Ing balitang Arnedo Dike alus menga tibag naya,
Anya neng dagul ya ing ilog deng tawu mag bacwit na la.

Inyang anac pa ing bili nung agaganaca mu pa,
Balang bale deng babai obra da pa ing lalala,
Ala cang ackit mandaywan alang mamacu carela,
Alang mag-"domestic Helper" O Japayuking aus da.

Ngeni rugu detang Ebus megisan at mewala na,
Ala nu retang "biyajeru" maca"cascu" lang magtinda.
Anya ngeni reng babai era na balu ing lalala,
Keraclan tinu "abroad" anting ipus ing obra da.

Anyang ala nang lalala Cabud na la mipaburen,
Detang aliwang salitang malwat da nang gagamitan,
Basan mu lang masalese At pilitan mung tandanan.
Nung dapat la pang ibalic keng kekatang pisasabyan.

Potang sasali cang Ebus Manenaya ketang dungan,
Makisiglulu cang mamwat ysaka mu ngan babu dalan,
Mamirapal mung BALBALAN ding Ebus at PALANGPANGAN,
Saka mu idayu ing Tingting tunggal tunggla mung TISTISAN.

Ytang Ebus a METISTIS agad da nang SAPUNGGULAN
Bang ketang TUKUNG a lata dapugan la't pacatamban,
At potang melaga nala YKID da nung mirarapal,
At ibilad lele dalan SABUNGKEN dang misnang dapal.

Panga langi na ning Ebus MANALESE na lang agad,
Aptasan dang sapasapunggul bang king ilog da IBABAD,
At istung metulid na la ing baluctuc ala na ya
Pasibayu dang ibilad ing Ebus paka ylera.

At catacup na ning silim detang Ebus pa-ambon la,
Ba ping lambut ing catawan at mayan la ping AYKIRAN,
At mipilang pamung aldu anda ra ne ing TISTISAN,
At BULAYAN da ing Ebus at saka ra pamututan.

Gawan da na ytang MULA ya ing umpisa ning Cupya,
At saka nala MANGUPA Yta ing peka-buntuc na,
At caibat PALDASAN da nung nanu ing lapad na
At saka nala MANYUBLI yari na ing pamanlala.

Potang aldu ning Dominggo dumalan yang MAGCUCUPYA,
Saliwan na la't bayaran detang ayari mung Cupya,
Samasan na lang gupitan plantsaan at almirisan,
At agad na nung ybyaji keta king Binondo Menila.

Mewala nu retang Cupyang a megawa kareng Ebus,
At deng Cupyang asali mu gawang plastic misnang pali,
Detang Cupyang gawa tsina king palengke micalat na,
"Cottage Industry" Apalit ngeni rugu mewala na.

Macanyan ya ing Amanu Anti yang Ebus a Cupya,
Linub ya ing Cupyang "plastic" Tagalog anting "lintik",
Nung Ebus mesambut ya King Plastic a gawa Tsina,
Ing Amanung Kapampangan Pamingwa, ylaban taya.

Albug king Sucad

2009-07-14 Norwalk, CA

Matwa Na Ing Bili

Dacal napin itang napun, kening bie mu a dinalan,
Detang  anggang sablang bage, maralas mu lang balicdan
At magmunimuni ca pa, at lubus catahimican
Nung atin capa cayang, maging BUCAS a asaan?

Ing NGENI nanu ya caya, nanung maging panandaman
Uling magbayu ing isip, pati na itang  catawan.
Dacal itang maging sangcan,  e mu binang amalayan
E mu balu ing malyari, anting metung a  tanaman.

Detang tanaman a dutung, keng kelwatan ning mabibie,
Ding yamut, pun at sanga da, magbayu ngan itang  aske
Ding bulung malalanat la, malagas keta nang tangke
At mibwal niya  cabud ing pun, ketang gabun ni'ya mipase.

Ing catawan na ning tawu, anting tanaman ya naman,
Magbayu ing sablang bage, miminang e apiadyan,
At anti reta nang tud mu,  a sadyang tune masican,
Obat ngeni cacalu ca, ing baston ya nang tatalnan.

At deta nang adwang mata, ding salamin ning catawan
Melabug at mapula la, cataratang parsalanan,
At meging calbu na ca pa, at lintu mapangalingwan,
Rugu meging Maclac capa, angga racang picacaylian.

Neng misan ing Asawa mu, madalas malmura na ya,
Uling eme papansingan, at mebating ing Romansa,
Itang sadyang gagawan mu, at machong magbidabida,
Cabud niya mu meganaca, Lupa namu ing Mimimwa.

Neng capitangan ning bengi, madalas cang mibabangun,
Mamalagwa cang lalacad, papulayi ketang cumun,
Carin ca pacantacanta, uling mangainipan na,
Angga niyang Urung at Sulong, eya lulwal ing punyeta.

Dapot agyang macanyan man, bista't ing bili matwa na,
Dapat tamung pasalamat king Guinung Dios Mayupaya,
Ing Mayap a Depatan mu, yamu ing kecang Pamana
Anti ing Lugud king Guinu, Tawu, at Mal a Salita.

Dacal lang lulugud king Dios, keti mabilug sicluban,
At parang tawung manwala king banal a cautusan,
Dapot king Amanung Siswan, itang sabing Capampangan
Ngeni rugu ot macanyan, dacal nu reng mengalingwan.

Agyang MATWA NA ING BILI, mabaya na ing catawan,
Itang lugud king Amanu, e menaliwa ditac man.
Nung tutung ala ng BUCAS, uling paralum neng Bulan...
Luid  na ning AMANUNG SISWAN, ya ing BUCAS a panayan.

Norwalk, CA