Dacal la retang mangatwa, macalunus ing bili ra
Matwa lang magdilidili, alang lilingap carela,
Detang anac a asaan, cuculang ing panaun da,
Anya rugu nung matwa na, ketang Hospice ca mipunta.
Ing bie keti America, ing gagawan da macanyan,
At deta nang Pilipino, agad da nang pacyapusan,
Ing sesen la deng pengari, cabang mabie pacyabayan
Ugali rang keragulan, mistula ra nang gilutan.
Nung atyu ca Pilipinas, beitan mung mal a labwad
Detang Anac mung malugud, lingapan da cang misadsad
Potang miras ing panaun, metwa na et e milacad
Sesen da ca king panirug, at e la manintun bayad.
At nung matwa nang magulyan, malilyari e mu balu
Ala na ytang panandam, at carug ning kecang salu
Deta nang mal mung suli, e la tutucnang susuyu
Angga na king panlacu mung, lacwan mune' ing kecang pusu.
Ing bie keti na king Yatu, anting bulung malalagas
Mengaring lua a mamagus, mababaldug anting perlas
Yti dapat tang tandanan, mitacda na ngan ing horas
Ytang sabla mapupus ngan, ala na ca caiang bucas?
Artesia, CA, USA
Makisake cata, keta nang Garosa
Buri dang sasaken, deng Matuang Poeta
Yta nang Taldawa, yang pupuntalan da
Carin la Daralit, Gagale't Mamoesya.
At ytang gugulyut, a Matuang Damulag
E ya biasang magal, lacad misnang tatag
Alang carag-carag, ing tacbang malagad
Masanting tutucyan, keng Rima at Sucad.
Macanyan lalabas, ing bie ketang Baryu
Poetang Maluca, malugud Amanu
E man meging subyang, nung e man modernu
Ketang gagawan dang ala na keng Usu.
Makisake na ca, kecang Pagaralan
Mamicudtang Poesya, king Amanung Sisuan.
Dacal napin itang napun, kening bie mu a dinalan,
Detang anggang sablang bage, maralas mu lang balicdan
At magmunimuni ca pa, at lubus catahimican
Nung atin capa cayang, maging BUCAS a asaan?
Ing NGENI nanu ya caya, nanung maging panandaman
Uling magbayu ing isip, pati na itang catawan.
Dacal itang maging sangcan, e mu binang amalayan
E mu balu ing malyari, anting metung a tanaman.
Detang tanaman a dutung, keng kelwatan ning mabibie,
Ding yamut, pun at sanga da, magbayu ngan itang aske
Ding bulung malalanat la, malagas keta nang tangke
At mibwal niya cabud ing pun, ketang gabun ni'ya mipase.
Ing catawan na ning tawu, anting tanaman ya naman,
Magbayu ing sablang bage, miminang e apiadyan,
At anti reta nang tud mu, a sadyang tune masican,
Obat ngeni cacalu ca, ing baston ya nang tatalnan.
At deta nang adwang mata, ding salamin ning catawan
Melabug at mapula la, cataratang parsalanan,
At meging calbu na ca pa, at lintu mapangalingwan,
Rugu meging Maclac capa, angga racang picacaylian.
Neng misan ing Asawa mu, madalas malmura na ya,
Uling eme papansingan, at mebating ing Romansa,
Itang sadyang gagawan mu, at machong magbidabida,
Cabud niya mu meganaca, Lupa namu ing Mimimwa.
Neng capitangan ning bengi, madalas cang mibabangun,
Mamalagwa cang lalacad, papulayi ketang cumun,
Carin ca pacantacanta, uling mangainipan na,
Angga niyang Urung at Sulong, eya lulwal ing punyeta.
Dapot agyang macanyan man, bista't ing bili matwa na,
Dapat tamung pasalamat king Guinung Dios Mayupaya,
Ing Mayap a Depatan mu, yamu ing kecang Pamana
Anti ing Lugud king Guinu, Tawu, at Mal a Salita.
Dacal lang lulugud king Dios, keti mabilug sicluban,
At parang tawung manwala king banal a cautusan,
Dapot king Amanung Siswan, itang sabing Capampangan
Ngeni rugu ot macanyan, dacal nu reng mengalingwan.
Agyang MATWA NA ING BILI, mabaya na ing catawan,
Itang lugud king Amanu, e menaliwa ditac man.
Nung tutung ala ng BUCAS, uling paralum neng Bulan...
Luid na ning AMANUNG SISWAN, ya ing BUCAS a panayan.
Norwalk, CA
