Namnaman Cu Ring Amanu

Namnaman cu ring Amanu,
keng sangcap da at recadu,

Apilasa mung talaga,
itang linamnan at yumu,

At lulub emu king atian,
ketang pusu, caisipan,

Nune pati king Caladwa,
at mabilug a catawan.

Macuyad ya ing soga cu,
angga yang metung pilapil,

Ena calupa ning keca,
limang pilapil culang pa,

At itang balun o tosang,
ning picicwanan mung danum,

Asne lalam at malino,
e malyaring cagisanan,

Macayama lang dungdungan,
detang kecang cawatasan,

Macabie lang capasnawan,
at mayap la detang Aral,

Anya kening panandam cu,
megaling cung mengamanu,

Ketang amanu tang sisuan,
a dapat tamung luguran.

Pakisabing Mayap

Nung malyari sana, at dapat a mayap
Malyari meng basan, poesia cung liningap
Balu cung culang pa, itang cacung sangcap
Kening linutu cung, bunga ning paninap.

Turu muna cacu, ing sucad a ustu
Masanting a rima, a pagdulapan cu.
Dinan mu cung diwa, nanu ing gawan ku
Bang luntu masanting, kilkal cung amanu.

Oyni ining poesiang , pigcasakitan cung
Belangcas telakad, king dimut a belwan
Magpilit gumale, uli ning parasan
Magbalic ing sinta, nitang cayanacan,.

Metung cang poetang, cacung gagalangan
Misasalbag bini, king amanung siswan
At itang bini mu, dimpot ke at tenam
Sana mamunga ya, mayubu't manyaman.

Eca micacunu, sabyan mu ing dapat,
Manayun cung tucyan, bayang maging sapat,
Ining cacung poesyang, buri cung ipalad
Careng cayanacan, keng bersu mangapcap.

Keni king ANASI, dacal ta abalu,
E ca micacunu, dacal la isuyu,
Deng matwang poeta, manenaya la mu
Maca antabe lang, bisa la pin turu.

Anya cayanacan, sigue sumulat ca,
Manenaya cami, ngeni galo na ca,
Abe abe tamu, Singsing pantunan ya,
Tingcad ibalic ya, nitang Amanu ta.

Ernie Q. Turla

Artesia CA USA

Judge Fullen Anicete

Juez yang cagalanggalangan, king kekaba na ning bye na
Uling malwat menungkulan, alang asabing matsura
Deta nang taung magdalum, ampo reng pacademanda,
Gewa na ing tungkulan na, ing hustisya parehas ya.
E na lalon nung nanu ka, calulu man o macwalta
    evidencia at ing batas, ya kabud ing tutucyan na.

Familya nang caluguran, pepakit na ing lingap na
Uling king tauling inawa, ylang atyu king isip na
Lalu na y Natividad, maganaca nang asawa
Labis labis pamaglingap, sinese siping nang cama
E na atangap tangap pin, ing lacwan at maco naya
Nung nucarin naya muli , marap king miglalang caya.

Anya balen Capampangan, pasalamat , kilalanan,
Nitang alacwan mung Adle, at agawa king balayan;
Ita nang Knights of Columbus, Fourth Degree at Grand Knight ca pa
Carin pepakit mu'ng lugud, king Simbahan O Iglesya;
E wari Rotarian ca pa, Presidenting mituringan,
Tikyan mu detang "Four Way Test" anting Credo mung daralan,
Eulogy at tauling pamun , ining keca cu iampang. . . .


    Uling mayap ca ping tau, at tune cacaluguran
    masyas cang lider ning Balen; Juez cang carelang gagalang;
    Modelu ding cayanacan a dapat dang pamarisan.

    Maluca cung cawatasan, Keca Judge Fullen idaun ke,
    At caring mal ketang bie mu, a lacwan mung misnang lumbe,
    Ing panamdam cung masapsap, mangadi ampon dumame,
    Keng sakit dang daralanan, cayabe cung managulele.

