Memun Ne I Caca

Alegria de Jesus Catacutan, R.I.P.
Neng Amor C. de Jesus

Memun ne y Caca, pepa dakit da ne,
King bayung tucnangan, carin ne pin ume,
Bale misnang santing, caya macabage,
Anting Calam ning Dios, malugud nang binie.

Meging bie king Yatu, a cayang delanan,
Dacal casakitan at capibabatan,
Dapot ala caya, sabla tinggap na ngan,
Alang parsalanan at alang sisisyan.

Caring pengari na, meging panlalawe,
Pepakit nang lugud, tapat at dalise,
Angga ring Capatad, liguran nung tune,
At deng pangunacan, liningap, sinese.

At istung Maleldu, e ke acalingwan,
Bosis nang malagu, tutung pangawilian,
Mamasa yang Pasyun, mipmung cabanalan,
Gege nang matarling, masanting damdaman.

Kecaming pisan na, misna ya ganaca,
Ala yang caimutan, e ya biasang mimwa,
Istung ackit naca, salubung na'ing tula,
Agyang yang pera na, babye na pang cusa.

Anya cacang Angging, e ca macalingwan,
Carening pusu mi, ti ca macasimpan,
At king paglacbe mu, aliwang balayan,
Manatili keca tutuc mung canwanan.

Macanyan lalabas keti babu yatu,
Perlas luwa'ng tinulu, mebaldug king salu,
Calupa ning bulung, melanat, menabu,
Muli ya king gabun, king banwa painturu.
Mamun na cu naman, o Caca cung Angging.

Alegria de Jesus Catacutan, RIP

Almario "Amor" C. de Jesus, Artesia, CA USA; puge at lugud na ning metung a pisan king pangawale nang Cacang Angging.
See English version.

Pamagsane

Misane na cang misane, careng sunis a dalise,
Detang salitang meumis, bubugnus mung misnang kinis,
Bisa cu sang maki-agnan, obat e cu macatagal
King bilis ning panyulung mu, at ali ca mapapagal.

Mitais ya ping mitais, ing Lira mung misnang tulis,
Anya mayan mung a yatsit, ding amanung sasagitsit,
Deng Bersadang pasulapu, mabilis la pa keng cwitis,
Potang misalbag la babu, macawili lang acakit.

At deng Temang pipilinan, calalam da cabaldugan
Nung wari sa ketang dagat, calalam mu pisungaban,
At ita namang catasan, lalampas la pa king bulan,
Canita me pa abalu, nung nanu ing buring sabian.

Detang Rima at Amanu, ketang Sucad tutuklu la,
E na lumwat O Poeta, Lauredu cang makilala.

Sonneto, Aug. 25, 2012

Pamanayang Panalangin

E mesayang unabis man, ing canacung pamanaya,
Cayantabe panalangin, pepalwal me ing poema;
Mipasnu cu pilubluban, pati na cacung caladwa,
King banal mung panalangin, at santing na nitang tema.

Anti cang susulat Biblia, careng salmo at casebyan,
Pepakit ning kecang diwa, tune casalpantayanan,
Detang amanung pisiag mu, e la keca menibatan,
Uling penalig mu Caya, nung dimut mu ytang belwan.

Nung idalit da reng Anghel, deng rima ampon ing bersu,
Keng Metung a Panalangin, pematulan de ing Ginu,
Uling ken ya mayayakit, casalpantayanan tau,
Midayu ing cagutgutan, at tajimic ya ing Yatu.

Marana tha'ng panalangin, o panyatang Ginung Ari,
Talacad neng Caharian na, at carin ta dapat Tuki,
Milaut ta ketang tucsu, bang e ta muli king Api,
Mipamintu ytang lub Na, ketang sablang cayang Buri.

Yanasa!

See version 2.

Sapatos Nang Tata

Nung akit na la mung Tata, detang sapatos mu ngeni,
E la mu adwang dosena, macapila keng estanti,
At nung abalu na caya, nung magcanu'ng presyu da,
Ing pupul na keng pabanwa, e macagyung panyali na.