    At kening pamaglacbe mu, munta aliwang carinan,
    Marap na ca at magsulit, ity alang capilisian,
    At neng mayap ing depat mu, keting yatung penibatan,
    Akit me lupa ing Guinu, midinan cang capasnawan.

Compadre at Panero, Cayabe mu king Integrated Bar of the Philippines, King Knights of Columbus, At Rotary Club of Southern Pampanga.  Keng lacaran, at inuman, at aliwa pang e cu na sabian…

Mang Paeng, Poeta Lauredu, Ing Canacung Maestru

Kareng anggang meging maestru, keng pamanigaral bersu,
Matas cu pamaglalawe, pagmaragul cung belwan mu,
Detang kecang cawatasan, a sinibul king salu mu,
Casing santing ning ginulis, obra maestra ning pinsil mu,
Ding picudta mung Amanu, alang sawang tiru cacu,
Ila ngening meging padron, melagwa ing gagawan cu. .

Itang lugud king Amanu, Amanung beitan tamu
Menakit matibeng bale, sesesen meng misnang yubu
Metung kang dutung a Narra, ing asias ning balangkas mu,
Bagyu't uran o sigwada, e miragsa, matatag ya,
Uling atin pang poeta, babye na ngan cagiwan na.
E ya maimut, turu na ngan, caretang lalapit caya.

Inya O poetang Paeng, ining kecang disipulu
Pamangawang cawatasan, rima at sucad a ustu
Magpilit yang mangamanu ketang lyra manigtigan
Bayang macatuki keca ketang layun mung gagawan
Itang Amanu tang Siswan, luguran ya capilan man..
Maski no tamu mipadpad, dalan taya't pacamalan.

Poeta Lauredu ca pin, ning Amanung Capampangan,
Meging kilala cang Pintor, "Global Pinoy" tatangalan,
Meging "MOKA" ketang ARTE, dapot ala cang degulan,
Angga ngeni ing panandam, ding MASA ing luluguran,
At detang tala pagobra, ortelano ketang linang,
Ica mu rin ing Capatad, e gumulut capilan man.

Taldawa Apalit, pampang na ning Ilug
Labwad ning Capampangan

La Dolce Vita (Biskote)

La Dolce Vita ngara pin, manyaman ya ing Biskoti,
Lalu na nung asnang pali itang inuman mung Cafe,
At saca ca timan timan uling alalasa meng tune,
Detang semada at mamun, keta na lang lele lele.

Salamat Cacaluguran, mesaya ya ing pascu cu,
Careng regalung tinggap cu, buri keng dili'ng kecayu,
Ing Biskote aliwa ya, lalu nung bucal king lub yu,
At detang taung didinan, pasalamat la kecayu.

The Sweet Life ya pin keng Inglish, Ing Bie asna ping canyaman,
Lalu keti California nung dacal ca caluguran,
Detang keca maki abe, tapat alang ca-plastican
At keca Gay at Mang July, tinggap yu keng caluguran.

Pasalamat cu kecayu, masayang Pascu Ning Dispu,
Pangadi cung mantabe ya, pagcalaman na cu ning Dios
Maging tahimic ing bie yu, busal ding aduang anac yu.
At nung cailangan ing saup, mutus cu pu at ati cu.

Amor at Daisy

Ing United Pampanga Leaders Council v. 3

Ing United Pampanga Leaders Council, U P L C 'ing mibansagan
Mitatag ya California, Aguman de deng Pampangan,
Labi'ng ualu ing Enero, 1998 ning banwa,
Yang aldo nang kebaitan, U P L C misapwac ya.

Adua lang pulu ding balen, adwang ciudad king Pampanga,
Canya canyang association, keti na king California,
At deta nang labing pitu, ila retang menimuna,
Deng Pamuntuc at Lider da, masaya lang megumpisa.