Ketang kecang cayanacan, ginale ca keng escwela,
Detang sapatos nang Tata, ila rugung peparam na,
Anya agyang Poeta ca, pasalamat ca cang Tata,
Mibabata na cang tiru, maging macudta ca sana.

Masaya ya ing Tatang mu, ketang maluca nang bili,
Meracal na ca sapatos, tengalan da ca pang Ari,
Ing sapatos a pepasulud, e me sana cacalingwan,
Iti bacas ne ning Tata, king anac nang pacamalan.

Anya salamat o Tata, dacal cu abalu keca,
Cawatasan a tiru mu, tinubu at memunga la.

I Rizal

Y Jose Protacio Rizal Mercado Alonzo Y Realada, Aldo Ning Junio 19
(original title)

Calamba,Laguna, metung a Penganac,
Banuang 1861 canita Misapwac,
Cang Teodora Alonzo, ing metung a Anac,
A pepakit lugud, king gabun ning Abac.


Ketang cayanacan, Megaral, Mipalad,
Canita na lintu, tagle Abilidad,
Pilosopia't, sulat, pamanulung ganap,
Nobelang Protesta, canita pengapcap.


Ding Noli at Fili, yla ring Panlaban,
Ketang carocan da, ding Mapanalipan,
At caring Cabalen, carela Linadlad,
Ing biling Busabus, sarili dang Labwad .


Deta nang Nobela, ylang meging Mitsa,
Ketang Bagumbayan, Martir miragsa ya,
Keng panga ragsa na, Tinalacad neman,
Andres Bonifacio, at ding Katipunan.


Detang pobreng Indio telan do ring Palang,
Penga-bac, pengisi, cedulang Tatalnan,
At e la tinucnang, Migalsa't Linaban,
Cabang e migbabu, itang Catimawan.


Inya ngeni'y Rizal, lalun deng Bayani,
Ing panga-Martir na, dangal na ning Lahi,
Pagmaragul taya, itamung Comanggi,
Aldo nang Beitan, Aldo na ning Daji.

Panenayan Da Ca

Keng pamandayu na, ning sintang casuyu,
Anti neng migpaldas, ing kikiac cung pusu,
Ding balang pinandit, ning bili cung bigu,
Panan cu ing aldu, magbalic ca rugu.

Ngening ala na ca, dili cung malumbe,
Ing lingus ding mata, anting tagulele,
Neng benging tahimic, tudtud paintunan ke,
Caratang ning abac, e na mitiwase.

Lacwan dasan mu cu, king sale  candungan,
Buri cung isipan, dit man e mu licwan,
Nu ca man mipadpad, nanu mang cabilian,
Ika, at Ika mu, dili cung palsintan.

Anya mibalic ca king Indu mung Tibwan,
Manaya ya keca, ngeni't capilan man.

Y Mely G. Catacutan

Y Mely Gatbonton Catacutan,
Sapni nang Maria Sinucwan,
Mibait at meragul ya,
Tibis ning Bunduc Alaya.

At king aus na ning sinta,
King Apalit mipadpad ya,
Meging calma ne'y Rodolfo
A apu nang Panday Pira.

Oneng e la mipaindatun,
Ing buri da maglacbe la,
Mig alsa balutan la,
Miparas la America.

Misan a benging marimla,
Ketang tudtud mipacde ya,
Ginising ne ing Lira na,
At linalang yang poema.

Metung a Paninap, mumunang Poesia,
Dilang Maingat, yang cadwang gewa na,
Dacal pang tutuki, lalcas king isip na,
E ta mangainipan, panenayan tala.

Pamagaral King Literatura

Agyang nanu yang aguman, alben mu deng manimuna,
Nanu mu ing parasan da, ot cailangan tucyan mu la,
Ity caya macacayap para kacu, para keca,
O mag bural bural la salu, balang makilalang biasa.

Alben yu ing maliliari king labwad ning Capampangan,
Ditac ditac ing Amanu, milelele, mecalingwan,
Istorya, literaturang at culturang pagaralan,
Abilang mu keng taliri detang bisang manigaral.

Ing Parnasung Capampangan, capamilatan ning Ari,
Papasiag na ing pake na, agiagan nu ring cacampi,
Pamagaral literatura, at culturang Capampangan,
Abe abe tamung lungub, dagdagan tamu ing belwan.

Luid ca Renato Alzadon kening masanting mung pake,
Itang tenacan mung tagle, ituru mu cami at idake,
Samasan me ing "Lesson Plan" caring kecang estudyante,
Bang ing baleng pagaralan, luban miyang mitiwase.

Renato Bonus Alzadon, Ari Parnasung Capampangan

Dagdag, 2016-04-16:

Pami-abeabe

Ing Parnasung Capampangan, anting metung a Pamilya,
Ytang Amanu tang Siswan, ingatan yang maulaga,
Nung atin mang cagutgutan, alingasngas a mesabi,
Eta lubus mamarsala, pilitan tang manatindi,
Ing milabas a matsura, calinguan tamu't gulutan,
Ing ngeni at ing bucas, yang kecatamung samasan;
Abe abe tang manintun ketang mebating a singsing,
Bang isimpan at mibalic, itang cule na at ningning.

Dilang Maingat

Neng Mely G. Catacutan

Amanu at pusu ning metung a tawu
Pacaingatan la't kecang pacamalan
Pamagsalita mu keca lang pilinan
Pota e sasaryan, maroc asabi mu


Itang sebyanan mu, mematawad ya man,
buyuk e milaco, bacas capilan man.
Mayap pang enaca sasabitla muman
Ing asbuc itikum, saca makiramdam.


Ita nang casebiyan, dapat tang tingiran
at ikit man caya, o etaya dimdam,
Eta mamigaua, makitid tang diwa
Ban eta miyabe king sali-salita.


Alang carapatan, eta sa manghusga
Calupa tang tawu, eta mipanyira
Nung nanung depat mu, yang marapat keca
Ita sanang sabla, mepapanupaya.

“This morning after our grocery shopping at WalMart, kitang nang Ompong nung ecu bisang dumalan "Ross". Pekibat cu: "Nung emu cailangan emu sasaliuan ban ena miragdag ing kekang gastusan". Ba ngana, pati pakibat mu macarima na naman, talaga yatang pangatawanan mu ing tuturu ng Amor keka! Mipakaili naka mimu. Tutu naman.”

Metung A Paninap

Neng Mely G. Catacutan

Ibat ketang malati cu, atin cung paninap keng bie,
Magsumicap at magaral, bang ing bucas pin salese,
Cayari cung Secondaryu, pinili cu ing macu cu,
Bang magdulap cu ping swerte, kilwal na nining balen cu.

Megaral cu TOLEDANO, banting maging Secretaryu,
Sindu cu ing pamagaral, cabang aldo magobra cu,
Bang midagdagan cu belwan, at sumulung ing bili cu,
Pamanuru'ng pegaralan, ya ing cursung inari cu.

Dapot ecu mecaturu, ena cu man manghinayang,
Keng pamilya at anac cu, ing balu cu e mesayang,
Anting maestrang talaturu, keng mayap a cayasalan.
Deng anac cu meragul la, malugud la at gagalang.

At king Clarkfield megobra cu, tinanggap dacal a galal,
Ya itang meging dalan, anting "special Immigrant"
King Nueva York yang santungan, king bye capagsubucan,
Uli na ning paninap cu, alang tacut pamicacunwan,

Kilub labing limang banua, megobra cung misnang sipag,
At ngeni retiradu na, painawa na't e magobra
Busal da retang apu cu, deng malugud a anac cu
At salamat po Dios cu, binye me cacu'y Rodolfo.

Nanu pa mu ing buri cu, nung sacaling muli na cu,
Ing Paninap keting Yatu, asabi cung maswerti cu,
Anya naman pangadi cu, pasalamat keca Guinu
Potang muli na cu keca, tanggapan me ing anac mu.