Chito Mandap ning Minalin, yang mepiling mamuntucan,
Subuc ne king panugali, pamaki-abe't tenacan,
Eya mapagmatas matas, mababa ya pilubluban,
At tune neng caluguran ing labwad tang Capampangan.

Busal ning pamisagsagan, mica maulagang sangcan,
Destiny ning UPLC, miniral ya at yang ticyan.
Lalam ning pamisangmetung, at panamdam maca balen,
Telacad de ing Bandera, lugud king labwad a tibwan.

Ing mumunang parasan na, mipaniaup, midamayan,
Mamantabe at sumuyu, careng Balen'ng mangailangan.
Pante pante itang lawe, ala itang mangabiran,
At ing sabla dumalan ngan, Caburian ding keracalan.

Pilan nang banwang milabas, keta Pampanga gewa na,
Ing Computer Learning Centers meging minunang Project na,
Dacal la retang computers caring Balen mipamie la,
Capitolyo at ding Balen, mikiabe keng programa.

Mig Medical Missions la pa, ketang tune pamaglingap,
Detang Doctor at Dentista, memanulu la ping ganap.
Memie dacal a panulu, pamangan at grasyang sapat,
Deng midinan asnong tula, mangapalwa'ng pasalamat.

Y Birhen De Los Remedios, Mal a Patron ning probinsya,
Balang bulan ning Septiembre, pagmasusian ing aldo na,
Akit me deng UPLC, gugusal, lilibutad la,
Keng Nobena't Salpantaya, Pamagsaya at Programa.

At nung ating Dalo naman, O magpasyal California,
Caring matas manungculan Malacanang at Pampanga,
Anti mu ing Gobernador, Obispo't Presidenti pa,
UPLC yang pupuge, biasa yang tanggap bisita.

Careng Fil-Ams Associations, madalas ing asabian da,
Prestigious Organization ing UPLC carela,
Uling e magbida bida, ala itang "compitensya",
Pamakiabeng marangal caring sabla yang gagana.

Monomento nang Gat RIZAL, king Carson talacad de ya,
Miyaliwang manungculan, ing "ground breaking" tinagun la,
Pati Mayor, Consulado, JPRMM, Fil-Ams pa,
Abe na ning UPLC, king Filipino idaun ya.

Aldo ning annibersaryo, alus labing atlung banwa,
Detang meging Presidenti, Pasalamat, Panalala,
Chito Mandap, Tito Barin, EdTrovada, Philip Gueco,
At adwang gamat yang supan, Pres Ed Ronquillo.

Cacuyug king UPLC, Capanalig a Pampangan,
Abe abe, misanmetung, ing buclud pacatibayan,

U – uling ing Dios yang mumuna...
P – pati Balen tutuki na ...
L – lugud king para tang tau, lalu caretang cabalen...
C – catuliran, catalawran, yta ing dapat tang tucian...

Luid ya ing UPLC; Luid reng Capampangan;
Luid ya ing Pilipinas, Pampanga't Amanung Sisuan!

See version 1 (graphic, 2009); version 2 (text, 2009).

Renato B. Alzadon, Aldo Nang Kebaitan

Retang bisang magregalu, keng aldo mung kebaitan,
Era balu a nung nanu, pecamasanting dang yampang,
Nanu caya ing buri na, a masaya nang tanggapan,
Agamit nang masalese, O isinup pacamalan,
Tabalu at macanian pin, ugali tang acagisnan,
Obat ing mamye regalu, mengari yang catungculan.

BIRTHDAY nang RENE ALZADON, matenacan a Poeta.

Ari ya ping mituringan, ning Parnasung Capampangan,
Lacan ne wari ning Capaz, lugal a cayang beitan,
Zona da reng Capampangan, labwad ding biasa at lacan.
Anac a tiru ning Tatang, pamanyulat at gagale,
Dayrit, Galang at Gallardo, ilang minunang cayabe,
Ocampo king tawling sabi, "Rene keca lilipat ke"
Nuan ya ing Amanu tamung, lingapan meng masalese.

Anya ngeni ing Regalu, a dapat ming idaun keca,
Reng malucang cawatasan, detang poesya at tumaila,
Ila ngening  pangacu ming ibalangcas alang sawa.

Nu ke man danggut ning yatu,  amanu dapat yang dalan,
Ing amanu ta mung siswan, eya maliaring calingwan,
Ningning na nitang sala na, e culimlim bitasa man,
Gambulan yang alang binit, paragulan, palabungan.

Parnasung meging santungan, pisanmetung yang sicapan,
At iwale ing catasan, ing macasnuc at inggitan,
Regalu tamu king Ari, e alaas, mal a imalan,
Nune ing pamisanmetung king Parnasung Capampangan,
Abe abe tang talacad, ibwat taya king calucan...
Salita tamung beitan, a binie na ning Miglalang,
Uling iti yang cailangan, bang e mate't macalinguan,
Saup na ning balang metung, panaian ning ca horasan.

Poemang regalu cu cang Ca Rene, Ari Ning Parnasung Capampangan, keng aldo nang kebaitan.
Artesia, California, 11/11/11

Ninu Caya... Ica?

E mu atarucan, nung nu anti lalam,
At nucarin angga, ita nang catasan,
Ninu caya icang, lubus nang panwalan,
Tatagkil king puso, bie na't caisipan?

Macanyan ya pala lugud ing poeta,
Ing balang pinandit, keca parikil na,
Balang pangisnawa, macaganaca  ya,
Puso na't caladwa, dadaun ngan keca.

Lugud at pacamal, keca tegulaling,
No ya man mipadpad, isip macagising,
Pali ning disyertu, ala yang saingsing,
Uling balang aldo, magbalic yang tambing.

Ing lugud na keca, yang babie sicanan,
at paninapan na, itang catimawan,
Itang casakitan, kecang daralanan,
Ing datang a bucas, aldo capaldanan.

Ninu caya... ica?

Pamicalugud King Amanu (v. 1)

Itang yumu at lasa na,
binasa cung cawatasan,
Macabie yang capasnawan,
kening mainang caisipan,
At agya mang mengupas na,
ing lugud ta at panandam ...
E pa murin menaliwa,
 pamagdulap tang cabiasnan.

Detang aliwang Salita,
a pilit tang papagaral ...
Anti na mu ing tagalog,
Inglish, arabu, castillan...
Deting Sabing pinili da,
paglibe ra king amanung ...
Binie na nitang Miglalang,
caring dai'ng Capampangan.

Amanung miras caladwa,
mabilug tang caisipan.
Yan ing dapat pacamalan....
yapin ing Amanung Siswan,
Pamicalugud a lante...
iti alang cayangganan,
Macanyan mung e ya mate,
e ya dapat ipaglibe.

Parnasung Capampangan Poets receiving awards from UPLI

See other versions of poem: v. 2 | v. 3 | v. 4

Keta King Marangle

Nung bie misnang datun,
ing kecang paintunan,

Keta king marangle,
yang lugal layunan,

Carin ca painawa,
at magbulebule,

A bie mung delanan,
mitmung tula't lumbe.

Caras ning cabengian,
potang magkera na,

King ebus a dase,
ing gulut ipase,

Bayu ca matudtud,
magpilit gumale,

Polusa, basultu,
lalang masalese,

Cabang gagale ca,
keca lang damdaman,

Deta nang culiglig,
pasyuc alang tucnang,

Pati na ring Amuc,
caluscus ding cwayan,

Ilang cayadwangan,
benging capitangan,

Deng Macudta king marangle,
macanyan lang mamagsane,

Ing guintu rang cawatasan,
mibabait ketang Dase.

Mt. Arayat